La Bib i di ké Bondié i vé ké tout domoun ‘i rofiz pratik tout kalité péché sèksuèl’ (1 Tésalonisien 4:3). Dan la Bib, kan i di « péché sèksuèl » sa i vé dir par égzanp, tronp son mari oubien son madam, dé bonom oubien dé madam i dor ansanm é in bonom èk in madam i dor ansanm san èt marié.

•  Poukosa lé inportan pou Bondié ké dé moun i marié ansanm ou pa ?

•  Kosa i fo pansé kan dé moun i viv ansanm avan marié pou oir si zot i akord ?

•  Koman dé moun i pé fé pou ké zot mariaj i tienbo.

•   Sé Bondié la mèt an plas lo mariaj. Li la uni lo promié bonom èk lo promié madam kan li la marié azot (Jénèz 2:22-24). Li navé pa prévu k’in bonom èk in madam i viv ansanm san angaj azot inn èk lot dann mariaj.

•   Bondié i koné sak lé méyèr pou tout domoun. Bondié la prévu ké lo mariaj i uni in bonom èk son madam pou la vi. Langajman la, lé pou toultan é sé pou lo bien tout la famiy, parské li protèj tout la bann. Alon pran in légzanp : Kan ou achèt in mèb, pou gingn mont ali, lo fabrikan i done aou in ti liv. Parèy kom ti liv la i èsplik anou koman mont lo mèb kom k’i fo, bann konsèy Bondié i di anou koman fo fé pou ké nout famiy lé uni. Bann komandman Bondié i done anou lé toultan pou nout bien (Izai 48:17, 18).

•   Kan dé moun i fé lamour san èt marié, sa i pé amèn azot loin sa. Ou pé tonb ansint san k’té prévu, gingn in maladi sèksuèl, tonb dan in gran dépitasion...

•   Fé lamour, sé in kado Bondié la doné pou ké bann bonom é bann madam i gingn fé zanfan. Pou Bondié, la vi lé sakré. Sa in zarlor Bondié la done anou, gingn fé zanfan. Bondié i vé nou rèspèk kado la, é pou sa nou doi fé lamour rienk èk lo moun nou la marié ansanm. Sa in fason fé mont ké nou mèt anlèr lo mariaj (Ébré 13:4).

 Pa bézoin komans par in ‘ mariaj dèrièr la kuizine ’, sétadir viv ansanm san èt marié, pou ké out mariaj i march. O kontrèr, kan dé moun lé vréman angajé inn anvèr lot é k’i fé tout pou règ bann problèm ansanm a, sa i raproch azot. Kan i pas dovan mésié lo Mèr, langajman lé pli for (Matié 19:6).

 Na poin d’mariaj parfé. Mé in mari èk son madam i pé fé ké zot mariaj i march, si zot i suiv bann konsèy la Bib i done. Ala détroi :

•   Majine lot, avan majine aou mèm (1 Korintien 7:3-5 ; Filipien 2:3, 4).

•   Kontinié fé grandi out lamour é out rèspé pou lot (Éfézien 5:25, 33).

•   Aprann réfléchi avan d’kozé (Provèrb 12:18).

•   Pran pasians é pardone vitman (Kolosien 3:13, 14).