Da li hem tu mislineja soj tano avdije but pharo te đana soj tano o ćaćipe, a soj tano o hovajbe? Avdije, upro manuša pobuter utičinena o emocije hem o lično razmislibe nego odova soj tano ćaće. Ko poslednjo vreme, o lafi „post-ćaćipe“ ulo but popularno a. Odova lafi opisini so ko celo sveto but manuša mislinena so nigde nane ćaćipe.

 Odova nane ništa nevo. Angleder 2 000 berš o rimsko namesnik, o Pontije Pilat, pućlja e Isuse: „Soj tano o ćaćipe?“ (Jovan 18:38). Iako o Pilat na ađićerđa o Isus te odgovorini lese, oleso pućibe hine važno. I Biblija šaj te pomožini amenđe te đana soj tano o ćaćipe, a soj tano o hovajbe ko akava sveto kuri tane o manuša zbunime.

Da li ćaće postojini o ćaćipe?

 Ja. I Biblija koristini o lafi „ćaćipe“ te bi mothovi soj tano ćaće hem soj tano moralno ispravno. Oj sikavi amen so o ćaćipe avela ando Jehova b hem phenela so ov tano „o [Devel] ando ćaćipe“ (Psalam 31:5). Ki Biblija pisini o ćaćipe kotar Devel hem odova ćaćipe tano sar svetlost koja pomožini amenđe ko akava rumimo sveto (Psalam 43:3; Jovan 17:17).

Sar šaj te arakhe o ćaćipe?

 O Devel na mangela te prihvatina o ćaćipe andi Biblija bizo te koristina amari godi. Umesto odova, ov phenela amenđe te roda dokazija, a na te mukha te legaren amen amare osećanja (Rimljanima 12:1). Ov mangela te penđara le hem te manga le „celona gođaja“ hem podstaknini amen te uverina amen so odova so sikljovaja andi Biblija tano ćaće (Matej 22:37, 38; Dela apostolska 17:11).

Kastar alo o hovajbe?

 I Biblija phenela so o hovajbe alo ando Devleso dušmani, o Satana o Beng, aso kova i Biblija phenela soj tano „o dad ando hovajbe“ (Jovan 8:44). Ov e prvone manušenđe vaćerđa hovajba kotar Devel (Postanak 3:1-6, 13, 17-19; 5:5). Kotar tegani, o Satana hem ponodri širini o hovajba ando Devel hem garavi o ćaćipe olestar (Otkrivenje 12:9).

Sose tano o hovajbe normalno avdije?

 Ko amaro vreme, kova ki Biblija vićini pe „poslednja dive“, o Beng pobuter nego iked angleder utičini upro manuša hem hovavi len. Avdije, but putija o manuša hovavena te bi iskoristinena averen (2. Timoteju 3:1, 13). Isto ađahar, but religije avdije hovavena. Sar so i Biblija vaćeri ando amaro vreme, o manuša „ka roden učiteljen kola ka vaćeren lenđe okova so mangena te šunen“ hem više „na ka mangen te šunen o ćaćipe“ (2. Timoteju 4:3, 4).

Sose tano o ćaćipe važno?

 Ako mangaja te verujina jekh jekhese, važno tano te vaćera o ćaćipe. Ako nane amen poverenje upro nekaste, našti te ova amala. I Biblija phenela so o Devel mangela te penđara o ćaćipe te šaj te služina olese. Koro late pisini: „Okola kola služinena [e Devlese] mora te služinen lese e duhoja hem e ćaćipaja“ (Jovan 4:24). Ako mangeja te sikljove sar o ćaćipe andi Biblija šaj te pomožini tuće te penđare o hovavne sikljoviba hem sar šaj te oslobodine tut olendar, čitin o člankija andi Stražarsko kula „Da li je Boga teško voleti?“

Sose o Devel mangela te đana o ćaćipe?

 O Devel mangela večno te živina. Odolese tano važno te sikljova o ćaćipe olestar (1. Timoteju 2:4). Ako sikljoveja soj tano ispravno, a soj tano pogrešno anglo Devlese jaćha hem ako ićereja tut ko odova, tu ka ove paše amal oleja (Psalam 15:1, 2). O Devel bićhalđa e Isuse ki phuv te bi sikavi e manušen ando ćaćipe. Ov mangela te ićera amen ko Isusese sikljoviba (Matej 17:5; Jovan 18:37).

Da li o Devel iked ka cidel o hovajbe?

 Ja. O Devel mrzini ked o manuša hovavena hem iskoristinena jekh jekhe. Ov obećinđa so ka uništini sa okolen so hovavena (Psalam 5:6). Ked ka ćerel odova, tegani ka ispuninen pe akala lafija: „O muj kova vaćeri o ćaćipe ka aćhol zauvek“ (Poslovice 12:19).