Лащи новость лэ Матфеёстар 2:1-23
2 О Иисусо арақаделя андо Вифлее́мо андэ Иудея, кала правияс о царё И́радо*. Прожыля дэсави время и андо Иерусалимо па Востоко авелэ и драбатяримаря*
2 и ԥэндэ: «Кай о иудейско царё, саво арақаделя? Амэ додиқлям лэстири звезда, кала самас по Востоко, и авелям тэ тэлювас лэсти».
3 Кала о царё Ирадо и вся о Иерусалимо ашундэ пала када, лэн шутя андэ дар.
4 Во стидя всаворэ́ барэ рашан и лэ закониконэн и пушля лэндар пала кода, кай трэбуй тэ арақадёл о Христос*.
5 Вонэ ԥэндэ: «Андо форо Вифлее́мо, саво находийпэ андэ Иудея, важ кода кай о пророко пистросардя:
6 „Ту, Вифлее́мо андэ Иудея, важ и иудейски правителя важно форо, важ кода кай тутар жала о правителё, саво диқэла пала мэрно народо Израилё“».
7 Тоди о Ирадо закамля, кай каринг лэстэ тэ авэн и драбатяримаря. Во чоралэс ақардя лэн и уӷангля и точно время, кала дицэля и звезда.
8 Потом во лэн бишалдя андо Вифлее́мо и ԥэндя: «Жан родэн лэ бэятос, ай кала виарақэна, ԥэнэн манди, кай и мэ тэ жав тэ тэлював лэсти».
9 И драбатяримаря ашундэ лэ царёс и жылэ андо дром. И звезда, сави вонэ диқлэ инке по Востоко, жалас англа лэндэ, пока на терделя котэ, кай сас о бэято.
10 Кала и драбатяримаря диқлэ, кай и звезда терделя, вонэ фартэ залошайлэ.
11 Вонэ зажылэ андо цэр, додиқлэ лэ бэятос и лэстиря да ла Мария. Тоди вонэ пэлинэ пэ чанга и тэлелэ лэсти, ай потом подарисардэ лэсти сомнак, ладано и мира*.
12 Посли када о Дэл андэ сунэстэ приԥэндя лэнди тэ на ринпэ каринг о И́радо, важ када вонэ жылэ цэрэ аврэ дромэса.
13 Кала и драбатяримаря ужылэтар, лэ Иосифости андэ сунэстэ авеля лэ Иеговаско анӷело и ԥэндя: «Лэ кадэлэ бэятос и лэстиря да и наштар андо Египто. Ашпэ котэ, пока мэ на ԥэнава тути тэ риспэ, важ кода кай о Ирадо камэл тэ виарақэл лэ бэятос и тэ умарэл лэс».
14 Андэ кодэя жэ рят о Иосифо ля лэ бэятос и ла Мария и жыля андо Египто.
15 Во ашэласпэ котэ, пока на муля о Ирадо. Кадя ашэля, сар о Иегова ԥэндя через о пророко: «Мэ ақардэм мэрнэ шавэс, кай во тэ авэл анда Египто».
16 Кала о Ирадо поля, кай и драбатяримаря дилярдэ лэс, во заԥабеля холятар и приԥэндя, кай андо Вифлее́мо и андэ фороря, савэ сас паша лэстэ, тэ умарэн всаворэ́ шаворэн, савэнди инке на сас дуй бэрш. (Во поля, скати бэрш лэ бэятости, па кода, со ԥэндэ и драбатяримаря.)
17 Кадя ашэля, сар ԥэндя о пророко Иереми́я:
18 «Андо форо Ра́ма ашундёлас, сар фартэ ровэнас и умардёнас бидаса. И Рахи́ль ровэлас пала пэстирэ бэяцэ и на камэлас, кай варико ла тэ подритярэл, важ кода кай лэн на ашэля».
19 Кала муля о Ирадо, лэ Иосифости андо Египто авеля андэ сунэстэ лэ Иеговаско анӷело
20 и ԥэндя: «Лэ кадэлэ бэятос и лэстиря да и жа андо Израилё, важ кода кай мулинэ кодэла, ко камэнас тэ умарэн лэ бэятос».
21 О Иосифо ля лэ бэятос и ла Мария и рисайля андо Израилё.
22 Но кала во ашундя, кай андэ Иудея правий лэ Ирадоско шаво о Архилаё, во дарайля интя тэ жал. Тай инке о Дэл андэ сунэстэ ԥэндя лэсти: «На жа интя», и важ када во жыля андэ Галилея.
23 Во авеля пэ кодэла краёря и ля тэ жувэл андо форо Назарето. И кадя ашэля, сар ԥэндэ и пророкоря: «Пэр лэстэ ԥэнэна назаретянино*».
Сноски
^ Када о Ирадо Пэрво Вели́ко.
^ Или «астролаӷоря». Када сас мануша, савэ драбатярэнас па звёзды.
^ Или «Миси́я».
^ Када сас смола; соко анда витки. Лэн сԥабарэнас, кай драго тэ қандэл; тэ авэл приятно запахо.
^ Наверно, кадэва алав жал лэ еврейсконэ алавэстар, саво означает «росточко».
