Лащи новость лэ Лукастар 22:1-71
-
И рашая дэн дума, сар тэ умарэн лэ Иисусос (1—6)
-
Тидэнпэ каринг и послиднё Патради (7—13)
-
Лэ Барэ Хуластири мисяйля (14—20)
-
«Манца пала ек мисяйля бэшэл здимари» (21—23)
-
И ученикоря споринпэ машкар пэстэ, ко андар лэндэ ӷлавно (24—27)
-
О Иисусо дэл солах пала Царство (28—30)
-
О Иисусо ԥэнэн, кай о Пётро отԥэндёла лэстар (31—34)
-
Трэбуй тэ авэн ӷотови; дуй барэ шуря (35—38)
-
О Иисусо мангэлпэ по Алифкаво плай (39—46)
-
И воиноря авэн пала Иисусо (47—53)
-
О Пётро отԥэндёл лэ Иисусостар (54—62)
-
Лэ Иисусостар приасанпэ (63—65)
-
О Иисусо андо Ӷлавно иудейско сындо (66—71)
22 Поджалас лэ Преснонэ марнэско празнико, пэ саво ԥэнэн Патради.
2 И барэ рашая и законикоря камлэ тэ умарэн лэ Иисусос и гиндонас, сар фэдэр када тэ стерэн, важ кода кай вонэ даранас лэ народостар.
3 Тоди о Сатана зажыля андо ди кай о Иуда Искарио́то, кай ек анда 12 апосталоря.
4 О Иуда жыля каринг и барэ рашая и каринг и барэдэра пэ лэ Дэвлэско цэр*, кай тэ подэл дума лэнца, сар тэ видэл лэнди лэ Иисусос.
5 Вонэ сас лошалэ када тэ ашунэн и динэ алав, кай пала када лэсти потинэна.
6 Во соӷласисайля и ля тэ родэл потходящё маменто тэ видэл лэс лэнди, кала паша лэстэ на авэла о народо.
7 Авеля лэ Преснонэ марнэско празнико, кала анэнас ла Патрадятири жэртва.
8 О Иисусо ԥэндя лэ Петрости и лэ Иоаности: «Жан и стон важ амэндэ ла Патрадятири мисяйля».
9 Вонэ пушлэ: «Кай амэнди тэ стас и мисяйля?»
10 Во ԥэндя: «Тумэ зажана андо форо и диқэнапэ манушэса, саво ԥиравэл кувшыно лэ паеса. Жан пала лэстэ жы каринг о цэр, андэ саво во зажала,
11 и котэ ԥэнэн лэ цэрэстирэ хуласти: „О Учителё пушэл: ‚Кай о цэр* важ и ӷостёря, кай мэ моӷу тэ справисарав и Патради пэстирэ учениконэнца?‘“.
12 Во сыкавэла тумэнди упрэ баро цэр, кай авэла вся, со трэбуй. Котэ и стон амэнди мисяйля».
13 Вонэ жылэ, и вся сас кадя, сар во лэнди ԥэндя. И вонэ стердэ вся, со трэбуй, каринг и Патради.
14 Кала авеля о вэчэро, во бэшля лэ апосталонэнца пала столо
15 и ԥэндя лэнди: «Мэ камлэм тэ хав кадэва ла Патрадяко хамос тумэнца жы каринг и ԥари время, сави мандэ авэла.
16 Важ кода кай, ԥэнав тумэнди, мэ ужэ на лава тэ хав кадэва хамос, пока андэ лэ Дэвлэско Царство на ашэла вся кода, со во сыкавэл».
17 Во ля о тахтари, поблаӷодарисардя лэ Дэвлэс и ԥэндя: «Лэн кадэва тахтари и пэрэдэн ек еқэсти.
18 Ԥэнав тумэнди, мэ ужэ на лава тэ пав о вино, пока на лэла тэ правий лэ Дэвлэско Царство».
19 Тоди во ля о марно, поблаӷодарисардя лэ Дэвлэс, ԥагля лэс, дя лэнди и ԥэндя: «Кадэва марно сыкавэл мэрни тила, сави мэ отдава важ тумэндэ. Терэн када, кай тэ сэрэн мэрни время*».
20 Кадяжэ, посли кода сар вонэ халэ, во дя лэнди о тахтари и ԥэндя: «Кадэва тахтари сыкавэл нэви солах* пэ мэрно рат, саво питяла важ тумэндэ.
21 Но манца пала ек мисяйля бэшэл здимари.
22 Лэ манушэско Шаво жал кодэлэ дромэса, пала саво сас ԥэндо май данглал. И всаек бида кодэлэсти, ко лэс здэл!»
23 Тоди вонэ линэ тэ гиндон, ко андар лэндэ моӷ кацаво тэ стерэл.
