La Bib i kondann pa kontantman in moun i resan dann relasion séksuèl, o kontrèr li mont ke sa lé in kado Bondieu i donn bann domoun maryé. Bondieu la kré domoun « bonom èk madam », é aprésa li la trouv ke tout sak li lavé fé té « bien bon » (Jenèz 1:27, 31, Maredsous). Kan li la maryé le premié bonom avèk le premié madam, li la di azot « devien in seul chèr » (Jenèz 2:24). Resan kontantman dann relasion séksuèl, é osi èm inn é lot èk tandrès té konpri dann maryaj la.

 La Bib i ésplik kontantman bann mari i resan dann maryaj kan èl i di : « Trouv out kontantman avèk le madam ou la choizi kan ou té jeun [...]. Ke toultan son deu tété i satisfé aou. Fé ansort ke son lamour i arèt pa ral aou » (Provèrb 5:18, 19). Bondieu i ve ke bann madam osi i resan kontantman dan relasion séksuèl. La Bib i di : « Mari é fam i doi kontant lanvi séksuèl inn é lot » (1 Korintien 7:3, God’s Word Bible).

Kontantman dann relasion séksuèl lé normal, mé na dé limit

 Bondieu la désid ke bann relasion séksuèl lé rézèrvé rienk pou in mesieu èk in madam maryé ansanm. Parlfèt, Ébreu 13:4 i di : « I fo ke maryaj lé réspéktab pou tout, é ke le li demoun maryé lé san malpropté, parske Bondieu va juj sak i fé bann péché séksuèl oubien sak i tronp zot mari ou zot madam. » In mari èk son madam i doi rès fidèl anvèr inn é lot é réspèk zot langajman. Dan la Bib i di « Na plus kontantman kan i donn ke kan i gingn » (Akt 20:35). Sé kan zot i mèt lansègnman la an pratik, ke in mari èk son madam va konèt plus kontantman, mé pa kan zot i rod zot prop zintéré.