Армагеддоно — када послиднё война машкар о Дэл и манушыканэ правителёря. Кадэла правителёря и всаворэ, ко лэн подритярэн, жан против о Дэл дажэ щяс, и на камэн, кай о Дэл тэ правий пэр лэндэ (Псалом 2:2). И война Армагеддоно стерэла кадя, кай лэ манушэндири правления будэр на авэла (Даниил 2:44).

 Алав «Армагеддоно» появийпэ андэ Библия кати еқвар, андэ Откровение 16:16. И сар ԥэнэнпэ андо пророчество андэ кадэя книӷа, «и царёря всаворя ԥувьятирэ» авэна стидэ «пэ война, сави авэла андо баро дес лэ Всемоӷущёнэ Дэвлэско» «пэ ԥув, пэ сави ԥэнэн, пэ еврейско шыб Армагеддоно» (Откровение 16:14).

 Ко авэла тэ марэлпэ андэ война Армагеддоно? О Иисус Христос жала лэ небеснонэ воинонэнца, кай тэ победий лэ Дэвлэстирэ вороӷонэн (Откровение 19:11—16, 19—21). Вороӷоря кодэла, ко жал против лэ Дэвлэстири власть и вэрыцый лэс (Иезекииль 39:7).

 И война Армагеддоно авэла по Ближнё Востоко? Най. И война Армагеддоно авэла най андэ варисаво определёно ҭан, вой авэла па вся и люма (Иеремия 25:32—34; Иезекииль 39:17—20).

 Армагеддоно, дэкала пэрэандярдёл сар «Хар-Магедоно» (пэ еврейско шыб Хар-Мегиддоно), када означает «плай Мегиддо». О Мегиддо сас форо паша дэлмутно Израилё. Сар ԥэнэнпэ андэ история, паша кадэва форо сас бут войны, пала дэсавэ андар лэндэ запистромэ андэ Библия (Судей 5:19, 20; 2 Царей 9:27; 23:29). Важ када о Армагеддоно на сыкавэл, кай во авэла андэ варисаво конкретно ҭан паша дэлмутно Мегиддо. Котэ нинай вучо плай, ай и долина Изреель, сави паша лэстэ, на уместия всаворэн, ко жала против о Дэл. О Армагеддоно сыкавэл, кай када авэла бари война, када кала и народоря стидэнапэ послиднё разо тэ жан против лэ Дэвлэстири правления.

 Со авэла, кала залэлапэ и война Армагеддоно? Амэ на ӷанас, сар о Дэл сыкавэла пэско зор, но амэ ӷанас, со во терэлас андэ дэлмутни время, када: ӷрадо, землетрясения, баро ливнё, бара ягаса, молнии и насвалимос (Иов 38:22, 23; Иезекииль 38:19, 22; Аввакум 3:10, 11; Захария 14:12). Инке дэсавэ лэ Дэвлэстирэ вороӷоря анда даратэ лэна тэ умарэн ек еқэс, но потом вонэ полэна, кай против лэндэ марэлпэ о Дэл (Иезекииль 38:21, 23; Захария 14:13).

 Авэла и люма уничтожыно андо Армагеддоно? Амари ԥув на авэла уничтожыно, важ кода кай вой всегда авэла цэр важ и мануша (Псалом 37:29; 96:10; Экклезиаст 1:4). Андо Армагеддоно и мануша на авэна умардэ, ай наоборот, вонэ спасынапэ, важ кода кай пэрэжувэна кадэя бида фартэ бут мануша, када лэ Дэвлэстирэ служытеля (Откровение 7:9, 14; Псалом 37:34).

 Андэ Библия алав «люма» ԥэнэнпэ най кати пала ԥув, но и пала найлашэ мануша, савэ жан против о Дэл (1 Иоанна 2:15—17). Андо Армагеддоно похындёна кадэла мануша, или авэла «конец кадэла времяти, андэ сави амэ жувас» (Матфеё 24:3).

 Кала авэла о Армагеддоно? И «бари бида» анэна каринг кода, кай залэлапэ и война Армагеддоно, и када авэла послиднё решающё маменто. О Иисусо ԥэндя: «Кала авэла кадэва дес и часо, на ӷанэн нико. Ни и анӷелоря по нэбо, ни о Шаво. Када ӷанэн кати о Дад» (Матфеё 24:21, 36). Но андэ Библия ԥэнэнпэ, кай о Армагеддоно начнёца, кала авэла амэнца о Иисусо. Када заляпэ андо 1914 бэрш (Матфеё 24:37—39).