• „Osetinđum man samći mo rom uvek iznova ćerela preljuba.“

• „Osetinđum man ponizimi, so na hijum privlačno hem so ništa na vredinava.“

• „Nikasa našti hine te vaćerav odolestar. Odolese, patinđum kokri.“

• „Osetinđum man ka phene o Jehova na brinini pe mandar.“

Akala lafija mothovena kobor jekha romnjaće tano pharo ked olako rom dikhela pornografija. Ako odova ćerela garavindoj, šaj masekoncar ja beršencar, oj šaj te osetini pe so našti više te verujini lese. Jekh romni phenđa: „Pućava man: ’Koj tano akava manuš uzo mande? Da li isi pana diso so garavi mandar?‘“

Akava članko tano ćerdo e romnjaće kaso rom dikhela pornografija. a Ka oven razmotrime disave biblijake načelija kola ka utešinen la, ka uverinen la so o Jehova tano uzo late hem ka pomožinen la te ovel la mir hem te aćhol paše e Jehovaja. b

Iako našti te kontrolišine sa so to rom ćerela, ipak šaj te ćere diso te šaj te ovel tut mir. Akana ka dikha so šaj te ćere.

Ma krivin kokri tut. Jekh romni šaj te mislini so olako rom dikhela pornografija odolese so oj ćerela diso pogrešno. I Alis c mislinđa so nane dovoljno šukar hem šuži. Oj pućlja pe: „Sose me rome interesujinena avera romnja, a na me?“ Disave romnja krivinena kokri pes sebepi odova sar reagujinena sose mislinena so ađahar ćerena i situacija te ovel pana pološno. I Danijela phenela: „Odolese so mo rom nastavinđa te dikhel pornografija, hijum le but holjami. Mislinđum so mi holi uništini amaro brako.“

Ako hem tu ađahar osetineja tut, ov sigurno so anglo Jehova tu na hijan odgovorno aso odova so to rom ćerela. Ki Jakovljeva 1:14 pisini: „Svakone iskušini olesi želja ađahar so cidela le hem hovavi le“ (Rimlj. 14:12; Fil. 2:12).  O Jehova na krivini tut, već but cenini odova so hijan lese verno (2. Let. 16:9).

Jekh romni šaj te mislini so olako rom dikhela pornografija odolese so oj nane dovoljno šukar hem šuži. Ama, odova nane tačno. O stručnjakija phenena so i pornografija ćhivela e manuše te ovel le seksualna želje kola nijekh đuvli našti te zadovoljini.

Ma brinin tut previše. I Ketrin phenela so našti hine andi godi te ikalji odova so olako rom dikhela pornografija. I Fransis phenela: „Uznemirinava man svako puti ked na đanava kaj tano mo rom. Celo dive hijum but nervozno.“ Disave romnja phenena kobor hine lenđe neprijatno ked hine e phralencar hem e phenjencar kola šaj đanena olenge romengo problemi. A avera phenđe so hine usamljena odolese so mislinđe so niko na haljola olengi situacija.

Asavke osećanja tane normalna. Ama, ako but vreme razmislineja ando akala buća, ka ove pana poviše zabrinuto. Umesto odova, de sa tutar te zorjaćere to amalipe e Jehovaja. Odova ka pomožini tuće te istrajine (Ps. 62:2; Ef. 6:10).

Šaj but te pomožini tuće ako ka čitine o izveštaja andi Biblija kola vaćerena ando romnja kola hine len pharipa. On molinđe pe e Jehovase hem ov utešinđa len. Ov na cidinđa uvek olenge problemija, ama dinđa len mir. Na primer, i Ana „hine la bari dukh ko vilo“ sebepi pi situacija. Ama, palo odova so „dugo molinđa pe e Jehovase“, oj hine la mir, iako na đanđa so ka ovel ko krajo (1. Sam. 1:10, 12, 18; 2. Kor. 1:3, 4).

Rode pomoć ando starešine. On šaj te oven „sar zaklon andi bavlal, sar zaklon andi oluja“ (Is. 32:2). On šaj čak te predložinen tuće jekha pouzdano phenja kolaja šaj te vaćere hem koja šaj te utešini tut (Posl. 17:17).

Da li tu šaj te pomožine te romese te ćhinavi te dikhel pornografija? Možda. I Biblija phenela so ked valjani te rešini pe disavo problemi ili te pobedini pe disavo moćno dušmani „pošukar tano dujenđe nego jekhese“ (Prop. 4:9-12). O stručnjakija phenena so isi pošukar rezultatija ked o rom hem i romni zajedno ćerena ko odova o rom te pobedini pi zavisnost andi pornografija, a i romni te obnovini po poverenje upro leste.

