Nicolas na Céline va langusane ni xikazratu lexi hambaniki. Na va li França, va yamukeli xiyavelo xa ku zruzrela ka bandla dzrimbeni. Vone va li: “A ku ­sunguleni a swi nyonxisa, kambe loko nkama wu ye wu famba hi sungule ku xuva vanghanu vezru. A hi nge si va ni vanghanu vanyingi ka bandla ledzrimpshwa.” a Loko u kumana ni swikazratu leswi fanaka, xana u nga nyonxa hi ndlela yini nambiloko u zruzrela ka bandla ledzrimpshwa? Xana van’wana va nga yentxa yini akuva va pfunisa? Nakone, xana mi nga tiyisanana ni van’wana ka bandla ledzrimpshwa hi ndlela yini?

MUNE WA MINTXHUMU LEYI NGA KU PFUNAKA KU TITWANANISA NI XIYIMU XA LOMU U ZRUZRELAKA KONE

1. Dumba Yehovha. (Amaps. 37:5) Makwezru wa xisati wa le Japão lweyi a vitaniwaka Kazumi, swi sindzrise kuva a zruzra ka bandla ledzri a a li ka dzrone ku dzringana 20 wa malembe, hi leswi nuna wake a kumiki ntizro ka mbangu wun’wana. Xana a ‘nyikete ndlela [yake] ka Yehovha’ hi ndlela yini? A li: “Ni khongote ngopfu ka Yehovha, ni mu byela leswi a ni titwisa xiswone, a ni txhava, ni titwa na ni li wuswanga ni tlhela ni hlatiyela. Kambe nkama lowu a ni khongota ka Yehovha, yene a a ni nyika ntamu lowu a ni wu vilela.”

U nga yentxa yini akuva u tama u yengesela ndlela leyi u dumbaka Yehovha ha yone? Ku fana ni nsinya lowu vilelaka mati ni misava leyi noniki akuva wu kula, na hine, akuva hi va ni lipfumelo ledzri tiyiki hi fanela ku tidisa hi tlhelo dzra moya. Nicolas lweyi hi khaneliki ha yene ku sunguleni, a yanakanyisise hi swikombiso swa Abrahamu, Yesu na Pawulo, lava tikazratiki akuva va yentxa ku zrandzra ka Yehova, leswi swi mu yentxe a dumba leswaku Yehovha a a ta mu pfuna. Ku khomelela ha hombe ka xiyimiso xa dondzro ya ximhunu, a swi nge ti ku pfuna ku lavisana ni swikazratu swa wutomi ntsena, kambe u nga ha dondzra mintxhumu leyimpshwa leyi u nga yi tizrisaka akuva u kutxa vambeni ka bandla ledzrimpshwa ledzri u nga ka dzrone.

2. U nga fananise mabandla. (Ekles. 7:10) Jules a zruzre a Benim a ya tsrhama a Estados Unidos, lani mahanyela ya kone a ma hambane ngopfu ­swinene ni lomu a a li kone. A li: “A ni yanakanya ­leswaku a ni fanela ku byeletela hinkwavu a mfambu wanga wa wutomi.” Hi kola ka ku hambana loku a ku li kone ka mahanyela, Jules a sungule ku titsravukanisa ni vamakwezru a bandleni. Kambe, ntsrhaku ka loko a va tive ku yampswa vamakwezru a game a txintxa vonela dzrake. A li: “A swi na mhaka leswaku hi tsrhamaka kwini, hinkwezru ha fana. Ho siyana ntsena ka ndlela leyi hi yentxaka mintxhumu ha yone. Xa lisima, i ku dondzra ku hanyinsana na vone xi leswi va tsrhamisisiki xiswone.” Xileswo, i swa lisima kuva hi nga fananisi bandla ledzri a hi li ka dzrone ku sunguleni ni ledzri hi nga ka dzrone swoswi. Anne-Lise lweyi a nga Phayona, a li: “Ni txintxe bandla hi leswi a ni djula ku dondzra mintxhumu leyimpshwa. Ku nga li leswaku a mintxhumu lomu ni yaka kone a yi tava xi leswi a yi li xiswone lomu ni sukaka kone.”

