Е Никола хем е Селина сине лен јавер предизвик. Ола прифатинѓе и задача тари подружница ки Франција те селинен пе ко јавер собрание. Ола вакерена: „Ко почеток сием сине бут радосна, ама пало адава почминѓе те фалинен аменге амаре амала. Панда нашти сине те ова паше е пхраленцар таро амаро нево собрание“. a Адалеске со о селибе шај те овел пхаро, со шај те кере те шај те ове среќно хем те функционирине ко тло нево собрание? Сар шај о јавера те поможинен? Хем ко саве јавера начинија шај те охрабрине е јаверен, а хем ту да те ове охрабримо лендар.

ШТАР НАЧЕЛИЈА СО КА ПОМОЖИНЕН ТУКЕ ТЕ ПРИЛАГОДИНЕ ТУТ

1. Нека овел тут доверба ко Јехова (Пс. 37:5). И Казуми тари Јапонија мора сине те мукхел пло собрание коте со сине 20 берш кеда лакоро ром добинѓа бути ко јавер тхан. Сар ој фрдинѓа пло пхарипе е Јеховаске? И Казуми вакерела: „Бут пути вакерава сине е Јеховаске кај сиум ки паника, кај осетинава ман сине коркори хем кај сиум секирими. Секогаш кеда керава сине адава, ов дела ман сине и сила со ваљанѓа манге“.

Сар шај панда повише те бајраре тли доверба ко Јехова? Исто сар со јекхе растениеске ваљани пани хем хранлива материе тари пхув те шај те бајрол, аѓаар амен да мора те хранина амари вера те шај ој те бајрол. О Никола, коле со спомнинѓем ле англедер, халило кај адава со размислинѓа башо е Авраамескоро, е Исусескоро хем е Павлескоро пример — мануша кола со керѓе бут жртве те шај те керен е Девлескири волја — бајрарѓа лескири доверба кај о Јехова ка поможинел ле. Ако редовно проучинеа и Библија, адава ка поможинел туке  те икљове ко крајо било саве променаја со ка овел тут ко живото хем ка сикљове буќа коленцар со ка шај те охрабрине е јаверен ко нево собрание.

2. Ма кер споредбе (Проп. 7:10). О Жуел мора сине те навикнинел пе ки појавер култура кеда селинѓа пе таро Бенин ко САД. Ов вакерела: „Сине ман чувство кај секасаја касаја со ка запознајнав ман ваљани сине те вакерав леске са баши манде“. Адалеске со акава сине појавер таро адава со ов сине навикнимо, почминѓа те цидел пе таро јавера ко собрание. Ама откеда пошукар запознајнѓа е пхрален хем е пхењен, ов менинѓа пло стави. О Жуел вакерела: „Акана хаљовава кај било коте те ове ко свето, о мануша тане иста. Ола само керена лафи хем постапинена ко појавер начин. Бут тано важно те прифатина е манушен асавке саве сој тане“. Адалеске ма кер споредбе тле пуране собраниеа. Јекх пхен со викинела пе Ен-Лиз, која со служинела сар пионери, вакерѓа: „На селинѓум ман те шај те аракхав адава со мукхљум. Селинѓум ман те шај те откринав неве буќа“.

О старешине исто аѓаар на ваљани те керен споредбе пумаре пуране собраниеа. Само адалеске со некој керела о буќа ко појавер начин, на значинела кај тано погрешно. Англедер те де предлогија, шукар ка овел те дикхе саве тане о околностија ко адава тхан (Проп. 3:1, 7б). Пошукар тано те сикаве е пхрален хем е пхењен тле шукар примереа, наместо те чхиве лен те размислинен сар туте (2. Кор. 1:24).

3. Ов зафатимо ко тло нево собрание (Фил. 1:27). О селибе родела бут време хем енергија, ама бут тано важно панда таро почеток те џа ко состанокија — ако шај ки дворана. Уствари, ако окола таро тло нево собрание на дикхена тут никогаш или бут ретко дикхена тут, тегани сар шај те поможинен туке? И Лусинда која со пле дује чхаенцар селинѓа пе ки јекх бари диз ки Јужно Африка, вакерела: „Мле амала денѓе ман совет те концентриринав ман ко адава те овав паше е пхраленцар хем е пхењенцар таро нево собрание, те џав ленцар ки служба хем те коментиринав ко состанокија. Исто аѓаар, вакерѓем е пхраленге кај шај те икерен пе состанокија службаке ко амаро кхер“.

Адава со заедно ка кере о теократска активностија е пхраленцар хем е пхењенцар таро нево собрание, ка поможинел туке те бајраре тли вера хем е јаверенгири. И Ен-Лиз, која со спомнинѓем ла англедер, сине поттикними таро лакере старешине те трудинел пе те џал ки служба сариненцар таро собрание. Саво сине о резултати? Ој вакерела: „Сигате халиљум кај адава тано јекх важно начин сар шај те осетинав ман дело таро собрание“. Исто аѓаар, адалеа со доброволно ка учествујне ко несаве активностија, сар на пример ко чистибе хем одржибе и дворана, ка сикаве кај ко нево собрание дикхеа сар тло собрание. Кобор повише ка учествујне ко собраниска активностија, добором посигате ка ове прифатимо хем ка осетине тут кај сиан дело тари тли неви духовно фамилија.

