Ο Γράμμας σο Μπουτσσάντιλο κο Εφέσιοι 4:1-32
4 Με, ο Παύλος, σο ισινόμ κι φυλακή αμαρέ Κυριόσκε, μολίναβα-τουμέν τι τζουβντιόν τροπόσαρ σο σικαβέλα ότι ο Ντεβέλ τραμπιντάς-τουμέν.
2 Τι αβέν πάντα ταπεινοί ντα κοβλέ γκίσκε, τι σικαβέν υπομονή ντα τι αντιχίνεν ο εκ ι γιαβερές μανγκιμάσαρ.
3 Ο άγιος πνεύμας ενωντάς-τουμέν. Οτθάρ, κερέν σο νακχέλα τουμαρέ βαστένταρ για τι τθερέν ειρήνη ο εκ ι γιαβερέσαρ ντα αντικάς τι ατσσόν ενωμέ.
4 Υπαρχίντιβελα εκ σώμας ντα εκ πνεύμας, αντικάς σαρ υπαρχίντιβελα εκ ελπίδα σο ντινάς-τουμέν βίκος ο Ντεβέλ τι λεν,
5 εκ Κύριος, εκ πίστη, εκ μπολντιπέ,
6 εκ Ντεβέλ ντα Ντατ σαριλένγκο, σο ισί οπράλ σαριλένταρ ντα αντράλ σαριλένταρ ντα σαριλέντε.
7 Κο κάθε εκ αμένταρ σικάντιλο μπαρό λατσσιπέ, ντα ο Χριστός ισινέ οντουβά σο ντινάς κο κάθε εκ αμένταρ ανταβά δώρος.
8 Η Γραφή βακερέλα: «Κάνα νικλιντάς οπρέ, ελευθερωντάς οντουλέν σο ισινέ φυλακισμέ ντα ντινάς τζενέν σαρ δώρα».
9 Σο μανγκέλα τι βακερέλ ο λάφι «νικλιντάς»; Ότι πο τζανγκλέ γουλίστιλο κι πφουβ.
10 Οντουβά σο γουλίστιλο, νικλιντάς μπουτ πο οπρέ κατά ουρανός-ντα, για τι κερέλ τι νικιόν μπαγιά σαρέ ο πράγματα.
11 Ντα ντινάς μερικέ τζενέν για τι αβέν απόστολοι, γιαβερέν για τι αβέν προφήτες, γιαβερέν για τι μουτθαβέν ο λατσσέ αμπέρια, γιαβερέν για τι αβέν τσομπάνια ντα δάσκαλοι,
12 για τι διορθώνεν ι αγιόν, για τι υπηρετίνεν ι γιαβερέν ντα για τι λελ ζορ ι Χριστόσκο σώμας.*
13 Ντα κα κερέν-λες ανταβά μέχρι σαρέ αμέν τι αβάς ενωμέ κι πίστη ντα τι σικλιάς ντιπ λατσσές ι Ντεβλέσκε Τσσαβέσκε, ντα αντικάς τι αβάς ντιπ ώριμα μουρσά σαρ ο Χριστός.
14 Οτθάρ, μα τι αβάς χουρντέ τσσαβέ, σόσκε ο τζενό σο κερέλα ο ψεύτικα πράγματα σο σικλιαρένα οντουλά σο χουχαβένα ι γιαβερέν ισί σαρ εκ βάρκα κι ντεριάβ σο γκερένα-λα ο κύματα ντα η μπαρμπάλ εκ ακατάρ εκ οκουτάρ.
15 Αλλά τι βακεράς ι αλήθεια ντα τι σικαβάς αγάπη, ντα αντικάς κα μπορίνας τι αβάς ώριμοι σαρέ κο πράγματα για τι τζουβντιάς σαρ μανγκέλα ο Χριστός σο ισί ο σορό.
16 Βοβ κερέλα σαρό ο σώμας τι αβέλ λατσσές ενωμέ, ντα κάθε μέρος βοηθίνελα ο γιαβέρ τι ντελ κο σώμας οντουβά σο χρειαζίντιβελα. Κάνα ο κάθε μέρος κερέλα πι μπουτί σωστά, βοηθίνελα τι μπαριόλ ο σώμας για τι λελ ζορ ο σώμας μανγκιμάσαρ.
17 Οτθάρ, κεράβα λάφι κο ναβ κι Κυριόσκο ντα βακεράβα τουμένγκε ότι δεν πρέπει τι τζουβντιόν σαρ ο τζενέ σο ισί γιαβερέ τθεμένταρ, σόσκε βον τθερένα πουμαρί γκοντί πραγματέντε σο να τθερένα αξία.
18 Βον* ισί κο καρανίκι, ντουρ κατά ζωή σο αβέλα κατά Ντεβέλ, σόσκε να μανγκένα τι σικλιόν ι Ντεβλέσκε ντα λένγκο γκι να αγαβέλα.