A vakulu na vone a va fanelanga va fananisa bandla ledzrimpshwa ni ledzra khale. Loko vamakwezru va yentxa mintxhumu hi ndlela leyi hambaniki a swi hlayi swone leswaku vo phazama. I swinene ku swi tiva ha hombe swiyimu swa mbangu wolowo na u nge si na nyikela mavonela yaku. (Ekles. 3:1, 7b) I swinene ku dondzrisa vamakwezru hi xikombiso xaku lexinene ku tlula ku va sindzrisa ku pimisa hi ndlela yaku.—2 Kor. 1:24.

3. Tsrhama na u ni swinyingi swa ku swi yentxa. (Filp. 1:27) A ku txintxa swi nga ha djula nkama ni ntamu kambe i swa lisima ku tekela ku va kone ka mintlhanganu ya bandla ledzrimpswha, hi xivizri loko swi koteka. Loko vamakwezru va le ka bandla ledzrimpswha va nga ku voni mintlhanganwini, va nga va vanghanu vaku ni ku ku pfuna loko swi vileleka hi ndlela yini? Makwezru wa xisati lweyi a tsrhamaka Djoni a vitaniwaka Lucinda, lweyi a zruzriki a ya ka Doropa ledzrikulu kun’we ni vanake vabidzri, a li: “Vanghanu vanga va ni kutxe ku hamba xinghanu ni vamakwezru va bandla ledzrimpswha, ku huma navu nsimu ni ku va kone mintlhanganwini. Nakone hi tlhele hi pfumela leswaku kaya kwezru ku hambiwa kone mintlhanganu ya nsimu.”

Lexi taka ku pfuna kuva u tiya ni ku tiyisa ­vambeni, i ku va u tikazratela ku patsreka ka mintizro ­hinkwayu ya bandla ni vamakwezru. A vakulu va bandla dzra Anne-Lise lweyi hi buliki ha yene ku sunguleni, va mu kutxe ku huma nsimu ni vamakwezru hinkwavu a bandleni. Xana mabindzru ma ve wani? Yene a li: “Ku yentxa leswo, swi ni pfune kuva ni titwa na ni li xizro xa bandla ledzrimpswha hi ku kahlula.” Handle ka leswo, loko u tinyiketa ku basiseni ni ku pfuxeteni ka Yindlu ya Wugandzreli, leswo swi ta komba leswaku na wene u lumba bandla ledzro. Loko u patsreka hi xitalu ka mintizro leyo, vamakwezru va ta titwa na va ntsrhunxekile ku tizrisana na wene nakone u ta titwa na u hamba xiyenge xa ndangu waku lowumpswha wa moya.

4. Tihambeli vanghanu lavampshwa. (2 Kor. 6:11-13) Ndlela leyinene ya ku tihambela vanghanu i ku kombisa leswaku wa zron’weka ha vone. Xileswo hantla u tlhasa a mintlhanganwini nakone tsrhamanyana ni vamakwezru loko mintlhanganu yi hela akuva u bula navu ni ku va tiva ku yampswa. Tikazratele ku tiva mavito yavu. Loko u tikazratela ku dzrimuka mavito yavu u tlhela u va ni wunene ni ku ngheneka u ta yentxa leswaku van’wana va ntsrhunxeka loko va li na wene, nakone swi ta ­nabyala ku hamba wunghanu lebyinene.

A matsrhan’wini ya ku tihamba n’wamunene akuva u zrandzriwa, kombisa leswi u nga xiswone hakunene. Yentxa hi lani Lucinda a hlayiki ha kone: “Loko hi va va ku sungula ku zramba vamakwezru a makaya kwezru, a wunghanu byezru byi ta tiya.”

“YAMUKELANANANI”

Ku nghena Ndlwini ya Wugandzreli lani ku taliki hi vhanu lava hi kalaka hi nga va tivi swi nga ha txavisa ka vambeni. Kutani, u nga va pfuna hi ndlela yini lava vo ho ko sungula ku ta a mintlhanganwini akuva va titwa na va tsrhunxekile? Mupostola Pawulo a te: “Yamukelananani, ku fana ni leswi Kriste a mi yamukeliki.” (Rom. 15:7) Loko swi koteka vakulu va nga pfuna lava vo ho ko sungula ku hlalela mintlhanganu akuva va titwa na va ntsrhunxekile a bandleni, hi ndlela leyo va va na va yetisela Kriste. (Vona bokisi ledzri liki: “ I Yini Leswi Hi Nga Swi Yentxaka Akuva Swi Hi Nabyalela Ku Txintxa Bandla.”) Vamakwezru hinkwavu a Bandleni ku patsra ni vatsrongwana va nga yentxa xa kukazri akuva va pfuna lava vo ho ko sungula ku ta a Ndlwini ya Wugandzreli leswaku va titwa na va li kaya.

