Paulca cazarashcami can, ishcai churigucunatami charin. Paica ninmi: “Ñuca llactaca ñapashmi llaquipi urmarca. Micunapash valishca valishcami tucurca. Huaquinbica micunata randingapami unaita filapi shayan carcanchi. Chayajpica micunapash casi nima na tianllu carca. Gentecunapash tullu tullumi tucurca. Yarjaimandapash callecunapi desmayanajurcami. Minishtirishca cosascunaca ushashcatami subirca, ñucanchi culquica nimapa na sirvijurcachu. Bancopi alichishca culquipash, seguropi ahorrashca culquipash, pensionbi japina culquipash tucuillami chingarirca” nishpa.

Chai llaqui punllacunapica ali yuyaita charishcatami Paulca ricuchina carca (Proverbios 3:21). Chaimandami Paulca nin: “Electricista profecional cashca cashpapash, ashalaguta ganana cashpapash ricurishca trabajopi trabajangapami munarcani. Huaquin trabajopica micunahuan o huasipa cosascunahuanmi pagan carca. Chuscu jabonda cujpica ishcaitaca huasiman apashpami ishcaitaca jatun cariani. Shinami asha asha 40 pollogucunata randishpa viñachircani, jaturcani. Chai culquihuanga 300 pollogucunatami randircani. Viñajpicarin, 50 pollocunatami 100 kilo sara jacuhuan cambiarcani. Shinami ñuca familiamanbash shujcunamanbash unaillata micunaguta carai usharcani” nin.

Paulca Taita Diosta cazujpi Taita Dios ayudanataca seguromi carca. Jesusca minishtirishca cosascunamanda ama yapata pinarinajuchunmi nirca: “Cangunapaj Taitaca, chaicunata canguna minishtijujtaca ña yachanmi” nishpa (Lucas 12:29-31).

Shinapash Taita Diospa contra Diabloca ashtaca cosascunapi preocuparichunmi munan. Huaquingunaca minishtirijpi na minishtirijpipash paicuna munashcata maimanda randingapami musparin. Ashtacacunacarin, ushashcata dibi tucushpami ‘culquita mañachijcunapa sirvij tucushpa’ ninanda llaqui apashca (Proverbios 22:7).

 Huaquingunacarin nali decisiongunatami ruran. Paulca ninmi: “Ashtaca rijsicunaca paicunapa familiata, amigocunata saquishpami caru llactapi trabajota mascangapaj rirca. Shinapash huaquingunaca papelcunata na charimandami trabajota na tarirca, policiamandapash pacajushpa purin carca, callecunapi puñun carcapash. Paicunaca Taita Dios imashina paicunapa llactapillata ayudajtaca na ricungapaj munarcachu. Shinapash ñucanchica, Taita Dios ayudanata yarishpami llaquipi cashpapash tucuilla familia tandanajushca canata mascarcanchi’ nishpa.

Paulca ninmi: “Jesusca nircami: ‘Na cayandi punllamanda yarishpa musparinachu canguichi. Punllandimi llaquicunaca tian. Ima llaqui shamushpapash punllandi yalijunllami’ nishpa. Chaimandami Taita Diosta cada punlla mañani, cunan punlla micunagutapash carahuangui nishpa. Jesús nishca shinaca cada punllami Taita Diosca micunaguta carashca. Huaquinbica na ñucanchi munashca micunata tarishcanchichu. Shinapash micunaguca nunca na faltarcachu. Shuj punllaca imata jatunajujta na yachashpapash filapimi shayarircani. Chayajpica yogurtami jatunajushcarca. Yogurtaca na gushtanichu. Shinapash chai tutaca chaigutapash micushpami puñurcanchi. Chai tucui tiempopi ñucapash ñuca familiapash micunaguta siempre charishcamandaca tucui shunguhuanmi Taita Diosta agradicini” nin. *

Paulca ninbashmi: “Cunanbica ñana culqui faltajlla causanajunchichu. Ama yapata pinarijungapaca Jehová Diospi * confiana cashcatami yachajushcanchi. Paita cazujpica siempremi ayudan. Salmo 34:8pi shimicunaca ciertomi cashca. Chaipica ninmi: “Mandaj Dios ali cajtaca, ricushpa yachaichiyari. Paitalla yariashpa causaj runaca, ninandami cushijun” nishpa. Chai textota yarishpami llactapi culquimanda cutin problemacuna tianataca ñana yapata pinarinchi.

Paulca ninbashmi: ‘Causaita charingapaca culquita, trabajotaca na minishtinchichu, micunatami minishtinchi. Chaimandami Bibliapi cai shimicuna pactarichun shuyanajunchi: ‘Pambapipash, jahua urcu umacunapipash granocuna tiachunmi’ shuyanajunchi. Chai punlla chayamungacamanga micunaguta, churajuna ropaguta charishpallata cushijushpami causashun. Bibliapica ninbashmi, charijyana munaitaca na charinachu canguichi. ‘Cunan imaguta charishpapash chaihuanlla cushijushpa causanguichi. Diosca cashnami nirca: “Candaca na jichushachu, na saquishachu” nishpa’. * Chai shimicunata yarishpami animarinchi” nin.

Paulpash paipa familiapash shinlli feta charimandami Taita Diostaca cazurca (Génesis 6:9). Chaimandami cunan punllacunapi o shamuj punllacunapi jatun llaquicuna tiajpica paicunapa ejemplota catishpa imata ruranata aliguta pensarina canchi.

Cutin, familiapi jatun problemacunata charishpa ama yapata preocuparingapaca ¿imatata rurana capanchi?