О Исус вакерѓа: „Ка уштел народо против народо, хем царство против царство. Хем ка овен баре земјотресија, а ко разна тхана ка овен заразна насвалипа хем бокхалипе“ (Лука 21:10, 11). Са акала буќа керена јекх јасно знако хем кеда ка случинен пе ко исто време, амен јасно ка џана кај „е Девлескоро Царство тано паше“. Дали ко свето случинена пе са акала настанија? Те дикха со сикавена о фактија.

1. ВОЈНЕ

Ко 1914 берш почминѓа и Прво светско војна — војна која со влијајнѓа упро бут мануша хем колате сине вклучиме бут пхувја. О историчарија бут пути вакерена кај адава берш менинѓа и манушикани историја. Сар никогаш англедер сине користиме тенкија, воздушна бомбе, автоматска пушке, отровно гаси хем јавер оружје. Пало несаво време почминѓа и Дујто светско војна коте со прво пути користинѓа пе атомско оружје. Таро 1914 берш па са џи акана, иси војне ко разна тхана хем ки ленде муле милиоња мануша.

2. ЗЕМЈОТРЕСИЈА

Ки јекх енциклопедија пишинела кај секова берш иси околу 100 земјотресија кола сој тане доволно силна те керен бари штета (Britannica Academic). Исто аѓаар, о Геолошко завод ко САД информиринела: „Спрема о податокија тари амари архива (кола тане таро околу 1900 берш), очекујнаја околу 16 баре земјотресија секова берш“. Несаве изучувачија вакерена кај нане повише земјотресија него кај иси пошукар апаратија кола со регистриринена о земјотресија. Ама факти тано кај, о силна земјотресија кола со случинена пе ко цело свето анена муке хем мерибе сар никогаш англедер.

 3. БОКХАЛИПЕ

О причине башо бокхалипе ко свето тане о војне, и корупција, о економска проблемија хем проблемија ко земјоделство. Ко извештај башо 2018 берш ки Светско програма баши храна пишинела: „Ко свето иси 821 милиоња мануша колен со нане лен доволно хајбе, а таро адава број 124 милиоња мануша тане ки опасност те мерен“. Секова берш, околу 3,1 милиоња чхаве мерена адалеске со нане лен доволно хајбаске. Ко 2011 берш околу 45 процентија таро чхаве муле таро бокхалипе.

4. НАСВАЛИПА ХЕМ ЕПИДЕМИЈЕ

Ки јекх публикација тари Светско здравствено организација пишинела: „Панда ко почеток таро 21-то веко сине баре епидемије. Палем појавинена пе насвалипа кола со сине англедер сар сој и колера, и чума хем и жуто треска. А појавинена пе хем неве насвалипа сар сој сарс, пандемско грипи, блискоисточно респираторно синдроми (МЕРС), ебола хем зика“. А и пандемија Ковид-19 тани и последно. Иако о научникија хем о докторија откринѓе бут буќа башо насвалипа, ола на успејнѓе те аракхен иљачи башо са о насвалипа.

5. ПРОПОВЕДНИЧКО АКТИВНОСТ КО ЦЕЛО СВЕТО

О Исус истакнинѓа панда јекх дело таро знако кеда пророкујнѓа: „Акава шукар хабери башо царство ка проповединел пе ко цело свето, башо сведоштво са е народонге, хем тегани ка авел о крајо“ (Матеј 24:14). Џикоте о свето соочинела пе баре проблеменцар, повише таро офто милиоња мануша таро са о народија проповединена о шукар хабери башо е Девлескоро Царство ко 240 пхувја хем адава ко повише таро 1.000 чхибја. Никогаш англедер ки манушикани историја на сине нешто асавко.

Авдиве шај те дикха баш адала настанија коленге со керѓа лафи о Исус. Соске ваљани те интересина амен башо акала фактија? Адалеске со о Исус вакерѓа: „Кеда ка дикхен кај са акава овела, џанен кај е Девлескоро Царство тано паше“ (Лука 21:31).

О знако колеске со керѓа лафи о Исус хем и библиско хронологија поможинена аменге те хаљова кај о Девел поставинѓа пло Царство ко небо ко 1914 берш. a Ко адава време чхивѓа пле Чхаве, е Исусе, сар Цари (Псалм 2:2, 4, 6-9). Панда хари е Девлескоро Царство ка владинел упри Пхув, ка уништинел са о манушикане владе хем ка керел и Пхув рај коте со шај вечно те живина.

Панда хари ка исполнинен пе е Исусескере лафија со вакерѓа лен ки молитва Оченаш: „Те авел тло царство. Те овел тли волја, сар ко небо аѓаар ки пхув“ (Матеј 6:10). Ама, со керѓа е Девлескоро Царство откеда почминѓа те владинел ко небо ко 1914 берш? Хем со ка керел откеда ка почминел те владинел упро мануша?