O Isus spasinđa e verno manušen ađahar so dinđa po životi sar otkupno žrtva (Matej 20:28). Odolese, i Biblija phenela so o Isus „spasini o sveto“ (1. Jovanova 4:14). Ko Devleso Lafi pana pisini: „Nane niko aver ko šaj te spasini amen, niti talo nebo isi aver anav kova tano dindo e manušenđe kova šaj te spasini amen“ (Dela apostolska 4:12).

 O Isus „probinđa o meribe svakonese“ kova mothovi vera ano oleste (Jevrejima 2:9; Jovan 3:16). Palo odova, „o Devel uskrsninđa le ando mule“ hem o Isus irinđa pe upre ko nebo sar anđeo (Dela apostolska 3:15). Odolese, o Isus „šaj potpuno te spasini okolen kola molinena pe e Devlese ko oleso anav, sose uvek tano đivdo te molini e Devle te pomožini lenđe“ (Jevrejima 7:25).

Sose o Isus valjani te molini amenđe?

 Sare amen hijam grešna (Rimljanima 3:23). O greh odvojini amen ando Devel hem legari amen ko meribe (Rimljanima 6:23). O Isus pomožini okolenđe kola mothovena vera ki olesi otkupno žrtva (1. Jovanova 2:1). Ov molini e Devle te šunel amare molitve hem te oprostini amare grehija sebepi amari vera ki otkupno žrtva (Matej 1:21; Rimljanima 8:34). O Devel šunela e Isusese molbe sose tane premali olesi volja. Ov bićhalđa le ki phuv „te šaj o sveto te spasini pe prekalo oleste“ (Jovan 3:17).

Da li tano dovoljno te verujina ko Isus te šaj te ova spasime?

 Na. Iako valjani te verujina ko Isus te šaj te ova spasime, odova nane dovoljno (Dela apostolska 16:30, 31). I Biblija phenela: „Sar soj tano o telo bizo duh mulo, ađahar hem i vera bizo delija tani muli“ (Jakovljeva 2:26). So valjani te ćera te bi ovaja spasime?

•   Penđar pošukar e Isuse hem olese Dade, e Jehova (Jovan 17:3).

•   Barjaćer ti vera koro lende (Jovan 12:44; 14:1).

•   Mothov ti vera ađahar so ka ove poslušno (Luka 6:46; 1. Jovanova 2:17). O Isus phenđa so na ka oven spasime sare kola vićinena le „Gospode“, nego samo „okola so ćerena odova soj tano premali olese Dadesi volja kova tano ko nebesija“ (Matej 7:21).

•   Aćhov verno iako isi tut pharipa. O Isus phenđa: „Ko istrajini đi o krajo, ka ovel spasimo“ (Matej 24:13).