Daniyele 7:1-28
7 Hi wusiku bya kukazri ka lembe dzra ku sungula dzra ku fuma ka Belxatsara, hosi ya Babilona, Daniyele a ve ni swivoniso loko a lozra na a yetlelile a mubedweni wake. Kutani a tsrala leswi a swi lozriki, a tsrale hinkwaswu mayelanu na swone.
2 Daniyele a tsrale a ku:
“Ka swivoniso leswi ni viki na swone a wusikwini, ni vone leswaku a moya lowu a wu ba na wu pfa hi ka mune wa matlhelo a wu* dunga lwandle ledzrikulu.
3 Hiloko ku huma mune wa swihazri swa swikulu a lwandle, leswi a swi nga fani.
4 “Lexi xa ku sungula a xi fana ni nghonyama nakone a xi ni timpapa ta gama. Ni xi lavisile ku ya tlhasa loko xi susiwa timpapa, xi sekelekisiwa xi yima misaveni hi milenge yibidzri ku fana ni mhunu, xi va xi nyikiwa mbilu ya mhunu.
5 “Ku humelele xihazri xin’wana xa wubidzri lexi a xi fana ni ursu.* A xi tlakule wun’we wa milenge ya xone nakone a xi khome timbambu tizrazru hi matinyo; va xi byela va ku: ‘Sekeleka u da nyama ya yinyingi.’
6 “Ntsrhaku ka leswo, ni tama ni langusa, hiloko ku humelela xihazri xin’wana lexi a xi fana ni yingwe,* kambe a nhlanini a xi ni mune wa timpapa leti a ti fana ni ta nyanyana ya yikulu. A xihazri lexo a xi ni mune wa tinhloko, nakone xi nyikiwe wulawuli akuva xi fuma.
7 “Ntsrhaku ka leswo, ka swivoniso swoleswo swa le wusikwini ni tame ni langusa, hiloko ni vona xihazri xa wumune lexi txhavisaka xi tlhela xi va ni ntamu ngopfu swinene, nakone a xi ni matinyo ya makulu ya nsimbi. A xi da ni ku helisa hinkwaswu leswi nga matlhelweni ya xone, leswi salaka a xi swi pswanyetela hi milenge. A xi ni 10 wa timhondzro nakone a xi hambanile ni swihazri hinkwaswu leswin’wana leswi zrangiki swi humelela.
8 Na na ha lavisa timhondzro hi wunyaminyami, a xikazri ka tone ku humelele limhondzro dzrin’wana dzra dzritsrongo, nakone a mahlweni ka limhondzro ledzro ku tsruvuliwe timhondzro tizrazru ka leti a ti li kone. Ni xiye leswaku ka limhondzro ledzro a ku ni matihlo lawa a ma fana ni matihlo ya mhunu, ni nomu lowu a wu vulavula hi ndlela ya ku tikulisa.
9 “Ni tame ni langusa ku ya tlhasa loko ku bekiwa swiluvelo, kutani Lweyi A Nga Kone Ku Sukela Khale a tsrhamisa. A mpahla yake a yi base ku fana ni xitsrhwatsrhwa, a misisi yake a yi fana ni voya bya ku basa. A xiluvelo xake a xi li malangavi ya ndzrilo, nakone a maroda ya xiluvelo xolexo a ma li ndzrilo lowu pfuzraka.
10 A ku khuluka nambu wa ndzrilo na wu sukela xiluvelweni xake. 1.000 wa tintsrumi na ti yandzrisiwe ka 1.000, a ti mu tizrela, ni 10.000 wa tintsrumi na ti yandzrisiwe ka 10.000, a ti yime mahlweni kwake. A Tribunali dzri sungula ku yavanyisa, ku va ku pfuliwa mabuku.
11 “Hiloko ni tama ni lavisa hi mhaka mazritu ya ku tikulisa lawa a ma hlayiwa hi limhondzro. Ni lavise ku ya tlhasa loko xihazri lexo xi dlayiwa, a mizri wa xone wu helisiwa, wu va wu nyikeliwa akuva wu helisiwa ndzrilweni.
12 Kasi a swihazri leswin’wana swi tekeliwe wuhosi bya swone, kambe swi pfumeleliwe ku tama swi hanya ku dzringana nkama wa kukazri.
13 “Ni tame ni lavisa ka swivoniso swa le wusikwini, kutani ni vona lweyi a fanaka ni n’wana wa mhunu na a ta hi matlavi ya le matilweni; a pfumeleliwa ku ya mahlweni ka Lweyi A Nga Kone Ku Sukela Khale a va a yisiwa mahlweni kwake.
