Barilem ande iek foro kai nas but love anda Los Angeles (California, Estados Unidos). Godo foro sas prinzhardo ke bikinenaspe draba chorhe ai ke sas but grupuria kai kerenas so nai vorta. Me simas o duito anda shou phral.

De tsinorhara , murhi dei ningerelas amen ande khangeri evangelika.

Numa kana barilem, chi lavas opre so phenelaspe. Gilabavas ande khangeri, numa ando kurko kidavas man murhe amigonentsa, piavas draba chorhe ai keravas prame bi vuzhe.

Joliavavas fuga ai pala fersavi prama kamavas te marau man. Fersavi prama sas mange vorta te dukhavau le kolavren ai te niriu. So sikilem ande khangeri chi azhutisardias man. Phenavas: “O Del si kon pokinel nasul pe nasul, ai me kerau buki leske”. Kana getosaravas e escuela plachalas man o gindo kai sas len uni manush andel borsh 60. Von sas prinzharde sar le Panteras Negras, kai marenaspe te aven len e voia te alol suako manush. Ai thode man ande iek grupo kai sas uni terne anda e escuela kai sas len iek gindo sar godo. Kana sikavasas amaro gindo pa vareso kai chi plachalas amen e escuela trobulas te phandavel.

Numa nas dosta mange kako. Pala e joli kai sas ande mande astardem te kerau prame kai nas vorta. Iek ejemplo si, ke murhe amiguria ai me zhasas te dikhas kietri kai sikavenas so kerenas kal slugi anda e África ando Estados Unidos. Pala e bari joli kai aliaravas porme te dikhas e kiatra mardiam ka uni terne parne kai sas kotse, ai vi zhasas kal foruria kai beshenas le parne te maras len.

Ande godia vriama, murhe phral ai me sas amen bedi la krisasa ai prinzharenas amen pala so kerasas. Iek anda murhe phral mai tsinorhe sas ande iek grupo kai kerenas so nai vorta ai me zhavas lentsa. Murho traio suako gies sas mai jasardo.

Le dada katar iek amigo murho, sas marturia le Jehovaske ai akharde man te zhau lentsa kai kidenpe. E pervo data kai gelem, dem po gor ke von nas sar le kolaver manush. Savorhende sas iek Biblia ai chitonas la. Dikhavas ke le mai tsinorhe denas divanuria! Plachaias man te zhanau ke o anau le Devlesko si Jehova, ai ke kana denas duma pa leste phenenas lesko anau (Salmo 83:18). Makar sas manush anda but thema, dem po gor ke savorhe ningerenaspe mishto ai ke sas ande pacha.

Chi kamavas te sikaven man pa e Biblia, numa plachalas man te kidau man le Marturentsa. Iek gies, uni anda murhe amiguria gele te dikhen uni manush kai keren muzika ai kotse mundarde iekhe manushes te len lestar leski rajami. Numa me chi simas lentsa, gelemas te kidau man le Marturentsa. Po kolaver gies, murhe amiguria kerenas barimata anda so kerde. Kana kerenas lengi kris, sikavenas ke nas iek bari prama ai ke nas lenge khanchi. Alosarde lenge te ashen phandade but borsh. Che veselime simas ke chi gelem lentsa! Pala godia alosardem te parhuvau murho traio ai te sikiuau pa e Biblia.

Pala o gindo kai sas man, nashtivas te pakiau so dikhavas kal marturia le Jehovaske pal manush parne ai kale. Iek data dikhlem kana iek marturo le Jehovasko parno gelo ande aver them, meklias penge shaven te arakhen len iek familia kali. Vi iek terno kalo kai trobulas les iek than te beshel, iek familia parni meklias les te beshel lende. Gadia dem po gor ke le marturia le Jehovaske keren so phendias o Jesukristo ando Iovano 13:35: “Pala kodo savorhe zhanena ke tume san murhe disipluria, te avena drago iek kavreske”. Zhanavas ke arakhlem chache phral.

Sar sikiuavas pa e Biblia, dem po gor ke trobuvas te parhuvau murho gindo ai sar simas. Trobusardem te thau mandar te na joliavau fuga, ai te avau iek manush kai si les pacha ando ilo (Romanuria 12:2). Tsirha po tsirha shai parhudem murho traio, ai ando enero katar 1974, boldilem ai kerdilem marturo le Jehovasko.

Ai porme ke boldilem, trobusardem te parhuvau uni prame. Iek gies kana ningeravas o suato dikhlem ke iek manush lias mandar o radio anda e matora. Kana dikhlem prastaiem pala leste. Kana lavas te astarau les shudias o radio tele. Kana phendem le phralenge kai sas mantsa sar lem palpale o radio, iek phral baro pushlias mandar: “Te astardianas les, so sas te keres lesa?”. So pushlias mandar kerdias te dau po gor ke trobuvas te mai parhuvau uni prame anda murho traio.

Ando octubre katar 1974, astardem te dau anda murhi vriama te ningerau o suato le Devlesko. Davas iek shel chasuria po shon anda murhi vriama te sikavau pa e Biblia le manushen. La vriamasa akharde man te kerau buki ande central katar le marturia le Jehovaske ando Brooklyn (Nueva York). Ando 1978 amboldem ando Los Ángeles te arakhau ka murhi dei kai sas nasuali. Dui borsh mai angle, e Aarhonda ai me ansurisailiam. Voi azhutisardias man but zhi kai muli murhi dei. Porme akharde amen te zhas ande Escuela Bíblica de Galaad de la Watchtower. Kana getosardiam, trade amen ando Panamá te keras buki le Devleske, ai zhi agies sam kotse.

De kin boldilem, sas giesa ke nas mange vushoro te na jasarau e gogi ai te joliavau. Pala godo vareso kai kerau te na joliavau si, te zhautar vai thau mandar te lashavon le dieli ai te avel pacha. But manush ai murhi rhomni, thonpe veselime kana chi jasarau e gogi. Univar chi me nashtiu te pakiau so kerau. Zhanau ke chi parhudilem pala vareso kai me kerdem. Sas pala e zor kai si la Biblia te parhuvel le manushen (Zhiduvuria 4:12).

E Biblia sikadias man pala soste te traiu ai azhutisardias man te avau iek manush kai si les pacha ando ilo. Akana chi marau khanikas, numa azhutiu le manushen te prinzharen le Devles. Vi azhutisardem te sikiol pa e Biblia ka iek manush kai mai anglal chi ningeravas man mishto lesa. Porme ke boldilo, murho amigo ai me beshasas ande iek kher ai zhi agies sam amiguria. Zhi akana, murhi rhomni ai me azhutisardiam mai but de ojto var desh manush te kerdion marturia le Jehovaske.

Naisiu chachimasa ka o Jehova te del man iek traio veselime ai te zhanau pala soste traiu ai ke sim chache phralentsa.