Keda kerela pe lafi bašo parujbe, amen keraja adava sar so sikavela amen e Devleskoro Lafi, a adala sikljojba tane:

•   Normalno tano te žalina keda merela amendar nekoj so mangaja le. E Isuseskere učenikija rovgje keda mulo nekoj taro lengere mangle (Jovan 11:33-35, 38; Dela 8:2; 9:39). Isto agjaar, amen na dikhaja ko parujbe sar vreme keda šaj te veselina amen (Propovednik 3:1, 4; 7:1-4). Amen ko adava dikhaja sar vreme keda šaj te sikava kaj haljovaja e manušen soj dukhavde (Rimjanite 12:15).

•   O mule na džanena ništo. Bizi razlika taro kova than ili kultura avaja na keraja adetija kola so na temelinela pe ko e Devleskoro Lafi, kaj i duša e muleskiri ponadari da živinela ili kaj šaj te keren nešto e manušenge soj dživde (Propovednik 9:5, 6, 10). Nesave taro adala adetija tane te arakhen e mulen, te ulaven hajbe e mulenge, te den žrtva e mulenge, te keren lafi e mulencar hem te ikeren kalo. Amen na keraja adala adetija, adaleske so mangaja te šuna adava so vakerela amenge o Devel: „Odvojnen tumen... hem poviše ma pipinen ništo soj melalo“ (2. Korinkjanite 6:17).

•   Isi nadež e mulenge. I Biblija vakerela amenge kaj o mule palem ka živinen hem kaj ka avel vreme keda nane te ovel više meribe (Dela 24:15; Otkrovenie 21:4). Akaja nadež dela amen sila keda merela amendar nekoj, isto sar so dengja sila e hristijanenge ko prvo veko (1. Solunjanite 4:13).

•   Amen valjani te ova skromna (Izreki 11:2). Keda parunela pe nekas amen na mangaja te sikava amen anglo javera hem na mangaja te dikhjol kobor siem barvale (1. Jovanovo 2:16). Adaleske, na organizirinaja barvalo parujbe te šaj te vooduševina e javeren, na primer, te kina skupa sandukija ili javera skupa bukja parujbaske.

•   Na terinaja e javeren te dikhen ko parujbe sar amen so dikhaja. Amen ikeraja amen ko adava so vakerela i Biblija: „Sekoj amendar ka odgovorinel korkori peske anglo Devel“ (Rimjanite 14:12). Ama ako isi amen prilika bašo adava, amen ka da sa amendar te vakera ko so verujnaja, ama adava ka kera le šukaripaja hem ka sikava hor poštovanje (1. Petrovo 3:15).

 Than: O parujbe kerela pe ko grobija, a ko nesave phuvja ikerela pe govor angleder o parujbe. Adava šaj te ovel ko kova bilo than kote so ka mangel i familija, sar soj tano ki dvorana, ki kapela, khere ili ko grobija.

 Versko služba: O govor ikerela pe te šaj te del pe sila okolenge soj but pharo adalea so objasninela pe so vakerela i Biblija bašo meribe hem baši nadež kaj o mule ka živinen palem (Jovan 11:25; Rimjanite 5:12; 2. Petrovo 3:13). Isto agjaar, ko govor vakerela pe kobor šukar manuš sine adava so mulo hem so šaj te sikljova taro adava so sine verno e Devleske (2. Samoilova 1:17-27).

 Ko parujbe šaj te giljavel pe gili koja so temelinela pe ki Biblija (Kološanite 3:16). Ko krajo vakerela pe molitva koja so ka del sila okolen soj lenge but pharo (Filipjanite 4:6, 7).

 Na khedena pe pare: Amen na platinaja i versko služba, ni o parujbe, a ni na khedaja pare ko amare sostanokija (Matej 10:8).

 Koj šaj te avel ko parujbe: Okola so nane e Jehovaskere svedokija šaj te aven ko parujbe hem ko govor so ikerela pe ki dvorana. Ko sa amare sostanokija šaj te avel koj mangela.

 Sekova e Jehovaskoro svedoko odlučinela korkori peske hem adava kerela sprema pli sovest koja soj tani sikavdi tari Biblija (1. Timotej 1:19). Ama, na učestvujnaja ko verska običaija kola so mislinaja kaj nane ko sklad e Biblijaja (2. Korinkjanite 6:14-17).