Tucui tiactaga Diosmi rashca. Paiga huiñaimanda tiashcami, chasnallata huiñai causangami (1 Timoteo 1:17). Bibliaibi tiac gustu cuintaigunaga Diosmandami shamun (1 Timoteo 1:11). Pai ñucanchima causaita cushcamanda, paitami mas llaquina anchi. Apocalipsis 4:11, leingui.

Diosca runagunamanda yali man. Pai huaira shina espiritu ashcamandaga, mana ricuibac chan (Juan 1:18; 4:24). Dios imasa ashcata ricsinata munashaga, pai rashcagunata alita riparasha ricuna anchi. Tucui sami sisagunata, muyugunata ricushami yachanchi, Yaya Dios yapa llaquic, ashca yuyaita charic Dios ashcata. Astahuanbas, jahuapachata ricushami intindinchi Dios ashca ushaita charishcata. Romanos 1:​20, leingui.

Diosta mas ricsinata munashaga Bibliata leina anchi. Bibliaga ninmi, Diosca runagunata cuirac man nisha. Chasnallata ninmi, imata munac, imata mana munac ashcatahuas. Runaguna alita, mana alita racpihuas imasa Dios yuyashcatahuas Bibliaga ninmi. Hebreos 8:10-12, leingui.

Jesus nirami: “Ñucanchi jahuapachaibi tiac Yaya, camba shuti balichishca achun” nisha (Mateo 6:​9-13). Shinashaga Diosta, Yaya, Señor nishahuas, Diosca paiba quiquin shutita charin. Ñucanchi shimibi Jehova o Yave nisha ricsishahuas, shuc shimigunaibiga Diospa shutitaga shuc tunuta rimanaun. Bibliaga ninmi: “Runaguna yachanauchun, camba shuti Jehova acta, canllami tucui allpamanda Astahuan Jatun Dios angui” nisha (Salmo 83:18; shuc Bibliagunaibiga Salmo 82:19-ta mascangui).

 Huaquin Bibliagunaibiga, Jehovata churana randiga Yaya Dios, Señor nishami churashcauna. Randi, ñaupa timpu Bibliaibiga Diospa shutiga ricurirami 7 mil cutin. Jesusca caran urasmi chi shutita rimara. Lucas 11:2, leingui.

Cai videota ricui: Diosca shutiyuc chan

Huaquingunaga yuyashcaunami, ñucanchita camangahua Diosca llaquigunata churan nisha. Chita uyasha shuccunaga tapunaun, Jehova ñucanchita sirtu llaquishaga, imaraicuta llaquigunata churan nisha. Randi Diosca mana llaquigunata churasha camanzhu. Santiago 1:​13, leingui.

Jehovaga ñucanchi causaibi ali ñambita o mana ali ñambita anllangahua lugarta cushca. Chi lugarta cushcamandaga, Diosta sirvingahuami anllana anchi (Josue 24:15). Randi ashca runagunaga mana alita rangahuami anllashcauna. Chiraicumi yapa llaquiguna tian. Chita ricushaga Diosca ashcatami llaquirin. Genesis 6:​5, 6, leingui.

Jehova ñucanchita llaquishcamandaga munanmi cushiyasha causanauchun nisha. Nallami Diosca mana ali causaita tucuchinga. Chi pactarinagamaga, Diosca saquishcallami turmintuguna tiasha catinauchun nisha. Imaraicu. Chitaga numero 8-ibimi yachashun. 2 Pedro 3:7, 13, leingui.

Jehovaga ima uraspis, ñucata mañasha caillayahuaichi ninmi. Carangunatami paiga llaquin (1 Juan 5:14). Ñucanchi juchatas perdonanmi. Pai munashcata mana tucuita pactachicpihuas, ñucanchi paita casungahua ursariuctas ricunmi. Chiraicu, ñucanchi juchayuc ashahuas, paiba amigo tucunata ushanchi. Romanos 4:7, 8; Santiago 4:8, leingui.

Pai causaita cushcamandaga, ñucanchiga Diosllata yapacta llaquina manchi (Marcos 12:30). Paita llaquishcata ricuchishunmi, paimanda yachasha, chasnallata pai mandashcagunata cazusha. Chita rashaga, paihuan ali amigo tucushun. 1 Timoteo 2:4; 1 Juan 5:3, leingui.