Ο Γράμμας σο Μπουτσσάντιλο κο Εφέσιοι 5:1-33
5 Οτθάρ, τι μοιάζεν κο Ντεβέλ επειδή ισινέν λέσκε αγαπημέ τσσαβέ,
2 ντα συνεχίνεν τι σικαβέν αγάπη σαρ ο Χριστός. Βοβ μανγκλάς-αμέν* ντα ντινάς πι ζωή αμένγκε* σαρ θυσία σο κχάντελα μίσκι ι Ντεβλέσκε.
3 Μα κερέν ιτς λάφι ι λουμνιμάσκε* ντα κάθε πραγμάσκε σο ισί μαγαριμέ ή πραγματένγκε σο τθερένα τι κερέν ι μπίτσαλε γιακχάσαρ, σόσκε ανταλά πράγματα νανέ σωστά ι αγιόνγκε.
4 Ούτε ισί σωστά ο μπίλατζανε πράγματα, ο λάφια σο σικαβένα ότι να τθερένα γκοντί ή ο σακάδες λουμνικανέ λαφίντζαρ. Οκιά μπάνταρ, τι κερέν προσευχή για τι βακερέν ευχαριστώ κο Ντεβέλ.
5 Τζανένα ντα αγαβένα λατσσές ότι καέκ τζενό σο κερέλα λουμνιπέ* ή ισί μαγαριμέ ή τθερέλα μπίτσαλι γιακχ, σο ισί σαρ τι ντέλα λατρεία κο είδωλα, να κα νακχέλ κι Βασιλεία κι Χριστόσκι ντα κι Ντεβλέσκι.
6 Καέκ μα τι χουχαβέλ-τουμέν ψεύτικε λαφίντζαρ, σόσκε ιτιρί ασακέ πραγματένταρ αβέλα η μπαρί χολί ι Ντεβλέσκι οπράλ οντουλέντε σο να ντένα καν.
7 Οτθάρ, μα κερέν ο πράγματα σο κερένα βον,*
8 σόσκε ανγκλέ ισινένας κο καρανίκι, αλλά ακανά ισινέν κο φως επειδή ισινέν μαθητές ι Κυριόσκε. Τι τζουβντιόν σαρ τσσαβέ σο ισί κο φως,
9 σόσκε κατά φως αβέλα* κάθε πράγμας σο ισί λατσσό, δίκαιος ντα αληθινός.
10 Τι τθερέν πάντα τουμαρί γκοντί για τι αγαβέν άμα αβέλα ι Κυριόσκο γκι οντουλέντζαρ σο κερένα
11 ντα μα κερέν ο άχρηστα πράγματα σο ισί κο καρανίκι. Αλλά κερέν τι ντικχίντιβελ ότι ανταλά πράγματα ισί μπέτι.
12 Επειδή ο πράγματα σο κερένα βον αποτσοράλ ισί λατζ μπαρί ατζέ-ντα τι βακερέλ-λεν εκ τζενό.
13 Ο φως λέλα-πες οπράλ κατά πράγματα σο νανέ σωστά, ντα αντικάς ανταλά πράγματα ντικχίντιβενα.
14 Οτθάρ, η Γραφή βακερέλα : «Ίστι, τούι σο σοβέσα, ντα ίστι κατά μουλέ, ντα ο Χριστός κα λελ-πες σαρ φως οπρά-τούτε».
15 Οντουλέσκε, προσοχίνεν μπουτ σαρ πφιρένα, όχι σαρ τζενέ σο να τθερένα γκοντί, αλλά σαρ τζενέ σο ισί γκοντιαβέρ.
16 Χρησιμοποιήνεν τουμαρό χρόνος καζόμ πο λατσσές αβέλα-πες,* σόσκε τζουβντιάσα γκεραλέ* ντιβεσέντε.
17 Οτθάρ, τσσιναβέν τι αβέν τζενέ σο νανέ λογικοί αλλά τι αγαβέν σο ισί οντουβά σο μανγκέλα ο Ιεχωβά.*
18 Ντα μα ματιόν μολιάσαρ, σόσκε κα κερέλ-τουμέν τι κερέν μπουτ μπέτι πράγματα,* αλλά τι πφερντιόν άγιε πνευμάσαρ.