Ku yamukela vambeni swi patsra ku va kombisa malwandla ni ku tlhela u va pfuna hi ku kongoma. Hi xikombiso, makwezru wa kukazri wa xisati a pfune makwezru mun’wana wa xisati lweyi a a ha ku tlhasa a bandleni ku tiva Doropa ni ndlela leyi a nga kumaka swa ku famba ha swone, swa ku fana ni mimovha kumbe switimela. Makwezru lweyi wa xisati a nyonxe ngopfu hi ndlela leyi a pfuniwiki ha yone nakone leswi mu yentxe a titwananisa ni bandla ledzrimpshwa hi ku kahlula.

MUKHANDLU WA KU KULA HI TLHELO DZRA MOYA

Akuva a ntete wu pfula timpapa leswaku wu haha swi djula kuva wu hlivila xikhumba makhambi manyingi. Hi lani ku fanaka, loko u txintxa bandla swi ta djula kuva u hlula ku txhava kun’wana ni kun’wana loku u nga ha vaka na kone loku ku nga ha ku sivelaka ku pfula timpapa akuva u haha hi ndlela ya ku fanekisela a ntizrweni wa Yehovha. Nicolas na Celine lava hi buliki ha vone ku sunguleni, va li: “Ku txintxa bandla swi hamba xiyenge xa ku wupfisiwa hi ndlela ya kukazri, hikusa ku titwananisa ni mbangu lowumpswha ni vamakwezru va ku hambanahambana swi djule kuva hi txutxela matsrhamela lamampshwa.” Jean-Charles lweyi kutani hi buliki ha yene, a hlaya ndlela leyi yene ni ndangu wake va pfunekiki ha yone: “A bandleni ledzri hi zruzreliki ka dzrone, a vanezru va ye va kula hi tlhelo dzra moya ni ku txutxela wunghanu bya le kusuhi na Yehovha. Ntsrhaku ka tihweti ti nga li tingani, a n’wanezru wa xisati a sungule ku hamba swiyenge ka ntlhanganu wa makazri ka vhiki kasi lwe wa xinuna a ve muzrezri lwa kalaka a nga si na babatisiwa.”

A hi nge, u djula ku zruzrela lomu ku nga ni xivileleko xa vazrezri kambe swiyimu swaku swi nga ku pfumeleli. Loko swi li tanu tizrisa leswi u swi dondzriki ka nhlokomhaka leyi na u li bandleni dzraku. Leswo swi ta fana ni loko u zruzrele a bandleni ledzrimpshwa. Kutani dumba Yehovha, tsrhama na u ni swinyingi swa ku swi yentxa ka mintizro leyi yentxiwaka a bandleni, hi ku tizra hi lani u nga kotaka ha kone a ku zrezreni ni vamakwezru, ku hamba vanghanu lavampshwa ni ku tiyisa wunghanu lebyi kutani u byi hambiki. U nga tlhela u nyikela pfunu hi tindlela leti tizraka ka lava vo ho ko sungula ku ta a bandleni kumbe ka lava va wu vilelaka. Hi ku yentxa leswo, u ta ya u kula hi tlhelo dzra moya hikusa a lizrandzru i mfungu wa vakriste va ntiyiso. (Yoh. 13:35) U nga tiyiseka leswaku “Xikwembu Nkulukumba a nyonxa ngopfu swinene hi magandzrelo ya ku tasu”.—Heb. 13:16.

Vakriste vanyingi va swikotile ku titwananisa ni bandla ledzrimpshwa nambiloko va kumana ni swikazratu, xileswo na wene u nga swi kota. Anne-Lise a li: “A ku txintxa bandla swi ni pfune ku hamba vanghanu lavampshwa.” Kazumi swoswi a tiyiseka leswaku, ku txintxa bandla “swi nga ku pfuna ku vona ndlela leyi Yehovha a ku seketelaka ha yone, leyi a u ngi ngi sama u yi vona”. Hi nga ku yini ha Jules? Yene a li: “A wunghanu lebyi ni nga byi hamba byi ni yentxe ni titwa na ni li kaya, swoswi ni titwa na ni lumba bandla ledzrimpshwa nakone swi nga ni kazratela ku suka ka bandla ledzri.”