Sar šaj te prilagodine tut ki nevi skupština?
DA LI nekad selinđan tut ki nevi skupština? Ako ja, sigurno složineja tut odoleja so phenđa o Žan Šarlo. Ov phenela: „Osim so valjani te prilagodine tut ki nevi skupština, ko isto vreme valjani te brinine tut odolestar sare ki ti porodica te aćhon paše e Jehovaja.“ Šaj ka ovel tuće pharo te arakhe nevi buti, stan hem nevi škola e ćhavenđe. Isto ađahar, šaj uduri o vreme, i kultura ili o manuša ko tereni tane averćhane.
O Nikola hem i Selin hine len jekh aver problemi. On prihvatinđe o zadatko kova dinđa len i francusko podružnica te selinen pe ki nevi skupština. On phenena: „Ki početka hine amenđe sa šukar. Ama, sar đelo o vreme, počminđe te nedostajinen amenđe amare amala. Na hijam le dovoljno paše e phralencar hem e phenjencar ki nevi skupština.“ a Ked selinaja amen ki nevi skupština, so šaj te ćera te šaj te ova bahtale? Sar šaj avera te pomožinen amen? Sar šaj jekh jekhe te ohrabrina? Akana ka dikha.
ŠTAR NAČELIJA KOLA ŠAJ TE POMOŽINEN TUT
Oslonin tut upro Jehova
1. Oslonin tut upro Jehova (Ps. 37:5). I Kazumi andi Japan, valjanđa te aćhavi i skupština ki koja hine 20 berš odolese so olako rom dobinđa buti ki aver diz. Sar mothovđa so oslonini pe upro Jehova? Oj phenela: „Ked hijum le usamljeno ili uznemirimi, phravđum mo vilo e Jehovase. Svako puti ked ćerđum odova osetinđum so dobinava snaga koja maje potrebno.“
Sar šaj te ovel amen pana pobaro pouzdanje upro Jehova? Sar so jekha luluđaće valjani pani hem hranljiva sastojkija te šaj te barjol, ađahar asi amari vera valjani simbolično pani hem hranljiva sastojkija te šaj te ovel zorali. O Nikola, kole angleder pominđam, razmislini ando primerija sar soj tane o Avraham, o Isus hem o Pavle kola ćerđe bare žrtve te šaj te ćeren e Devlesi volja. Odova zorjaćeri oleso poverenje so hem olese o Jehova ka pomožini. Ako hem amen redovno proučinaja e Devleso Lafi, odova ka pomožini amen te prihvatina bilo koja promena ko amaro životi hem ka sikljova but buća kolencar šaj te ohrabrina averen ki nevi skupština.
Ma uporedin i nevi hem i purani skupština
2. Ma uporedin i nevi hem i purani skupština (Prop. 7:10). O Žil valjanđa te prilagodini pe ki aver kultura ked ando Benin selinđa pe ki Amerika. Ov phenela: „Hine man osećaj so valjanđum averenđe te vaćerav sa mandar.“ Odolese so na hine siklo ko odova, počminđa te cidel pe ando phralja hem phenja. Ama, ked pošukar upoznajinđa len, ov osetinđa pe averćhane. Ov pana phenela: „Verujinava so bizo obzir kaj te živina sa o manuša tane ista, on samo izrazinena pe ko aver način. Valjani te prihvatina e manušen asavke save tane.“ Odolese, ma uporedin i nevi skupština hem i purani. Jekh pionirka koja vićini pe An Liz phenđa: „Na selinđum man te arakhav odova so aćhavđum nego te sikljovav disave neve buća.“
Isto ađahar, o starešine na valjani te uporedinen i nevi skupština hem i purani. Samo sose o phralja ki nevi skupština ćerena o buća ko jekh aver način na značini so on ćerena o buća pogrešno. Mudro tano prvo te haljoven sar funkcionišinena o buća ki odija sredina angleder so ka den disavo predlog (Prop. 3:1, 7b). Pošukar tano te sikaven e phralen tumare primereja umesto te ćhiven len te mislinen sar tumende (2. Kor. 1:24).
Ov aktivno ki skupština
3. Ov aktivno ki skupština (Fil. 1:27). Ked neko selini pe, odova lela but vreme hem snaga. Ama, andi početka tano but važno te đa redovno ko sastankija, ako šaj uživo. Ako o phralja niked na dikhena tut ki skupština ja retko dikhena tut, on našti te pomožinen tut. I Lusinda koja pe duje ćhajencar selinđa pe ki jekh bari diz ki Južno Afrika phenela: „Amare amala dinđe amen savet te ova paše e phralencar hem e phenjencar ki amari nevi skupština, te đa olencar ki služba hem te ova redovna ko sastankija. Isto ađahar, phenđam e phralenđe so šaj ko amaro ćher te ićeren o sastankija asi služba.“
Ked sarađujineja e phralencar hem e phenjencar, odova ka zorjaćeri tut hem averen. I An Liz, kolatar angleder vaćerđam, phenela so o starešine ohrabrinđe la te đal ki služba sarinencar andi skupština. So hine sebepi odova? Oj phenela: „Odova hine but šukar način te osetinav man so hijum deo andi skupština.“ Isto ađahar, ked ćhiveja tut ko raspolaganje te čistine hem te održine i dvorana, odova ka mothovi e phralenđe hem e phenjenđe so odija skupština ulji ti skupština. So pobuter hijan aktivno ki skupština, o phralja hem o phenja posig ka prihvatinen tut hem ka osetine soj tane ti porodica.
