Ñucaca Tirana llactapimi nacirircani. Chai llactaca Albania llactapa capitalmi carca. Ñuca familiaca pobregumi carca. Ñuca taitaca honradomi carca. Ñucanchita mantiningapaca ashtacatami trabajan carca. Shinapash chai culquica apenasmi pactan carca. Huahua cashpaca, ñucanchicuna pobregucuna cashcataca cuenta japinmi carcani. Chaimandami llaquilla can carcani. Casi nunca na zapatocunataca charircanichu. Huaquinbica micunagutapash na charinllu carcanchi.

 Uchilla huambra cashcamandapachami shuan carcani. Shuashpami familiataca ayudajuni yan carcani. Pero jipamanga policiaca japihuarcami. Huata 1988pimi jovengunata ayudangapaj nishca reformatorioman ñucataca cachahuarca. Chai huatapica 14 huatagucunatallami charircani. Chai reformatoriopi ishcai huatacunata cashpami, fierrocunata soldanata yachajurcani. Chaimanda llujshishpaca, honradamente trabajashpa culquita ganangapami munarcani. Shinapash trabajotaca na tarircanichu. Albania llactapica, politicamandami ashtaca problemacuna tiarca. Chaimandami chai llactapi trabajota tarinaca dificilpacha carca. Chaimi ñucaca ninanda desanimarircani. Ñucapa punda nali amigocunahuan tandanajushpami, cutin shuai callarircani. Jipamanga tucuillatami policiaca japishpa carcelman churarca. Quimsa huatapami sentenciai tucurcanchi.

 Carcelmanda llujshishca jipaca, cutinmi nali puri callarircani. Albania llactapica culquica na tiarcachu, problemacunallami mirashcarca. Culquica nimapa na pactanllu carca. Chaimi ashtaca culquita ganangapaca, na legal cosascunata rurai callarircani. Ñuca cumbacunataca armacunahuan shuanajujtami policiaca japirca. Ama paicunatashna preso japihuachun y ama ashtaca huatacunata preso cangapami, Albania llactamandaca pacajushpa rircani. Chai tiempopica ñami ñuca huarmigu Julindahuan cazarashca carcani. Shuj llullu huahuagutapashmi charircani.

 Inglaterramanmi causangapaj rircanchi. Ñucaca ñuca huarmihuan y ñuca huahuaguhuan desde cero causai callaringapami munarcani. Pero siempremi cutin imata rurajushcata ruran carcani. Chaipica droga negociopi satirishpami ashtaca culquita japi callarircani.

 Drogacunapi satirijta ricushpaca ¿imatata Julindaca nin carca? Paica ninmi: “Albania llactapi viñaimandaca, pobre canata saquinatami munan carcani. Ashtahuan ali causanamandaca imatapash rurashallami ninmi carcani. Culquita charishpaca ali causashallami yanmi carcani. Shina pensashpami ñuca cusataca, llullana cajpi, shuana cajpi, drogacunata yalichina cajpipash ayudanlla carcani. Culquimandaca imatapash ruranllami carcani” ninmi.

 Pero huata 2002pimi ñucanchi causaica cambiarca. Ñucaca ashtaca drogacunata yalichijushpami japi tucurcani. Chaipimi ñucanchicuna ali causana munaicunaca tucurirca.

