Пэрво письмо андо Каринфо 16:1-24
16 Ай пала кода, сар тэ стидэн и ловэ важ и свынти, терэн кадя, сар мэ ԥэндэм лэ христианонэнди андэ Гала́тия.
2 Андо пэрво лэ куртеско дес кажно трэбуй тэ отстол скати ловэ, скати во можэт тэ дэл. Кадя тумэнди на прижалапэ тэ стидэн и ловэ тоди, кала мэ авава.
3 Ай кала мэ авава, мэ бишалава манушэн, пала савэ тумэ пистросардэ лашэ алавэнца андэ пэстирэ письморя, тэ анэн тумаро подарко андо Иерусалимо.
4 Но, если авэла трэбуй, кай и мэ интя тэ жав, тоди амэ жаса ӷуртом.
5 Мэ авава каринг тумэндэ, кала прожава и Македо́ния, важ кода кай мэ камав тэ жав через и Македо́ния.
6 Можэт, мэ набут заритярдювава тумэндэ или дажэ винтярава. Тоди тумэндэ вижала тэ проандярэн ман интя, каринг мэ трэбуй тэ жав.
7 На камав тэ диқавпэ тумэнца щяс, просто па дром. Мэ надеисавав, кай мандэ получияпэ тэ заритярдював тумэндэ, если лэ Иеговасти авэла уӷодно.
8 Мэ ашавапэ андо Ефе́со жы каринг лэ Куртенго празнико,
9 важ кода кай мандэ появисайля лащи возможность* тэ терав инке май бут дила. Но исин бут кодэла, ко жал против амэндэ.
10 Если авэла о Тимафе́ё, шон сама лэс и подритярэн, кай машкар тумэндэ во тэ на дарал, важ кода кай во, сар и мэ, терэл лэ Иеговастири дила.
11 Кочай на́ домэкэн, кай нико тэ на гиндой пала лэстэ найдраго. Проандярэн лэс Дэвлэса, кай во тэ авэл каринг мандэ. Мэ аштярав лэс вмести аврэ ԥралэнца.
12 Камлэм инке тэ ԥэнав пала Апало́со: мэ фартэ мангавас лэстар тэ жал лэ ԥралэнца каринг тумэндэ. Но во ԥэндя, кай авэла най щяс, ай кала лэстэ вижала.
13 Отшон и линдра, на́ парашэн тэ патян*, авэн смили и састэ.
14 Вся терэн важ кода, кай любин.
15 Ԥрала, тумэ ӷанэн, кай лэ Стефаноско ери сас машкар пэрви, ко патяя андэ Аха́я. Вонэ стодэ бут зор, кай тэ поможын лэ свынтонэнди. Важ када мангав тумэндар:
16 дэн зор кацавэ манушэнди и всаворэнди, ко терэл амэнца ек дила и на жалуий корко пэс.
17 Мэ лошало, кай катэ манца о Стефа́но, о Фартуна́то и о Аха́ико. Вонэ поможысардэ манди, пока тумэ нэ моӷли када тэ стерэн.
18 Вонэ динэ зор и манди, и тумэнди. Важ када цэнин кацавэ манушэн.
19 И христианоря* андэ Азия пэрэдэн тумэнди поклоно. Кадяжэ о Аки́ла, и При́ска и вся о ӷурто, саво стидэлпэ андэ лэнго цэр, анда ди пэрэдэл тумэнди поклоно, сар лэ Христостирэ ученикоря.
20 Пэрэдэн тумэнди поклоно всаворэ ԥрала. Кала диқэнпэ, чуминдэн ек еқэс, сар ԥрала.
21 Мэ, о Павло, ԥэнав тумэнди «доров» и пистросарав када мэрнэ вастэса.
22 Ко най глаба* пала Баро Хулай, тэ дэл пэр лэстэ и бида. Ав, Баро Хулай!
23 Мэк о Баро Хулай о Исусо здиқэл пэр тумэндэ па пэско баро ковло ди.
24 Ӷанэн, кай мэ любисарав всаворэн тумэн, ко андярэл лэ Христостири лэ Исусостири время.
Сноски
^ Ворта «англа мандэ ԥэрнаделя бари двэря».
^ Или «ашэнпэ састэ андэ вера».
^ Или «грады».
^ Или «на любий».
