“Ciertopacha Bibliamanda yachajungapaj munashpaca testigo de Jehovacunahuanmi catina cangui”. Cai shimicunata uyashpaca manllarishcami quedarcani. Chai tiempopaca Testigocunahuanmi Bibliamandaca yachajujurcani. Shinapash imamanda manllarishca quedashcata yachachunga, ñucapa causaimanda ashaguta parlapasha.

 Salvadoreña de Quezaltepeque llactapimi nacirircani. Huahuapuracunaca 15​mi canchi. Ñucaca pichapa catimi cani. Ñucapa taitacunaca honrado, llactapa leycunata respetashpa viñachun nishpami ali yachachingapaj esforzarirca. Chai tiempopica Leonardo jari testigo, shinallata ishcai testigo huarmigucunapashmi huaquinbica Bibliamanda yachachingapaj shamun carca. Shinapash Bibliamanda yachachishcacunata na cazushpami cutin cutin nali desiciongunata japircani. 14 huatacunata charishpami escuelamanda cumbacunahuan ufiai callarishpa, drogacunatapash chupai callarircani. Chai cumbacunaca asha ashami escuelata saquishpa, shuj pandillacunahuan puri callarirca. Ñucapash paicunapa nali ejemplotami catircani. Cada punllami callecunapilla yalin carcanchi. Ñucanchicunaca drogata chupangapaj, tragota ufiangapami ñangunapi gentecunata culquita mañashpa yalin carcanchi. Shuhuaitapashmi shuhuan carcanchi.

 Chai pandillaca ñucapa familiami tucurca. Paicunata saquingapaca na munarcanichu. Shuj punllaca ñucanchipuramanda shuj pandilleromi drogarishca caimanda ñucapa vecinota macai callarirca. Chaimi ñuca vecinoca ñuca cumbata japishpa policiata cayarca. Ñuca cumbata cacharichun munaimandami ninanda culirashpa ñuca vecinopa carrota shuj caspihuan huactai callarircani. Ñuca vecino ama shinapaichu nishpa rogajujpipash na uyashpami carropa ventanacunata, carropa shuj partecunatapash faquishpa tucuchircani.

 Shuj viajeca ñuca pandillaca policiacunahuanmi macanajui callarirca. Chaimi huasipi rurashca shuj bombata policiacunaman shitangapaj munarcani. Ña shitagrijujhuanmi chai bombaca ñuca maquipillata tujyarca. Ñuca ali lado maqui tucurishcata ricushca jipaca desmayashcatami yarini. Hospitalpi rijcharijpica doctorcunaca maqui illanguimi nishpami villahuarca. Shinallata ali lado rinllipash sordo, ali lado ñavihuanbash casi ñaña ricujurcanichu. Chaipica 18 huatacunatami charircani.

 Shina cashpapash hospitalmanda llujshishpaca ñucapa pandillacunahuanllatami cutin tigrarcani. Asha tiempo jipaca policiacunamanda japi tucushpami carcelman rircani. Carcelpi cashpaca ashtahuanmi pandillerocunahuan llevari callarircani. Punlla enteromi paicunahuan yalin carcani. Tutamandata marihuanata chupai callarishpaca puñuna horascamanmi shina yalin carcanchi.

 Carcelpi cajpimi Leonardoca visitangapaj shamurca. Ñucahuan parlajushpaca ñuca rigrapi tatuajeta ricushpami “Cai tatuaje ¿imata nisha nijta yachanguichu?” nishpa tapuhuarca. Shina nijpica ñucaca: “Ari, huainayana, drogacuna, rock and roll musicami can” nircanimi. Shinapash Leonardoca cashnami nirca: “Ñucapa yaipica hospital, cárcel, huañuimi can. Hospitalpica ñami cashcangui, cunanga carcelpimi cangui. Jipaman ima pasanataca ñami yachangui” nihuarcami.

 Chai shimicunami ñucataca pensachihuarca. Paica ciertotami nijurca. Ñucapa causaica huañuimanmi apajuhuarca. Leonardoca Bibliata paihuan yachajuchunmi animahuarca. Chaimi ari nircani. Bibliapi yachajushcacunami cambiocunata rurachun ayudahuarca. Por ejemplo, Bibliapica “Nali cumbacunahuan tandanajushpaca, alita rurashpa causanajushcatapashmi saquinguichi” nijunmi (1 Corintios 15:33 NM ). Chaimi callaringapaca ali amigocunata mascana carcani. Ñuca pandillahuan tandanajunapa randica, carcelpi tiashca testigo de Jehovacunapa tandanajuimanmi ri callarircani. Chai tandanajuipica carcelpi bautizarishca Andres shuti Testigotami rijsircani. Paica paihuan desayunachunmi invitahuarca. Chai punllamandami tutamandacunapi marihuanata chupanataca saquircani. Chaipa randica cada tutamandami paihuan Bibliamanda shuj textota yachajun carcanchi.

