Михаел, кова со ко несаве религие тано пенџардо хем сар „Свети Архангел Михаил“, мислинела пе ко Исус англедер те авел ки Пхув хем откеда иранѓа пе ко небо. a О Михаел распрајнѓа пе е Сатанаја пало мерибе е Мојсеескоро хем поможинѓа јекхе ангелеске те пренесинел е пророкоске е Даниелеске јекх порака таро Девел (Даниел 10:13, 21; Јуда 9). Адалеа со бранинела е Девлескири власт хем боринела пе против е Девлескере душмања, о Михаел живинела спрема пло анав со значинела — „Кој тано сар о Девел?“ (Даниел 12:1; Откровение 12:7).

 Кола доказија иси кај о Исус тано о Архангел Михаел?

•   О Михаел тано „о архангел“ (Јуда 9). И титула „архангел“, значинела „главно ангели“, хем појавинела пе ко само дуј библиска стихија. Ко солдуј случаија, о лафи појавинела пе ки еднина, со сикавела кај постојнела само јекх ангели со пхиравела акаја титула. Ко јекх таро адала дуј стихија пишинела кај о воскреснимо Господари, о Исус, „ка хулел таро небо хем заповеднички ка викинел е гласоја таро Архангел“ (1. Солуњаните 4:16). Е Исусе иси ле „е архангелескоро гласо“ соске ов тано о архангел Михаел.

•   О Михаел водинела и војска таро ангелија. „О Михаел хем лескере ангелија боринѓе пе против о змеј, о Сатана“ (Откровение 12:7). Исто аѓаар, о Михаел тано пенџардо сар „јекх таро најбаре кнезија“ хем „о баро кнези“ хем адава сикавела кај лесте иси ле баро авторитети ко небо (Даниел 10:13, 21; 12:1). Според јекх изучувачи башо Нево Завет, о Дејвид Аун, акала титуле сикавена кај о Михаел тано “о главно заповеднико е војскаке таро ангелија“.

   Освен Михаел, и Библија спомнинела панда јекха анав кеда керела лафи баши некасте со иси ле авторитети упри војска таро ангелија. Ој вакерела кај таро „небо ка појавинел пе о Господари о Исус пле моќна ангеленцар ки бари јаг хем ка анел одмазда“ (2. Солуњаните 1:7, 8; Матеј 16:27). Исто аѓаар, и Библија вакерела кај о Исус гело ко небо хем леске сине „подложиме ангелија хем властија, хем силе“ (1. Петрово 3:21, 22). Нане логично те мислина кај упро ангелија, о Девел чхивѓа дује заповедникон, е Исусе хем е Михаеле. Наместо адава, бут пологично тано кај е солдује анавенцар мислинела пе ки исто личност.

•   О Михаел „ка уштел“ ки бари неволја (Даниел 12:1). Ко лил Даниел, о израз „ка уштел“ често користинела пе те шај те опишинел пе царе кова со џала ки несави посебно акција (Даниел 11:2-4, 21). О Исус Христос, колеске со вакерела пе кај тано „о Лафи е Девлескоро“, ка цидел ки јекх посебно акција сар „Цари упро царија“ те шај те мударел е Девлескере душманен хем те заштитинел е Девлескере народо (Откровение 19:11-16). Адава ка керел ле џикоте трајнела јекх бари неволја сави со на сине таро почеток е светоскоро џи акана (Матеј 24:21, 42).