Ñucaca México-Chiapas llactapa San Juan Chancalaíto uchilla pueblogupimi nacirircani. Ñucapash, ñuca familiapash mayas nishcacunamanda chol gentecunapuramandami capanchi. 12 huahuacunamandaca chuscupa catimi capani. Huahuacuna cashpaca ñuca huauquipanicunandimi testigo de Jehovacunahuan Bibliamanda yachajun carcanchi. Shinapash ñucaca Bibliapa consejocunataca na catircanichu.

 Ñucaca 13 huatacunata charishpaca ñami drogarinata, shuhuanatapash yacharcani. Chai tiempopillatami huasimandapash rircani. Chaimi maitapash purinlla carcani. 16 huatata charishpaca marihuana plantacionbimi trabajangapaj yaicurcani. Ña shuj huatatashnami chaipi trabajajurcani. Shuj tutaca uchilla barcopi ashtaca marihuanatami yalichinajurcanchi. Chaipimi shuj contra grupomanda pistolacunahuan ñucanchita atacangapaj shamurca. Ama huañuchi tucungapami yacuman shitarishpa carutapacha nadarcani. Jipamanga Estados Unidosmanmi pacajushpa rircani.

 Estados Unidospi cashpaca drogacunata jatushpa, nali cosascunata rurashpami catircani. 19 huatacunata charijpica shuhuashcamanda, shuj genteta casi huañuchishcamandapashmi carcelman cachahuarca. Carcelpica shuj pandillamanmi yaicurcani. Chaimandami macanajushpalla yalin carcani. Chaimandami Pensilvania-Lewisburg llactapi ashtahuan peligroso gentecunata churaj carcelman cachahuarca.

 Lewisburg llactamanda carcelpica ashtahuan millaimi tucurcani. Pandillapa tatuajecunata charimandami carcelpica chai pandillamandallata gentecunahuanga fácil tandanajurcani. Ashtahuan millai tucushpami shujhuan shujhuan macanajunlla carcani. Shuj viajeca cárcel patiopimi pandillacunapura caspicunahuan, gimnasiopi tiashca pesacunahuan ushashcata macanajurcanchi. Ama macanajushpa catichunmi guardiacunaca gasta shitarca. Chai jipaca guardiacunaca ashtahuan nali prezocunata churaj pushtupimi churahuarca. Millai millaimi carcani, nali shimicunatapash ninllami carcani. Imagumandapash macangapaj shayarinllami carcani. Shina causaimanda llaquirinapa randica cushillami sintirin carcani.

 Ashtahuan nali prezocunata churaj pushtupi casi punlla enterota chai cuartopillata vicharia caimandami Bibliata lii callarircani. Jipamanga shuj guardiami Usted puede vivir para siempre en el paraíso en la Tierra a nishca librota carahuarca. Cai librota liijushpami huahua cai hora testigo de Jehovacunahuan imata yachajushcata yarircani. Millai millai caimanda ashtaca nalicunata rurashcatami cuenta japircani. Shinallata ñuca familiapi, ñuca ishcai panicuna testigo de Jehovacuna tucushcapipashmi pensarircani. Jipa punllacunapica ñuca panicunaca na huañushpami causanga, ñucapash na huañushpa causangapami munani nishpami pensarircani. Chai horamandapachami ñuca causaita cambianata decidircani.

 Shinapash ñuca causaita cambiangapaca pipash ayudahuachunmi minishtisha yuyarcanimi. Chaimi Jehová Diostaca ayudahuai nishpa tucui shunguhuan mañarcani. Jipaca Estados Unidos llactapi testigo de Jehovacunapa sucursalmanmi Bibliamanda yachajungapami munani nishpa escribircani. Chai sucursalmi ladolla congregacionmanda huauquicunata cayashpa ñucata visitachun arreglocunata rurashcarca. Chai tiempopica carcelpica familiacunallami visitai ushan carca.Chaimi congregacionmanda shuj huauquiguca cartacunata escribishpa, publicaciongunatapash cachamushpa ñuca causaita cambiashpa catichun ninanda animahuarca.

 Ashtaca huatacunata pandillapi cashca cashpashmi chai pandillata saquinata decidircani. Chai pandillapa jefepash, ñucapashmi chaipillata vichai tucushca carcanchi. Chaimi paipaman quimirishpa ñucaca testigo de Jehovami tucungapaj munani nircani. Paica: “Ciertopachachu shina nijungui, testigo de Jehová tucungapaj munashpaca tucuilla, Taita Diospa cosascunata ruranataca na jarcai ushanichu nihuarca. Shinapash pandillata saquishca jipa ima pasanataca ñami yachangui” nihuarca.

 Ishcai huata jipaca guardiacunaca ñuca ashtacata cambiarijushcatami cuenta urmarca. Chaimandami ñana yapa cuidahuanajurca. Bañomanbash ñana maquita huatashpa apahuanajurcachu. Shuj guardia ñucapaman quimirimushpaca cambiarishpa catijuilla nishpami nihuarca. Shinallata autoridadcunapash na yapa nali gentecunata vichashca ucupimi churahuarca. Chaipimi ultimo huatata carcani. 2004 huatapimi 10 huatacunata carcelpi cashca jipa, ñucataca carcelmanda llujchishpa México llactaman carcelmanda buspi cachahuarca.

 Huaquin punllagucunata México llactapi cashpami Testigo de Jehovacunapa Tandanajui Huasita tarircani. Primera vez tandanajuiman rishpaca carcelmanda ropatalla alillataguta charimandami chai ropahuan tandanajuimanga rircani. Shina rijpipash testigo de Jehovacunaca juyaihuanmi chasquihuarca. Juyaihuan chasquishcamandami Jesusta ali catijcuna cashcata cuenta urmarcani (Juan 13:35). Chai punllallatami anciano huauquicunaca Bibliata ñuca yachajuchun arreglocunata rurarca. Shuj huata jipami 3 de septiembre de 2005 huatapi bautizarishpa testigo de Jehová tucurcani.

 Enero de 2007 huatapica 70 horascunatami gentecunaman Bibliamanda cada quilla yachachi callarircani. 2011 huatapica Escuela Bíblica para Varones Solteros nishca escuelamanmi rircani (cunanbica Diospa Reinomanda Villachijcunapa Escuela nishcami can). Chai escuelaman rinami congregacionbi ruranacunata aliguta pactachichun alipacha ayudahuarca.

 2013 huatapica ñuca juyashca Pilar huarmiguhuanmi cazararcani. Ñuca punda causaimanda parlajpica na crimandami asishpa uyan. Nunca na pundashnaca portarishcanichu. Ñucapash, ñuca huarmigupashmi cunan ñuca imashna cashcata ricushpaca, causaipi cambiarichun Biblia ayudanbacha cashcata cuenta japinchi (Romanos 12:2).

 Lucas 19:10​pi Jesús nishca shimicunaca ñucamandami parlajun yanimi. Jesusca cashnami nirca: ‘Chingashca causajcunata mascashpa, quishpichingapami shamurcani’ nishpa. Ñana chingashcashnaca yarihuanllu. Ñana shujcunata llaquichishpaca purinichu. Biblia ayudashcamandami cunanga aliguta causangapaj esforzarini. Cunanga tucui gentecunahuanmi aliguta llevarini. Ashtahuanbachaca ñucata rurashca Jehová Diospa amigomi capani.