24 И апосталоря линэ тэ споринпэ, ко андар лэндэ само ӷлавно.
25 Но о Иисусо ԥэндя лэнди: «И барэ мануша* хулаин лэ народонэнца, и кодэла, кастэ исин власть, ашундён па лащи дила.
26 Ай тумэ на трэбуй кацавэ тэ авэн. Но ко машкар тумэндэ барэдэр, мэк во ашэл сар цыкнэдэр, и ко лэлпэ хуласа, мэк во ашэл сар слуӷо.
27 Ко май ӷлавно: ко хал или ко стол и подэл? Хэба най кодэва, ко хал? Ай мэ машкар тумэндэ сар слуӷо.
28 Тумэ на ашавэнас ман, кала мандэ сас ԥари время,
29 и мэ дав тумэнди солах* пала Царство, — сар мэрно Дад дя солах манди*, —
30 кай тумэ тэ хан и тэ пэн манца пала ек мисяйля андэ мэрно Царство. Тумэ лэна тэ правин* пэ 12 израильски коленоря, кай тэ андярэн сындо пэр лэндэ.
31 Си́мано, Си́мано, о Сатана тасавэлас, кай лэсти тэ дэн тэ просеий тумэн, сар пшэница.
32 Но мэ фартэ мангаваспэ, кай ту тэ на парашэс тэ патяс*. И кала ту рисапэ, дэ зор пэстирэ ԥралэнди».
33 О Пётро ԥэндя: «Учителё*, мэ ӷотово туса и тэ бэшав андо бар, и тэ мэрав».
34 Но о Иисусо ԥэндя: «Пётро, ԥэнав тути: инке на процыпия адес о башно, сар ту тривар ԥэнэса, кай на ӷанэс ман».
35 Посли када во пушля лэндар: «На хутилэлас тумэнди варисо, кала мэ бишалавас тумэн, ай тумэ на лэнас пэса и тышыла, и сумка и сандаля?» Вонэ ԥэндэ: «Най».
36 Во ԥэндя лэнди: «Но акана, если варикастэ исин тышыла, мэк лэл ла, ай кадяжэ мэк лэл и сумка. И если варикастэ нинай шури, мэк битинэл пэстири накитка и тинэл шури.
37 Ԥэнав тумэнди: манца трэбуй тэ ашэл кадя, сар пистромэ: „Пала лэстэ сас ԥэндо, кай во бэзэхало мануш*“. Акана вся ашэл кадя, сар сас пистромэ пала мандэ».
38 Тоди вонэ ԥэндэ: «Учителё*, катэ исин дуй барэ шуря». Во ԥэндя лэнди: «Када хутила».
39 Кала вонэ вижылэ котар, о Иисусо, сар обычно, жыля каринг о Али́фкаво плай, и лэстирэ ученикоря жылэ лэса.
40 Кала вонэ авелэ интя, во ԥэндя лэнди: «Мангэнпэ, кай тэ на подэнпэ лэ бэзэхэсти».
41 Ай екжэно оджыля лэндар чуть май дур*, терделя пэ чанга и ля тэ мангэлпэ:
42 «Дадэ, если ту камэс, улэ мандар кадэва тахтари. Но авря ригатар, мэк вся авэл най сар мэ камав, ай сар камэс ту».
43 Тоди лэсти па нэбо сыкаделя о анӷело и придя лэсти зор.
44 Но лэстэ по ди сас кадя ԥарэс, кай во ля тэ мангэлпэ инке май фартэ, и лэско пото сас сар капли рат, савэ пэрэнас пэ ԥув.
45 Кала во парашэля тэ мангэлпэ, во жыля каринг и ученикоря и додиқля, кай вонэ совэн, важ кода кай сас вицыенэ лэ ԥарэ гиндонэндар*.
46 Во ԥэндя лэнди: «Васо тумэ совэн? Ущен и мангэнпэ, кай тэ на подэнпэ лэ бэзэхэсти».
47 Во инке на додя дума, сар авеля бут миро. Май англал лэндар жалас о Иуда, ек анда 12 апосталоря. Во поджыля каринг о Иисусо, кай тэ чуминдэл лэс.
48 О Иисусо пушля лэстар: «Иуда, ту чуминдэс лэ манушэстирэ Шавэс, кай тэ придэс лэс?»
49 Кала кодэла, ко тердёлас паша Иисусо, полинэ, со авэла, вонэ ԥэндэ: «Учителё*, можэт, амэнди тэ дорэсас и шуря?»
50 И ек андар лэндэ отшындя* о право кан лэ ӷлавнонэ рашастирэ рабости.