14 A nyikiwa wuhosi, ku hloniphiwa ni mfumu, akuva vhanu va matiko ni tindzrimi ta ku hambanahambana va mu tizrela. A wuhosi byake i wuhosi bya hi lani ku nga helikiki, a byi nge ti txhuka byi hela, nakone a mfumu wake a wu nge ti helisiwa.
15 “Loko ku li mine Daniyele, ni kazratekile,* hikusa a swivoniso leswi tiki miyanakanywini yanga swi ni txhavisile.
16 Ni tsrhindzrekelele mun’we wa lava a va yime kolanu akuva ni mu vutisa leswaku leswi ni swi voniki swi tlhamuxela yini hakakunene. Hiloko a ni hlamula, a ni byela ntlhamuxelo wa mintxhumu yoleyo a ku:
17 “‘A swihazri leswikulu leswa mune, i mune wa tihosi leti taka va kone a misaveni.
18 Kambe a vaxwengi va Lweyi a Tlakukiki va ta yamukela mfumu, nakone a mfumu wu ta va wavu hi lani ku nga helikiki, ina, hi masiku ni masiku.’
19 “Kutani ni djule ku tiva leswi yengetelekiki mayelanu ni xihazri xa wumune, lexi a xi hambanile ni leswin’wana hinkwaswu. A xi txhavisa ngopfu swinene, a xi ni matinyo ya nsimbi ni min’wala ya kobri; a xi da ni ku helisa hinkwaswu leswi nga matlhelweni ka xone, leswi salaka a xi swi pswanyetela hi milenge.
20 Ni djule ni ku tiva mayelanu ni timhondzro leta 10 leti a ti li nhlokweni ya xone ni limhondzro ledzri humeleliki, ledzri ku wiki timhondzro tizrazru mahlweni ka dzrone, ku nga limhondzro ledzri a dzri ni matihlo ni nomu lowu a wu vulavula hi ndlela ya ku tikulisa, nakone a dzri tikomba dzri li dzrikulu ku tlula letin’wana.
21 “Ni tame ni lavisa, kutani ni vona leswaku limhondzro ledzro a dzri lwa ni vaxwengi nakone a dzri va hlula,
22 ku ya tlhasa loko ku buya Lweyi A Nga Kone Ku Sukela Khale a va a twalisa wuyavanyisi lebyi a byi yentxa leswaku a vaxwengi va Lweyi a Tlakukiki va hlula, ku va ku tlhasa nkama lowu bekiwiki wa leswaku a vaxwengi va teka mfumu.
23 “Hiloko a ku: ‘Loko ku li xihazri xa wumune xi yimela mfumu wa wumune lowu taka va kone misaveni, wu ta hambana ni mimfumu leyin’wana hinkwayu; wu ta hlasela ni ku helisa hinkwaswu leswi wu taka swi kuma misaveni.
24 Loko ku li timhondzro leta 10, ka mfumu wolowo ku ta humelela 10 wa tihosi; kambe a ntsrhaku ka tone ku ta humelela hosi yin’wana, yi ta va leyi hambaniki ni leta ku sungula, nakone yi ta tsrongahata tihosi tizrazru.
25 Yi ta zruka Lweyi a nga Henhlahenhla nakone yi ta tama yi xanisa vaxwengi va Lweyi a Tlakukiki. Yi ta dzringisa ku txintxa minkama ni nawu, nakone a vaxwengi va ta nyiketiwa mavokweni ya yone ku dzringana minkama yizrazru ni hamfu.
26 Kambe a Tribunali dzri sungule ku yavanyisa, yi va yi tekeliwa wuhosi bya yone, akuva yi helisiwa hi ku helela.
27 “‘Kutani a mfumu, a wuhosi ni wukulu bya mimfumu leyi nga hansi ka matilo hinkwawu, swi nyikeliwe ka vaxwengi va Lweyi a Tlakukiki. A mfumu wavu i mfumu wa hi lani ku nga helikiki nakone a mimfumu hinkwayu yi ta va tizrela ni ku va yingiseta.’
28 “A mhaka leyi yi gama kola. Loko ku li mine Daniyele, ni txhave ngopfu swinene lakakuva a wuso byanga byi txintxa. Kambe ni hlayise mintxhumu leyi a mbilwini.”
Tintlhamuxelo ta le hansi
^ Hi ku kongoma: “mune wa mimoya ya matilo a yi”.
^ Kumbe: “bere”.
^ Ku hlayiwa xihazri lexi hi xiputukezi xi vitaniwaka leopardo.
^ Hi ku kongoma: “a moya wanga wu kazratekile a ndzreni kwanga”.