 Naravno, but ka zavisini odolestar da li o bračno drug tano spremno hem odlučno te ćhinavi te dikhel pornografija. Da li usrdno molinđa pe e Jehovase hem da li rodinđa pomoć ando starešine? (2. Kor. 4:7; Jak. 5:14, 15). Da li ćerđa pese plan kova ka pomožini lese te na dikhel više pornografija? Na primer, da li ćhivđa pese ograničenja kobor ka koristini o elektronska uređaja hem da li izbegini o iskušavajuća situacije? (Posl. 27:12). Da li tano spremno te prihvatini ti pomoć hem da li tano potpuno iskreno tuvaja? Ako ja, tegani ka šaj te pomožine lese.

Sar? Te dikha jekh primer. I Feliša ženinđa pe e Itaneja kova ulo zavisno andi pornografija ked hine terno. Oj hine strpljivo oleja hem uvek hine spremno te šunel le. Odolese, ked god bi ovela le želja te dikhel pornografija, olese hine lokho te vaćeri olaja. O Itan phenela: „Me iskreno hem phravdo vaćerđum me romnjaja. Oj pomožini maje te cidav man ando iskušenja hem uvek pućela man sar đala maje. Mi romni pomožini man te pazinav kobor hem kaj ka koristinav o internet.“ Naravno, e Felišaće tano pharo so o Itan mangela te dikhel pornografija. Oj phenela: „Mi dukh hem mi holi na pomožini lese te borini pe protiv akija lošno navika. Palo odova so vaćerđam kobor tano olese pharo, vaćerđum lese sar me osetinava man hem ov hine pana pobuter odlučno te cidel pe andi pornografija te ne bi povredini man.“

Asavke razgovorija na samo so šaj te pomožinen e romese te cidel pe andi pornografija, već šaj hem e romnjaće te pomožinen palem te verujini lese. Ako o rom vaćeri pe romnjaće kaj đala, so ćerela hem sovaja borini pe, oj na ka sumnjini upro leste sose ov više ništa na garavi olatar.

Da li verujineja so hem tu šaj te pomožine te romese ko slično način? Ako ja, sose ne bi čitinena akava članko zajedno? Palo odova, te romeso cilj valjani te ovel te ćhinavi te dikhel pornografija hem te del tut razlog palem te verujine lese. Umesto te holjani upro tute sose mangeja te vaćere ando akava problemi, ov valjani te trudini pe te haljol sar osetineja tut sebepi odova. Tu valjani te pomožine lese te ćhinavi odija navika hem te de le prilika palem te zaslužini to poverenje. But tano važno o solduj te haljon so ćhivela e manušen te dikhen pornografija hem sar šaj te pobedini pe odova problemi. d

Ako mislineja so tu hem to rom ka svađinen  tumen ked ka počminen te vaćeren ando akava problemi, razmislinen odolestar te vićinen jekhe starešina koleja hijen slobodna te ovel othe đi tumen vaćerena. Ov svesno so čak hem palo odova so to bračno drug ćhinavđa te dikhel pornografija, ka valjani te nakhel but vreme đi palem ka počmine te verujine lese. Ma odustajin sigate. Razmislin kotar tikne šuže buća kola isi ko tumaro brako. Ma našal ti nada so ako solduj hijen strpljiva tumaro brako palem ka ovel zoralo (Prop. 7:8; 1. Kor. 13:4).

Ako to rom palem dikhela pornografija, palo odova so jekh vreme ćhinavđa, da li odova značini so našti niked te ćhinavi odija navika? Na obavezno. Šaj ka valjani celo životi te borini pe protiv odija navika, posebno ako tano zavisno olatar. Šaj hem palo but berša palem te počmini te dikhel pornografija. Te ne bi odova desini pe, ov ka valjani pana pobuter te pazini sar koristini o elektronska uređaja hem te cidel pe ando iskušavajuća situacije čak hem palo odova so ćhinavđa odija navika (Posl. 28:14; Mat. 5:29; 1. Kor. 10:12). Ov ka valjani te menini o način sar razmislini hem te sikljol te „[mrzini] odova soj tano lošno“ sar soj tani i pornografija hem avera nečista navike, sar na primer i masturbacija (Ef. 4:23; Ps. 97:10; Rimlj. 12:9). Da li tano spremno te ćerel odova? Ako ja, verovatno ka šaj potpuno te ćhinavi odija navika. e

So ako to bračno drug na mangela te rešini akava problemi? Naravno, šaj te ove razočarimi, holjami hem prevarimi. Forde te brige ko Jehova, ov ka pomožini tuće te ovel tut mir (1. Petr. 5:7). Hem ponodri ov paše e Jehovaja ađahar so ka proučine, hor ka razmisline hem ka moline tut. Ako ćereja odova, ov sigurno so hem ov ka ovel popaše tuvaja. Sar so pisini ko Isaija 57:15, ov tano uzo okola kola tane „phage vileja hem kola tane obeshrabrime“ hem mangela te pomožini lenđe palem te oven bahtale. De sa tutar hem ponodri verno te služine e Jehovase. Rode pomoć kotar starešine. Ma našal ti nada so to rom jekh dive ka menini pe (Rimlj. 2:4; 2. Petr. 3:9).