7 PARTI
Diospa Reinoga ima tan
1. Diospa Reinoga ima tan
Imaraicuta Jesusca ali mandac an (MARCOS 1:40-42)
Diospa Reinoga shuc gubirnu man. Chi gubirnuga nallami runa gubirnugunata tucuchinga. Jahuapachaibi Dios munashcata rashcacuinta, cai pachaibihuas chasnallata ranga. Diospa Reinoga runaguna minishtishca gubirnu man. Chi gubirnuga mundu intirumanda runagunatami tandachinga. Chiga manachu gustu cuintai an. Indá. Daniel 2:44; Mateo 6:9-13; 24:14, leingui.
Manachu tucui gubirnugunaibi shuc dirigenteta minishtinaun. Chasnallatami Jehova Diosca paihua Churi Jesucristota churashca, paiba Reinoibi mandachun nisha. Apocalipsis 11:15, leingui.
Cai videota ricui: Diospa Reinoga ima tan
2. Imaraicuta Jesusca ali mandac an
Diospa Churiga llaquic, alita rac ashcamandami ali mandac an (Mateo 11:28-30). Jahuapachamanda cai Allpaibi mandai callarishcaibimi paiba ushaihuan runagunata yanapanga. Huañushcamanda causarishaga paiba Yayahua ali maqui partima tiarishami chapara (Hebreos 10:12, 13). Chi huashami, Diosca Jesusta mandana urdinda cura. Lucas 1:32, 33, leingui.
3. Jesusca pai sapallachu mandanga
Diosca ashilla runagunatami anllara Jesushuan jahuapachamanda mandanauchun nisha (Apocalipsis 5:10). Jesus Allpaibi aushaga ashilla runagunatami anllara, paiba apostol anauchun nisha. Chi cazuc runagunami punda anllashca anaura, jahuapachamanda cai Allpaibi runagunata mandangahua. Chasnallata Diosca cunangamami chi muntunraicuga carigunata huarmigunata anllasha riushca. Paiguna huañushaga Jesus shinami aicha illac causarisha jahuama rinaun. Juan 14:1-3; 1 Corintios 15:42-44, leingui.
Masnata jahuapachama ringauna. Bibliaga ninmi ashillagunami jahuapachama ringauna nisha. Chiraicumi Jesusca nira, ashilla “huibagunacuinta” manguichi nisha (Lucas 12:32). Jesushuanga 144 mil runagunami jahuapachamanda cai Allpaibi runagunata mandangauna. Apocalipsis 14:1, leingui.
4. Jesusta mandana urdinda cucpiga imatata rara
Diosca Jesustami 1914 huataibi mandana urdinda cura. * Chi huashaga Jesusca Supaita, demoniogunata jahuapachamanda cai Allpama tucsira. Chasna racpimi Supaiga ashcata rabiarisha cai Allpaibi tiac runagunata sinzhita llaquichi callarira (Apocalipsis 12:7-10, 12). Chi punzhamandami astahuan mana ali causai tiasha catishca. Guerrasguna, allpa cuyuiguna, ungüiguna, raicaiguna tiacta ricushami yachanchi Diospa Reino nalla cai Allpata mandangahua callaringaraucta. Lucas 21:7, 10, 11, 31, leingui.
5. Diospa Reinoga imatata raun. Shamungarauc punzhaibiga imatata ranga.
Diosca paita sirvic runagunata Bibliamanda camachingahua cachashami tucui llactamanda, “ashca runagunata” tandachiun. Ali shunguta charic huaranga huaranga cariguna, huarmiguna Jesus nishcata pactachiunguna. Diospa Reino mana ali runagunata chingachicpiga, Jesusta cazuccunallami quishpingauna. Chiraicumi, Diospa Reino cungaraushcata japinata munashaga Jesusta cazuna anchi. Apocalipsis 7:9, 14, 16, 17, leingui.
Huaranga huataguna pasaushcaibimi Diospa Reinoga runagunaraicu Jehova munashcata shina rasha pactachinga. Allpaga shuc paraisomi tucunga. Chasna tucushca huashami Jesusca Diospa Reinoibi mandanata saquisha, paiba Yayallata mandachun nisha saquinga (1 Corintios 15:24-26). Diospa Reinomanda shuc runagunata cuintanata munanguimachu. Apocalipsis 21:3, 4, leingui.
^ par. 6 Bibliaibi 1914 nishca huatamanda yachanata munashaga, Bibliaga caitami yachachin nishca libroibi, pagina 217 a 220-ibi mascangui.
