O Isus vakergja: „Ka uštel narodo protiv narodo, hem carstvo protiv carstvo. Hem ka oven bare zemjotresija, a ko razna thana ka oven zarazna nasvalipa hem bokhalipe“ (Luka 21:10, 11). Sa akala bukja kerena jekh jasno znako hem keda ka slučinen pe ko isto vreme, amen jasno ka džana kaj „e Devleskoro Carstvo tano paše“. Dali ko sveto slučinena pe sa akala nastanija? Te dikha so sikavena o faktija.

1. VOJNE

Ko 1914 berš počmingja i Prvo svetsko vojna — vojna koja so vlijajngja upro but manuša hem kolate sine vklučime but phuvja. O istoričarija but puti vakerena kaj adava berš meningja i manušikani istorija. Sar nikogaš angleder sine koristime tenkija, vozdušna bombe, avtomatska puške, otrovno gasi hem javer oružje. Palo nesavo vreme počmingja i Dujto svetsko vojna kote so prvo puti koristingja pe atomsko oružje. Taro 1914 berš pa sa dži akana, isi vojne ko razna thana hem ki lende mule milionja manuša.

2. ZEMJOTRESIJA

Ki jekh enciklopedija pišinela kaj sekova berš isi okolu 100 zemjotresija kola soj tane dovolno silna te keren bari šteta (Bri­tan­ni­ca Academic). Isto agjaar, o Geološko zavod ko SAD informirinela: „Sprema o podatokija tari amari arhiva (kola tane taro okolu 1900 berš), očekujnaja okolu 16 bare zemjotresija sekova berš“. Nesave izučuvačija vakerena kaj nane poviše zemjotresija nego kaj isi pošukar aparatija kola so registririnena o zemjotresija. Ama fakti tano kaj, o silna zemjotresija kola so slučinena pe ko celo sveto anena muke hem meribe sar nikogaš angleder.

 3. BOKHALIPE

O pričine bašo bokhalipe ko sveto tane o vojne, i korupcija, o ekonomska problemija hem problemija ko zemjodelstvo. Ko izveštaj bašo 2018 berš ki Svetsko programa baši hrana pišinela: „Ko sveto isi 821 milionja manuša kolen so nane len dovolno hajbe, a taro adava broj 124 milionja manuša tane ki opasnost te meren“. Sekova berš, okolu 3,1 milionja čhave merena adaleske so nane len dovolno hajbaske. Ko 2011 berš okolu 45 procentija taro čhave mule taro bokhalipe.

4. NASVALIPA HEM EPIDEMIJE

Ki jekh publikacija tari Svetsko zdravstveno organizacija pišinela: „Panda ko početok taro 21-to veko sine bare epidemije. Palem pojavinena pe nasvalipa kola so sine angleder sar soj i kolera, i čuma hem i žuto treska. A pojavinena pe hem neve nasvalipa sar soj sars, pandemsko gripi, bliskoistočno respiratorno sindromi (MERS), ebola hem zika“. A i pandemija Kovid-19 tani i posledno. Iako o naučnikija hem o doktorija otkringje but bukja bašo nasvalipa, ola na uspejngje te arakhen iljači bašo sa o nasvalipa.

5. PROPOVEDNIČKO AKTIVNOST KO CELO SVETO

O Isus istakningja panda jekh delo taro znako keda prorokujngja: „Akava šukar haberi bašo carstvo ka propovedinel pe ko celo sveto, bašo svedoštvo sa e narodonge, hem tegani ka avel o krajo“ (Matej 24:14). Džikote o sveto soočinela pe bare problemencar, poviše taro ofto milionja manuša taro sa o narodija propovedinena o šukar haberi bašo e Devleskoro Carstvo ko 240 phuvja hem adava ko poviše taro 1.000 čhibja. Nikogaš angleder ki manušikani istorija na sine nešto asavko.

Avdive šaj te dikha baš adala nastanija kolenge so kergja lafi o Isus. Soske valjani te interesina amen bašo akala faktija? Adaleske so o Isus vakergja: „Keda ka dikhen kaj sa akava ovela, džanen kaj e Devleskoro Carstvo tano paše“ (Luka 21:31).

O znako koleske so kergja lafi o Isus hem i biblisko hronologija pomožinena amenge te haljova kaj o Devel postavingja plo Carstvo ko nebo ko 1914 berš. a Ko adava vreme čhivgja ple Čhave, e Isuse, sar Cari (Psalm 2:2, 4, 6-9). Panda hari e Devleskoro Carstvo ka vladinel upri Phuv, ka uništinel sa o manušikane vlade hem ka kerel i Phuv raj kote so šaj večno te živina.

Panda hari ka ispolninen pe e Isuseskere lafija so vakergja len ki molitva Očenaš: „Te avel tlo carstvo. Te ovel tli volja, sar ko nebo agjaar ki phuv“ (Matej 6:10). Ama, so kergja e Devleskoro Carstvo otkeda počmingja te vladinel ko nebo ko 1914 berš? Hem so ka kerel otkeda ka počminel te vladinel upro manuša?