 Asha tiempo jipaca pandillamanda cumbacunaca ñuca cambiarijushcatami cuenta urmarca. Chaimi pandillata ñaupaman pushajca canhuanmi parlangapaj munani nihuarca. Shina nijpica ñuca imata ruragrijushcata yachai chayashpaca, imatapash rurahuanga yashpami manllajurcani. Shuj pandillamanda llujshinaca na facilchu can. Paica “ñucanchicunahuan ñaña tandanajungapaj shamushpa, testigo de Jehovacunahuan tandanajungapaj rijtami ricushcanchi. Imata ruranatata pensajungui nihuarcami”. Chaimi Bibliata yachajushpa ñuca causaita cambiangapami munani nircani. Shina nijpica paica, can ciertopacha testigo de Jehová tucungapaj munajpica respetashunmi nihuarca. Shinallata nircami “Ciertopacha Bibliamanda yachajungapaj munashpaca testigo de Jehovacunahuanmi catina cangui. Nali cosascunata saquishpaca alimi canga. Camba causaita cambiangapaj munashcamandaca cushijunimi. Testigo de Jehovacunaca camba causaita cambiachunga ayudangami. Ñucapashmi Estados Unidos llactapi paicunahuan Bibliata ashata yachajujurcani. Ñucapa huaquin familiacunapashmi testigo de Jehovacuna can. Shinaca ama manllashpa ñaupaman catilla” nihuarcami. Manllarishca cashpapash shina nishcamandaca cushijushcami carcani. Jehová Diostami ninanda agradicircani. Shuj urpiguta jaulamanda cacharijpishnami sintirircani. Chaipimi Jesuspa nishca shimicunata ashtahuan intindircani. Paica “Shina cashpami, na llullashpa villajtapash rijsinguichi. Chai na llullashpa villashcami, cangunataca cacharichinga nircami” (Juan 8:32).

 Shinapash pandillamanda huaquin cumbacunaca ciertopacha drogacunata saquishcata o na saquishcata yachangapami drogacunataca caran carca. Chaimi huaquinbica drogacunata cutin chupan carcani. Shinapash tiempohuanga Jehovata ninanda mañashpami drogata chupana, tragota ufiana viciotapash saqui usharcani (Salmo 51:10, 11).

 Carcelmanda llujshijpica ashtacacunami pensarca punda causaimanmi tigranga nishpa. Shinapash chaitaca na rurarcanichu. Chaipa randica carcelpi presocunaman Bibliamanda yachachingapami cutin cutin carcelman visitangapaj rin carcani. Shinami ñucapa punda amigocunaca ciertopacha cambiashcata cuenta japirca. Shinapash pandillapi ñuca cajpi contra cashcacunaca ñuca cambiashcataca na crircachu.

 Shuj punllaca shuj huauquihuan villachijujpimi, pandillapi cajpi contra cashcacunaca armacunahuan shamushpa ñucanchitaca manllachirca. Shinapash ñucahuan villachijuj huauquica chai pandillacunataca respetohuan, na manllashpami paica ñaña shuj pandillapi purijunllu nishpa villarca. Ñucaca tranquilo cangapami esforzarircani. Ñucata macashpa, ama cutinga caiman shamunguichichu nishca jipami ñaña armacunahuan manllachishpa ñucanchitaca chai pushtumanda richun saquirca. Bibliata yachajuimandami ñuca causaitaca cambiashcani. Pundashna cashpaca ñucata macashcamandaca paicunatapash shinallata macasha nishpami pensajuiman carcani. Cunanga 1 Tesalonicenses 5:15​pi nishca consejota pactachingapami esforzarini. Chaipica “Cangunata nalita rurashcamanda, maijambash ama chashnallata tigrachijuchun ricurianami canguichi. Ashtahuangarin caishuj chaishuj, tucuicunaman alitalla rurashpami catina canguichi” nijunmi.

 Testigo de Jehová tucushcamandaca honrado cangapami esforzarijushcani. Shinlli cajpipash Jehová Diosmi ayudahuashca. Shinallata Bibliapa consejocuna, cunanbi charishca ali amigocunapashmi ayudahuashca. Pundashna cutin causangapaca ñaña munanichu (2 Pedro 2:22).

 Pundaca millai millaimi carcani. Pihuanbash macanajunllami carcani. Bibliata na yachajushca cashpaca talvez ña huañushcami caiman carcani. Bibliata yachajushpami ñucapa yuyaicunata cambiashpa drogata chupanata, tragota ufiana viciotapash saqui ushashcani. Shinallata ñucapa contracunatapash juyaihuan tratanatami yachajushcani (Lucas 6:27). Cunanbi ñucapa mushuj amigocunaca ali cualidadcunata charichunmi ayudahuan (Proverbios 13:20). Cunanga imapa causajushcata ali yachashpami cushijushca cani. Jehová Diosca ñucapa nali rurashca cosascunata perdonaj Diosmi cashca (Isaías 1:18).

 Huata 2006​pica Escuela Bíblica para Varones Solteros nishcamanmi rircani. Huaquin huatacuna jipaca shuj ali huarmiguhuanmi cazararcani. Shuj ushigutami charinchi. Cunanga ñucapa tiempotaca shujcunata Bibliamanda yachachingapami utilizani. Congregacionbica anciano shinami sirvijuni. Joven huauquipanicunataca ama ñucashna llaquicunapi urmachunmi ayudani. Cunanga Bibliapi yachachishcacunata pactachingapami esforzarijuni. Shina rurashpallami paraiso alpagupi para siempre causai ushasha.