4. Кер туке неве амала (2. Кор. 6:11-13). Најшукар начин те ове амал некасаја тано аѓаар со ка сикаве кај интересинеа тут леске. Адалеске, одвојн  туке време те аве хари порано англедер о состанок хем те ачхове хари повише пало адава те шај те запознајне е јаверен. Трудин тут те памтине ленгере анава. Ако памтинеа е јаверенгере анава хем ако сиан љубезно хем пристапливо, о јавера ка манген те запознајнен тут хем веројатно ка овен шукар амала.

Наместо претерано те оптоварине тут адалеа дали о јавера ка прифатинен тут, дозволин тле неве пхраленге хем пхењенге те запознајнен тут асавко саво со чаче сиан. Сикљов тари Лусинда која со вакерѓа: „Акана сием паше амала е јаверенцар адалеске со амен керѓем о прво чекори те канина е јаверен ко амаро кхер“.

„ПРИФАТИНЕН ТУМЕН ЈЕКХ ЈЕКХЕА“

Некаске шај те овел бут стресно кеда прво пути ваљани те џал ко состанок коте со иси пхердо мануша колен со на пенџарела. Адалеске, со шај те кере те шај те локхјаре околенге со але ко тло собрание? О апостол Павле поттикнинѓа амен: „Прифатинен тумен јекх јекхеа, сар со о Христос прифатинѓа амен“ (Рим. 15:7). Адалеа со ка џан пало е Исусескоро пример, о старешине шај те поможинен е невенге те осетинен пе шукар. (Дикх и рамка „ Сар шај о селибе те овел успешно“.) Сепак, сарине таро собрание, чак хем о чхаве да, шај те керен о неве ко собрание те осетинен пе шукар.

Те шај о јавера те осетинен пе шукар шај те канина лен ко амаро кхер, ама исто аѓаар шај практично да те поможина ленге. На пример, јекх пхен одвојнѓа таро пло време те шај те сикавел и диз јекхе пхењаке која со само со али ко адава тхан хем те шај те сикавел лаке сар те користинел о јавно превоз. Адава воодушевинѓа е неве пхења хем поможинѓа лаке те прилагодинел пе.

ПРИЛИКА ТЕ НАПРЕДУЈНЕ КО ДУХОВНО ПОГЛЕД

Сар бајрола јекх скакулцо, ов некобор пути фрдела пли кожа англедер те пхравел пле пака хем те овел способно те летинел. Слично, кеда ка џа ко нево собрание ваљани те отфрлине било сави секирација со ка чхинавел тут, аѓаар те вакера, те пхраве те пака ки служба башо Јехова. Акава  потврдинена о Никола хем и Селин. Ола вакерена: „О селибе тано јекх бут шукар обука. Те шај те прилагодина амен ко неве мануша хем ко различна тхана, мора сине те развина неве особине“. О Жан-Шарл, коле со спомнинѓем ле ко почеток, вакерела сар о селибе користинѓа лескере фамилијаке: „И промена денѓа прилика амаре чхавенге те овен позрела хем те овен попаше е Јеховаја. Башо само некобор масекија амари чхај почминѓа те овен ла задаче ко состанок Амаро живото хем служба, а амаро чхаво уло некрстено објавители“.

Со шај те кере ако тле околностија на дозволинена туке те селине тут адари коте со иси побари потреба? Ко собрание коте со сиан акана шај те дикхе сар нево аѓаар со ка применине несаве таро предлогија со сине спомниме ки акаја статија. Нека овел тут доверба ко Јехова хем ов целосно зафатимо е собраниска активностенцар, аѓаар со ка кере плани те џа ки служба е јаверенцар хем аѓаар со ка кере туке неве амала или ка кере позорале о амалипа со више иси тут. Шај те кере о прво чекори те шај практично те поможине околенге сој неве или околенге со иси лен несави потреба. Адалеске со о мангипе тано знако пало кова со пенџарѓовена о чачутне христијања, адава со ка поможине е јаверенге ка поможинел туке те напредујне ко духовно поглед (Јован 13:35). Шај те ове сигурно кај „асавке жртве мангела о Девел“ (Евр. 13:16).

Иако иси предизвикија, бут христијања со селинѓе пе успејнѓе те овен среќна хем те функциониринен ко нево собрание, а шај ту да. И Ен-Лиз вакерела: „Адава со служинѓум ко повише собранија поможинѓа манге те ширинав мло вило“. И Казуми акана тани уверими кај о селибе „шај те дел тут прилика те осетине е Јеховаскири поддршка ко неве начинија“. А со мислинела о Жуел? Ов вакерела: „Адава со керѓум манге амала, поможинѓа манге те осетинав ман сар кхере. Акана добором шукар прилагодинѓум ман ко мло нево собрание со ка овел манге пхаро те мукхав ле“.