O Ježiš angle ada, sar dživlas pre phuv, dživlas andro ňebos sar aňjelos. (Ján 8:23) Sas peršo, kas o Del stvorindžas. Paľis pomožinlas le Devleske te stvorinel aver savore veci. O Jehovas korkoro stvorindžas ča le Ježiš. Vašoda šaj phenas, hoj o Ježiš hino le Devleskro jekhoro splodzimen čhavo. (Ján 1:14) Ježišoskri buči sas te vakerel avrenge le Devleskre lava, vašoda pes thiš vičinel Lav. Pregenen Príslovia 8:22, 23, 30; Kolosanom 1:15, 16.

O Del bičhadžas le Ježiš pre phuv avka, hoj preľigendžas leskro dživipen andal o ňebos andre pačivaľi židoviko džuvľi, Maria. Vašoda les na sas manušeskro dad. (Lukáš 1:30–35) O Ježiš avľas pre phuv, (1) hoj te sikavel o čačipen pal o Del, (2) hoj te sikavel, sar te služinas le Devleske the te sam andro pharipena, (3) hoj te počinel peskre dokonale dživipnaha vaš o manuša. Pregenen Matúš 20:28.

Ko šaj pomožinel le manušeske, so hino andre ajso pharipen, hoj šaj našavel peskro dživipen? Šaj pomožinel oda, ko kamel te del savoro, so kampel, hoj ole manušes te lel avri andal ola pharipena. (2. Mojžišova 21:29, 30) O Del na kamelas, hoj o manuša te phuron a paľis te meren. Sar ada džanas? Le Adamoske o Del phendžas, hoj merla ča akor, sar les na šunela. E Biblija phenel, ko na šunel le Devles, kerel bini. Te na kerdžahas o Adam binos, šoha na muľahas. (1. Mojžišova 2:16, 17; 5:5)  O Adam kerdžas binos, muľas, avka preľigendžas o binos pre savore manuša. Aleha pes andro svetos maškar o manuša andžas o meriben. Meras, bo počinas vaš peskre bini dživipnaha. Te avas ile avri andal o meriben, savo amenge ačhiľas pal o Adam, kampel, hoj vareko te počinel vaš amare bini. Pregenen Rimanom 5:12; 6:23.

Ko šaj počinel vaš amenge, hoj amen te lel avri andal o meriben? Te merel ňedokonalo manuš, šaj počinel ča vaš peskre bini. Ňiko amendar našťi počinel peskre dživipnaha vaš avre manušengre bini. Pregenen Žalmy 49:7–9.

O Ježiš sas dokonalo. Na sas ajso sar amen. Na mušindžas te merel vaš peskre bini, bo ov šoha ňisavo binos na kerdžas. Muľas, hoj te počinel peskre dživipnaha vaš amare bini. O Del amen kamel andal calo jilo, vašoda bičhadžas peskre čhas, hoj vaš amenge te merel. The o Ježiš amen kamel andal calo jilo. Šundžas peskre Dades a diňas peskro dživipen vaš amare bini. Pregenen Ján 3:16; Rimanom 5:18, 19.

Dikh o videjo Soske o Ježiš muľa?

Sar o Ježiš dživlas pre phuv, sasťarlas le nasvalen, uštavlas le manušen andal o meriben the pomožinlas olenge, so len sas o pharipen andro jilo. Aleha sikadžas, so paľis kerla savore lačhe manušenge. (Matúš 15:30, 31; Ján 5:28) Sar o Ježiš muľas, o Del les uštadžas andal o meriben, hoj te dživel sar aňjelos. (1. Petra 3:18) Paľis o Ježiš užarlas, medik les o Jehovas diňas zor, hoj te vladňinel sar o kraľis upral caľi phuv. (Hebrejom 10:12, 13) Akana vladňinel andro ňebos sar kraľis a o manuša, so dživen avke sar ov sikavlas, vakeren kada lačho hiros pal calo svetos. Pregenen Daniel 7:13, 14; Matúš 24:14.

O Ježiš sar kraľis so neksigeder peskra zoraha odčhivla savoro pharipen the olen, so oda pharipen keren. Savore, so pačan le Ježišoske the šunen les, dživena bachtales ade pre phuv andro rajos. Pregenen tumenge Žalmy 37:9–11.