DONDZRO 5
Xikwembu Nkulukumba A Yi Hambele Yini Misava?
1. Xikwembu Nkulukumba a yi hambele yini misava?
Yehovha a nyike hine vhanu misava. I kaya dzrezru. Xiswoswo, vatekani va ku sungula, ku nga Adamu na Evha, a va vumbeliwanga ku hanya matilweni—Xikwembu Nkulukumba a a hambe khale tintsrumi akuva ti hanya kone. (Yob 38:4, 7) Ku hambana ni leswo, Xikwembu Nkulukumba a teke mhunu wa ku sungula a mu beka ka paradeyisi dzra ku xonga swinene ledzri a dzri vitaniwa xizramba xa Edeni. (Genesis 2:15-17) Yehovha a nyike yene ni vana lava a a ta va pswala ku lavisela ka ku hanya hi ku nyonxa la misaveni hi la ku nga helikiki.—Dondzra Amapsalma 37:29; 115:16.
A ku sunguleni ka kone, a ko va xizramba xa Edeni ntsena lexi a xi li paradeyisi. Vatekani va ku sungula a va ta tata misava hi vana ni vatukulu vavu. Hi ku famba ka nkama, a va ta fuma misava hinkwayu va yi yentxa paradeyisi. (Genesis 1:28) Misava a yi nge ti helisiwa ni siku ni dzrin’we. Yi ta tama yi va kaya dzra vhanu.—Dondzra Amapsalma 104:5.
Hlalela vídeo Xikwembu Nkulukumba A Yi Hambele Yini Misava?
2. Ha yini misava yi nga li paradeyisi swoswi?
Adamu na Evha va tlule nawu wa Xikwembu Nkulukumba. Hi swone swi nga yentxa Yehovha a va hlongola xizrambeni. Paradeyisi dzri lahlekise xileswo, nakone a ku na mhunu lwa kotiki ku dzri buyisela. Bibele dzri li: ‘A misava yi nyiketiwe a mavokweni ya lava ku biha’.—Yob 9:24.—Dondzra Genesis 3:23, 24.
Xana Yehovha e tsruva ka leswi a a va hambele swone vhanu a ku sunguleni? Nikatsrongo! A ni ntamu hinkwawu. A nga tsrandzriwi hi ntxhumu. (Ezaya 45:18) A ta tlhelisela lixaka dzra vhanu ka leswi a a swi djulise xiswone.—Dondzra Amapsalma 37:11, 34.
3. Xana Paradeyisi dzri ta tlhela dzri buyiseliwa hi ndlela yini?
Paradeyisi dzri ta tlhela dzri buyiseliwa la misaveni hi nkama wa ku fuma ka Yesu swanga Hosi leyi bekiwiki ha Xikwembu Nkulukumba. Ka yimpi leyi vitaniwaka Armagedon, Yesu a ta buya ni tintsrumi ta Xikwembu Nkulukumba a helisa hinkwavu lava lwaka na Xikwembu Nkulukumba. A ntsrhaku ka leswo Yesu a ta pfalela Sathana djele hi 1.000 wa malembe. Vhanu va Xikwembu Nkulukumba va ta huluka ku helisiwa koloko hikusa Yesu a ta va kongomisa a tlhela a va sizrelela. Va ta tikholisa hi wutomi lebyi nga helikiki a paradeyisini la misaveni.—Dondzra Apfuletelo 20:1-3; 21:3, 4.
4. Xana ku xaniseka ku ta hela siku muni?
Xana Xikwembu Nkulukumba a ta byi helisa siku muni wubihi la misaveni? Yesu a nyikele ‘xikombiso’ ku komba nkama lowu wugamu a byi ta tsrhindzrekela ha wone. Leswi swi yentxekaka la misaveni namunhla swi beka wutomi bya vhanu a khombyeni nakone swi komba leswaku swoswi hi hanya ‘ku heleni ka misava’, kumbe ‘xiyimu lexi xa mintxhumu’.—Dondzra Mattheo 24:3, 7-14, 21, 22, NM.
Hi nkama lowu Yesu a taka fuma misava hi 1.000 wa malembe na a li tilweni, a ta helisa ku xaniseka hinkwaku. (Ezaya 9:6, 7; 11:9) Handle ka ku tizra swanga Hosi, Yesu a ta tlhela a va Muprista Lwenkulu nakone a ta tima swidoho swa lava va zrandzraka Xikwembu Nkulukumba. Xiswoswo, hi kola ka Yesu, Xikwembu Nkulukumba a ta helisa mavabyi, ku duhwala ni lifu.—Dondzra Ezaya 25:8; 33:24.
5. I mani lweyi a taka hanya a paradeyisini ledzri taka?
Loko u ya ka Yindlu ya Mfumu, u ta tivana ni vhanu lava zrandzraka Xikwembu Nkulukumba ni lava djulaka ku dondzra ku yentxa leswi mu nyonxisaka
Vhanu lava yingisetaka Xikwembu Nkulukumba va ta hanya a Paradeyisini. (1 Yohan 2:17) Yesu a zrume valandzreli vakwe ku famba va djula vhanu va ku zrula ni ku va dondzrisa ndlela ya kuva va yamukeliwa ha Xikwembu Nkulukumba. Namunhla wa siku, Yehovha a kazri a lulamisela vhanu va ntsrandzra-vahlayi akuva va hanya ka Paradeyisi ledzri taka la misaveni. (Tsefaniya 2:3) A mimbangwini ya mintlhanganu ya Timboni ta Yehovha, leyi vitaniwaka Tiyindlu ta Mfumu, vhanu va dondzrela ku va vanuna ni vatatana lava yampswaka ni ku va vasati ni vamamana lava yampswaka. Vatsrongwana ni vapswele vavu va gandzrela kone xikan’we va tlhela va dondzra leswaku va nga pfunekisa kuyini hi madzrungula lamanene.—Dondzra Mika 4:1-4.
