Sar o Jehovas stvorinďa o manželstvo, diňa uloha la da le dades, kaj te bararen avri peskere čhaven. (Kolosanom 3:20) La da le dades hin pro šero, kaj te sikaven peskere čhavores te kamel le Jehovas a kaj te barol lestar avri goďaver manuš. (2. Timotejovi 1:5; 3:15) Snažin tut te sprindžarel, so hin andro jilo tira čha, tire čhas. O čhave mušinen te dikhel tumaro lačho priklados. Te tut korkores hin andro jilo le Jehovaskere lava, ta džaneha ada mište te sikavel the peskere čhaven. (Žalm 40:8)

SO PHENEL E BIBLIJA: O manuš mušinel ochotňe te šunel a goďaha te vakerel. (Jakub 1:19 Slovo na cestu) Určiťe kames, kaj o čhavoro te na daral tuha te del duma. O čhave mušinen te dikhel, hoj tu sal ochotno te šunel len avri, sar tuke kamen vareso te phenel. Ker savoro prekal ada, kaj te el lokes prekal o čhave te phenel, so len hin pro jilo. (Jakub 3:18) Te o čhave džanen, hoj tut sig choľares abo takoj vriskines, darana a na phenena tuke savoro. Av trpezlivo ke lende a furt lenge sikav, hoj len kames. (Matúš 3:17; 1. Korinťanom 8:1)

SO ŠAJ KERES:

• Te tire čhave kamen tuha te vakerel, av ochotno len te šunel avri

• De duma le čhavenca furt na ča akor, sar keren vareso nalačho

SO PHENEL E BIBLIJA: Ko džanel mište te pochopinel varesavi vec, ajseske pes darinela. (Príslovia 16:20) Varekana na stačinel ča te šunel, so tuke phenel tiro čhavoro, ale mušines the te pochopinel, sar leske skutočňe akor hin. Oda hin normalno, hoj o terne manuša keren savoro bareder sar hin a často phenen vareso, so aňi avka na mišľinen. E Biblija phenel: Te vareko odphenel pre vareso, pal soste pes mek na dodžanľa o čačipen, hino dilino. (Príslovia 18:13) Ma choľisaľuv sig! (Príslovia 19:11)

SO ŠAJ KERES:

• Phen tuke, hoj the te phenela tiro čhavoro vareso, so tuke na ela pre dzeka, na pheneha leske: Čit imar! Aňi pre leste na vriskineha

• Premišľin pal ada, so šunehas andro jilo, sar tuke sas ajci berš, keci hin akana tire čhavoreske a so sas prekal tute akor dvoležito

SO PHENEL E BIBLIJA: Šun, mro čho, le dades, sar tuke phenel, andre soste tut te zlepšines a ma visar tut olestar, sar tut e daj del goďi. (Príslovia 1:8) O Jehovas diňa la da le dades autorita upral o čhave. Mušinen len te sikavel, kaj te presikaven tumenge e paťiv a te šunen tumen. (Efezanom 6:1-3) O čhave sprindžaren, te e daj le dadeha nane andre savoreste jekha goďaha. (1. Korinťanom 1:10) Te la romňaha, le romeha andre varesoste na suhlasines, ma phen ada anglo čhave, kaj te na preačhen te lel peske ko jilo o lava, so tu lenge phenes.

SO ŠAJ KERES:

• Phenen tumenge, sar ukazňinena tumare čhaven a ľikeren tumen alestar

• Te na sal jekha goďaha la romňaha, le romeha, sar te bararel avri le čhaven, premišľin, soske dikhel pre ada avres sar tu

SO PHENEL E BIBLIJA: Barar avri le čhas avka, sar kames, kaj paľis te dživel. (Príslovia 22:6) Kaj te bararen avri le čhaven mište, ada nane ča avka. Dohodňinen tumen, sar bararena avri le čhaven a sar len ukazňinena. (Žalm 127:4; Príslovia 29:17) Te ukazňinel le čhaven nane ča te potrestinel len. Mušines lenge thiš te višvetľinel, soske hin dvoležito te doľikerel o pravidla, so len des. (Príslovia 28:7) Thiš len sikav te kamel le Jehovaskero lav a te achaľol o biblicka zasadi. (Žalm 1:2) Ada lenge pomožinela, kaj len te el citlivo sumeňis čiže svedomje. (Hebrejom 5:14)

SO ŠAJ KERES:

• Snažin tut, kaj tire čhave te paťan, hoj o Del hino džido a kerela savoro, so phenel

• Sikav len, sar korkore te sprindžaren a te odcirden pes olestar, so hin džungalo, napriklad pro internet abo pro socijalna sjeťi. Phen lenge, sar pes te chraňinen anglo oladžene, so zňeuživinkeren le čhavoren