Arakh tuće neve amalen
4. Arakh tuće neve amalen (2 Kor. 6:11-13). Ako o manuša osetinena so brinineja tut olendar, ka ovel tuće polokho te ove olengo amal. Odolese, ava angleder o sastanak hem aćhov palo sastanak te šaj te vaćere e phralencar hem te upoznajine len. Trudin tut te pamtine olenge anava. Ako ađahar ćereja, o manuša ka mangen te upoznajinen tut hem te oven te amala.
Umesto te ćere tut averćhane ando odova savo hijan te šaj o manuša te prihvatinen tut, mukh e phralen hem e phenjen te upoznajinen tut asavko savo ćaće hijan. I Lusinda ćerđa odova hem aće so phenela: „Amen hine amen šukar amala kotar skupština odolese so amen prva vićinđam len te aven koro amende.“
„PRIHVATINEN JEKH JEKHE“
Nekase nane lokho te avel ki dvorana odolese so nikas na đanela. Sar šaj te pomožina e nevenđe ki skupština? O apostol Pavle phenđa: „Prihvatinen jekh jekhe, sar o Hrist so celone vileja prihvatinđa tumen“ (Rimlj. 15:7). O starešine šaj te pomožinen e nevenđe ađahar so ka oponašinen e Isuse (Dikh o okvir „ So ka pomožini tut ked selineja tut?“). Ama, sare ki skupština čak hem o ćhavore, šaj te pomožinen e nevenđe te osetinen pe šukar.
Uzo odova so ka vićina len ko gostija, e nevenđe šaj te pomožina hem ađahar so ka ćera diso konkretno olenđe. Na primer, jekh phen na hine la but vreme, ama ipak posvetinđa vreme jekha phenjaće koja samo so selinđa pe. Oj legarđa la te dikhel i diz hem objasninđa laće sar te koristini o autobusija. Odova oduševinđa e neve phenja hem pomožinđa laće te prilagodini pe.
PRILIKA DUHOVNO TE NAPREDUJINEN
Jekh skakavco angleder te letini valjani nekobor putija te menini pi koža. Isto ađahar, ked selinaja amen ki nevi skupština amen valjani te cida amendar sa so ćhinavi amen te letina ko simbolično smisao ki služba e Jehovase. O Nikola hem i Selin phenena: „O preseljenje tano but šukar škola. Te šaj te prilagodine tut ko neve manuša hem thana, tu valjani te barjaćere disave osobine.“ O Žan Šarl, kolestar vaćerđam ki početka, vaćeri kobor olese porodicaće značinđa o preseljenje. Ov phenela: „Akija promena pomožinđa me ćhavenđe te cvetonen ki nevi skupština. Palo nekobor masek, mi ćhaj počminđa te oven la učenička zadatkija, a mo ćhavo ulo nekršteno objavitelj.“
Ama, so ako našti te seline tut uduri kaj tani pobari potreba aso objaviteljija? Pa, tegani šaj te ćere diso ki ti skupština ađahar so ka primenine o predlogija kola tane dinde ko akava članko. Oslonin tut upro Jehova hem so pobuter sarađujin e skupštinaja ađahar so ka đa ki služba sarinencar, ka arakhe tuće neve amalen hem ka ove pošukar amal okolencar kolen već đaneja. Isto ađahar, šaj te pomožine e nevenđe ki skupština ja okolenđe kase valjani pomoć. Sebepi soj tano o mangipe znak so hijam prava hrišćanija, odova ka pomožini tuće duhovno te napredujine (Jov. 13:35). Ov sigurno so asavke žrtvencar ka ugodine e Devlese (Jevr. 13:16).
Iako hine lenđe pharo, but phralja hem phenja uspinđe te oven bahtale ki nevi skupština. Odova šaj hem tu! I An Liz phenela: „Odova so meninđum i skupština pomožinđa man te ovel man pana pobaro mangipe.“ I Kazumi tani akana uverimi so ked neko selini pe, ov šaj te dikhel e Jehovaso vas ko po životi sar niked angleder. So mislini o Žil? Ov phenela: „Me amala pomožinđe man te osetinav man so samći hijum ćhere. Akana osetinava man so hijum deo andi mi nevi skupština hem ka ovel maje pharo ako ka valjani jekh dive te đav.“
a Okolenđe kase tano pharo te prilagodinen pe šaj te pomožini o članko „Suočavanje s nostalgijom u Božjoj službi“ ki Stražarsko kula ando 15. maj 1994. berš.