19 Κάνα κερένα λάφι ο εκ ι γιαβερέσαρ,* βακερέν ψαλμούς, γκιλιά σο ισαρένα ι Ντεβλές ντα πνευματικούς ύμνους. Γκιλιαβέν ι Ιεχωβάσκε* ντιπ αντράλ τουμαρέ γκίσταρ.
20 Ντα κο ναβ αμαρέ Κυριόσκο, ι Ιησού Χριστόσκο, κερέν πάντα προσευχή κο Ντεβέλ, σο ισί αμαρό Ντατ, για τι βακερέν λέσκε ευχαριστώ ι κάθε πραγμάσκε.
21 Τι ντεν καν ο εκ ι γιαβερές επειδή τθερένα μπαρό σεβασμός ι Χριστόσκε.
22 Ο τζουβλιά τι ντεν καν πουμαρέ ρομές σαρ ντένα καν ι Κυριός,
23 επειδή ο μουρς ισί ο σορό πι ρομνιάκο σαρ ο Χριστός-ντα ισί ο σορό ι κχανγκιριάκο, σόσκε ισί οντουβά σο σώνελα ανταβά σώμας.
24 Σαρ η κχανγκιρί ντέλα καν κο Χριστός, αντικάς ο τζουβλιά-ντα πρέπει τι ντεν καν πουμαρέ ρομές σαρέ κο πράγματα.
25 Μουρσάλεν, τι μανγκέν τουμαρέ ρομνίν, σαρ ο Χριστός-ντα μανγκλάς ι κχανγκιρί ντα ντινάς πι ζωή λάκε
26 για τι αγιάνελ-λα. Ανταβά αβιλό-πες κάνα κερντάς-λα πάκι ι Ντεβλέσκε λαφίσαρ, σο ισί σαρ τι τθοντάς-λα πανίσαρ,
27 για τι αβέλ η κχανγκιρί σουκάρ ανγκλά-λέστε, τι αβέλ άγια ντα μα τι τθερέλ καέκ σημάδι ντα καέκ ελάττωμας.
28 Αντικάς ο μουρσά-ντα πρέπει τι μανγκέν πουμαρέ ρομνίν, σαρ μανγκένα πουμαρό σώμας. Ο μουρς σο μανγκέλα πι ρομνιά μανγκέλα πο νεαυτός,
29 σόσκε καέκ να μισιντάς ποτές πο σώμας, αλλά αρακχαβέλα-λες ντα μανγκέλα-λες, σαρ ο Χριστός ι κχανγκιρί,
30 επειδή ισινάμ μέρη λέσκε σωμάσκε.
31 «Οντουλέσκε, ο τζενό κα μουκχέλ πι νταντές ντα πι νταγιά ντα κα ατσσόλ πασέ πι ρομνιάτε,* ντα ο ντούι κα αβέν εκ σώμας».
32 Κεράβα λάφι ανταλέ μπαρέ γκεραντέ πραγμάσκε* σο τθερέλα τι κερέλ ι Χριστόσαρ ντα ι κχανγκιριάσαρ.
33 Όμως, ο κάθε εκ τουμένταρ πρέπει τι μανγκέλ πι ρομνιά σαρ μανγκέλα πο νεαυτός, ντα η τζουβέλ πρέπει τι τθερέλ μπαρό σεβασμός πι ρομέσκε.
Υποσημειώσεις
^ Ή μπέκιμ «μανγκλάς-τουμέν».
^ Ή μπέκιμ «τουμένγκε».
^ Γιαβέρσοϊ «μα τθερέν καέκ μπουτί λέντζαρ».
^ Γιαβέρσοϊ «σόσκε ο καρπός σο αβέλα κατά φως ισί».
^ Κι Πουρανί Μπαλαμανί βακέρντιβελας «Κινέν ο βακίτι».
^ Γιαβέρσοϊ «μπίλατσσε, κακέ».
^ Γιαβέρσοϊ «τι κερέν πράγματα χωρίς όρια».
^ Ή μπέκιμ «αντρέ τουμέντε».
^ Γιαβέρσοϊ «κα αβέλ γιεκ πι ρομνιάσαρ».
^ Γιαβέρσοϊ «μπαρέ άγιε μυστικόσκε».