 Nara cuenta japijpillatami Bibliaca ñuca causaita cambiai callarishcarca. Ñuca huarmigu Julindaca huata 2000pimi testigo de Jehovacunahuan Bibliata estudiai callarishcarca. Pero ñucaca Bibliapica na interesarinllu carcani. Bibliata estudianaca aburridomi can yanmi carcani. Pero Julindaca Bibliata estudianataca gushtanmi carca. Paica ninmi: “Ñuca familiaca Taita Diosmanda uyanata gushtanmi carca. Chaimi ñucaca Bibliata respetan y gushtan carcani. Siempremi Bibliapi imata yachachijujtaca yachangapaj munan carcani. Testigo de Jehovacunahuan Bibliata estudiai callarishpaca cushijushcami can carcani. Testigocunapa yachachishcacunata uyashpaca, alimi can, razonbimi shina ninajun yanmi carcani. Paicunahuan Bibliata yachajushpami ñuca causaipica, huaquin cambiocunata rurai callarircani. Pero shina cashpapash, culquita charishpami cushilla causasha yanmi carcani. Pero ñuca cusaguta preso japijpica, ñana shina pensarcanichu. Imapash chiri yacuta shitajpishnami culquimanda Bibliata imata yachachijujtaca ali intindircani. Culquita charinamandami imata cashpapash ruranlla carcanchi. Shinapash na cushilla causan carcanchichu. Chai ratopimi Taita Diospa mandashcacunataca tucuipi cazuna cashcata, ni shuj mandamientota na saltana cashcata yachajurcani” ninmi.

 Huata 2004pimi carcelmanda llujshircani. Ñapashmi cutin droga negocioman tigrangapaj munarcani. Pero ñuca huarmiguca cambiashcarcami. Paica cashna nishpami ñucataca pensachihuarca: “Ñana canba culquitaca munanichu. Quiquinmi ñuca cusa y ñuca huahuacunapa taita cangui. Paicunahuan y ñucahuan caipi cachunmi munani” nirca. Shina nijpimi ñucaca chiri quidarcani. Paica alitami nijuhuarca. Ashtaca huatacunatami ñuca familiamanda carupi cashcarcani. Shinallata, culquita charinamandalla ashtacata sufrishcatami yarircani. Chaipimi ñuca causaipi cambiocunata rurangapaj y punda amigocunamandapash caruyangapaj pensarircani.

 Shuj punllaca ñuca huarmiguhuan y ñuca huahuacunahuanmi testigo de Jehovacunapa reunionman rircani. Chaipica, cushilla ali ali gentecunatami ricurcani. Chaita ricushpami Bibliata estudiangapaj aceptarcani.

 Bibliapica ‘culquita juyana tucui laya nali ruraicunata callarichijta. Culquita juyaimanda, huaquingunaca Taita Diospi confianata saquijta y tucui laya sufrimientocunatapash charijtami’ yachajurcani (1 Timoteo 6:9, 10). Chai shimicunaca ciertomi can. Ñuca causaipica ashtaca cosascunatami nali rurarcani. Chai tucui cosascunamandaca ninanda arrepentidomi carcani. Ñuca familiataca ashtacatami llaquichishcarcani (Gálatas 6:7). Shinallata Jehová Diospa y paipa Churi Jesucristopash ñucata ninanda juyajtami yachajurcani. Chaimi cambiocunata rurai callarircani. Ñucapi ashtahuan preocuparinapa randica, shujcunapi preocuparina cashcatami yachajurcani. Ñuca familiahuanbash ashtaca tiempotami yali callarircani.

 Bibliapica “ashtahuan culquita charinatalla munashpaca, na causanachu canguichi. Chaipa randica, imaguta charishpapash chaihuanlla cushijushpami causana canguichi” nishpa consejan (Hebreos 13:5). Chai consejota catinami ñucataca ninanda ayudahuashca. Cunanga tranquilo alimi sintirini. Shinallata ñuca concienciapipash limpiomi sintirini. Nunca na cashna cushillaca causashcanichu. Ñuca huarmiguhuanga alimi causanchi. Ñuca huahuacunahuanbash shujllashnami canchi.

 Pundaca culquita charishpami cushilla causasha yanmi carcani. Pero cunanga, culquipi yapata pensarimanda ashtaca llaquicunata charishcatami cuenta japishcani. Culquimandami, shua, llulla tucurcani. Cunanbica na charijchu canchi. Pero Jehová Diospa amigocuna canaca, ashtaca culquitapash yali valishcapachami can. Ñuca familiahuan tandanajushpa Jehová Diosta adorashpami cushillapacha causani.