19 Ακανά να τζανένα ιτς σο ισί λατσσό ντα σο γκεραλό* ντα μουκχλέ πουμαρό νεαυτός κο μπίλατζανε πράγματα* για τι κερέν μπίτσαλε γιακχάσαρ σο-ντα μαγαριπέ ισί.
20 Τουμέν όμως να σικλιλέν ότι ο Χριστός ισί αντικάς.
21 Βοβ σικλιαρντάς σο ισί αλήθεια, ντα άμα ασουντέν ντα σικλιλέν λέσταρ, τζανένα-λεν μπουτ λατσσές ανταλά πράγματα.
22 Σικλιλέν ότι πρέπει τι νικαβέν οπρά-τουμένταρ ο πουρανό χαρακτήρας, σο ισί τουμαρί πουρανί ζωή, σόσκε ανταβά πουρανό χαρακτήρας καζόμ τζάλα αβέλα πο μπέτι ιτιρί κατά μπέτι πράγματα σο μανγκένα ντα σο χουχαβένα-τουμέν.
23 Πρέπει τι συνεχίνεν τι αλλάνεν για τι τθερέν εκ νεβό τρόπος σκέψης*
24 ντα πρέπει τι ιρίν ο νεβό χαρακτήρας σο λατσσάρντιλο αντικάς σαρ μανγκέλα ο Ντεβέλ ντα σο βασίντιβελα κι αληθινή δικαιοσύνη ντα κι αφοσίωση.
25 Οτθάρ, ακανά σο τσσιναντέν τι χουχαβέν ι γιαβερέν, ο κάθε εκ τι βακερέλ ι αλήθεια κο γιαβέρ,* σόσκε ο κάθε εκ ισί εκ μέρος ι σωμάσκο σο να κερέλα ο εκ μπι ι γιαβερέσκο.
26 Τι χολιάνεν, αλλά μα τι αμαρτίνεν. Τι νασκιαρέν τουμαρί χολί πριν τι περέλ ο κχαμ.
27 Μα ντεν κο Μπενγκ ευκαιρία τι επηρεάνελ-τουμέν.*
28 Οντουβά σο τσορέλα τι τσσιναβέλ τι τσορέλ, αλλά τι αβέλ μπουτιαρνό ντα τι κερέλ λατσσές πι μπουτί πι βαστέντζαρ, για τι τθερέλ τι ντελ οντουλέστε σο τθερέλα ανάγκη.
29 Κερνό λάφι μα τι νικιόλ τουμαρέ μόσταρ, αλλά σάντε λατσσό λάφι σο ντέλα ζορ ι γιαβερέν, για τι κερέλ λατσσιπέ οντουλένγκε σο ασουνένα.
30 Ντα μα στεναχωρίνεν ο άγιος πνεύμας ι Ντεβλέσκο, σόσκε ο Ντεβέλ τσσουντάς πι σφραγίδα οπρά-τουμέντε αντράλ πι πνευμάσταρ μέχρι κο ντιβές σο κα ελευθερώντιβεν αντράλ κατά λύτρος.
31 Νασκιαρέν τουμένταρ σο-ντα κερκιπέ τθερένα κο γκι, ι μπαρί χολί, ο βίκος, ο μπέτι λάφια* ντα σαρέ ο γκεραλέ πράγματα.
32 Αλλά τι σικαβέν λατσσιπέ ο εκ κο γιαβέρ, τι αγαβέν ο εκ ι γιαβερέσκι ντουκχ ντα τι συγχωρίνεν ο εκ ι γιαβερές σαρέ τουμαρέ γκίσαρ σαρ συγχωριντάς-τουμέν σαρέ πι γκίσαρ ο Ντεβέλ αντράλ κατά Χριστός.
Υποσημειώσεις
^ Ισί η Χριστιανική κχανγκιρί.
^ Κι Πουρανί Μπαλαμανί βακέρντιβελας «Λένγκι γκοντί».
^ Γιαβέρσοϊ «μπίλατσσο, κακός».
^ Κι Πουρανί Μπαλαμανί ισινέ ο λάφι «ο πνεύμας τουμαρέ γκοντιάκο».
^ Κι Πουρανί Μπαλαμανί βακέρντιβελας «ι τζενέσαρ σο ισί πασέ λέστε». Ανταβά λάφι να μανγκέλας τι σικαβέλ σάντε οντουλέν σο μπεσένας πασέ εκχέ τζενέστε, αλλά ι κάθε τζενές.
^ Γιαβέρσοϊ «Μα μουκχέν τθαν ι Μπενγκέσκε».
^ Ασακέ λάφια προσβαλίνενα ι γιαβερέν ή χαλαβένα ι γιαβερένγκο ναβ, κερένα λένγκε ζιάνι.