51 Но о Иисусо ԥэндя: «Авэла!» — и ляпэ каринг лэ рабоско кан и исцэлисардя лэс.
52 Тоди во ԥэндя лэ барэ рашанди, лэ барэдэрэнди пэ лэ Дэвлэско цэр и лэ ԥоромэнди, савэ авелэ лэс тэ залэн: «Хэба мэ бидово мануш, кай тумэ авелэ пэр мандэ барэ шурянца и рувлянца*?
53 Мэ кажно дес сымас андэ лэ Дэвлэско цэр, и тумэ на ӷуленас мандэ. Но акана авеля тумари время и власть кодэлэндири, ко жувэл андэ тэмнота».
54 Лэ Иисусос хутилдэ́ и андярдэ кай о ӷлавно рашай андо цэр, ай о Пётро жыля пала лэндэ и ритярдёлас чуть май дур лэндар.
55 Кала и мануша стодэ яг андэ града и бэшлэ паша латэ, о Пётро тожэ прибэшля лэнца.
56 Ай ек служанка, кала додиқля лэс через о свето ла ягатар, внимательно подиқля пэр лэстэ и ԥэндя: «Кадэва мануш тожэ сас лэса».
57 Но во ля тэ отԥэндёл: «Манушни, мэ на ӷанав лэс».
58 Ӷэт май интя лэс додиқля авэр мануш и ԥэндя: «Ту тожэ лэнго». Но о Пётро ԥэндя: «Най».
59 Прожыля лак часо, и инке ек мануш ворта ԥэндя: «Кадэва мануш точно сас лэса, важ кода кай во анда Галиле́я!»
60 Но о Пётро ԥэндя лэсти: «Мэ на ӷанав, пала со ту дэс дума». И сразу жэ, пока во инке ԥэнэнас када, зацыписайля о башно.
61 О Иисусо* обрисайля и диқля по Пётро. И лэ Петрости авелэ по гиндо лэстирэ алава: «Адес, англа кода сар зацыпия о башно, ту тривар отԥэндёса мандар».
62 Во вижыля и розровьяпэ.
63 Кодэла, ко сторожыяс лэ Иисусос, линэ тэ приасанпэ лэстар и тэ марэн лэс.
64 Вонэ затидэ́ лэсти о муй и линэ тэ пушэн лэстар: «Если ту лэ Дэвлэстар*, ԥэн, ко тут дядап?»
65 И вонэ ԥэнэнас пэр лэстэ бут со абисо, и када сас акушымастирэ алава по Дэл.
66 Тэсара стидэ́пэ всаворэ лэ народостирэ ԥорома: барэ рашая и законикоря. Лэ Иисусос андэ́ каринг лэндэ андо зало, кай стидэласпэ о Ӷлавно иудейско сындо*, и вонэ ԥэндэ:
67 «Если ту Христос, пэн амэнди пала када». Но во ԥэндя лэнди: «Дажэ если мэ ԥэнава тумэнди, тумэ на патяна.
68 И если мэ задава тумэнди вопросо, тумэ ашэна мулком.
69 Но акана лэ манушэско Шаво лэла тэ бэшэл справа* лэ зоралэ Дэвлэстар».
70 Тоди вонэ пушлэ: «Ни акэ, вижал, ту — лэ Дэвлэско Шаво?» Во ԥэндя лэнди: «Тумэ екжэнэ ԥэнэн, кай када мэ».
71 Вонэ ԥэндэ: «Состэ амэнди инке тэ доԥэнас лэстири дош? Амэ екжэнэ ашундям, сар во када ԥэндя».
Сноски
^ Или «храмо». Катэ и май дур андэ кадэя ӷлава.
^ Или «комната».
^ Или «пала мандэ».
^ Или «нэво доӷоворо».
^ Или «царёря; правителя».
^ Или «терав тумэнца доӷоворо».
^ Или «стердя доӷоворо манца».
^ Или «тэ бэшэн пэ троноря, кай тэ правин».
^ Или «тири вера тэ на ашэл слабо».
^ Или «Баро Хулай; Ӷосподино».
^ Досл. «приступнико».
^ Или «Баро Хулай; Ӷосподино».
^ Или «пэ растаяния, пэ сави можно тэ шувидэс о бар».
^ Или «кодэлэстар, кай фартэ пэрэжывали; кодэлэстар, кай по ди сас нэспокойно».
^ Или «Баро Хулай; Ӷосподино».
^ Или «дядап и отшындя».
^ Или «дубинкэнца».
^ Или «Баро Хулай; Ӷосподино».
^ Или «лэ Дэвлэско особо мануш; кодэва, ко пэрэдэл и алава лэ Дэвлэстар».
^ Досл. «Синидрёно».
^ Досл. «па право вас».
