Doctorcuna, psicologocunaca ninmi, cushilla causangapaca shungupi ali sintirinami minishtirin nishpa. Chaimandami tauca gentecunaca shujcunata ayudangapaj paicunapa tiempotaca utilizan. Cutin shujcunaca juyailla artesaniacunata ruranapi, ima musicatapash tocanata yachajunapi, o plantacuna, animalcuna imashina cashcata estudianapimi ocuparin. Shinapash, cushilla ali causaitaca na tarinllu.

Bibliata liijcunaca alimi yachan, gentecuna Diosmanda yachajuna munaita charishcata. Génesis libropica ninmi, Adanda Evata Dios rurashpaca paicunahuan cutin cutin parlashpami ali amigocunashna carca nishpa (Génesis 3:​8-10). Gentecunaca paicunapa juizu causaitaca na ushanllu. Diosmanda yachajunataca minishtinbachami. Chaitaca Bibliapica cutin cutinmi ricuchin.

Jesusca nircami: ‘Diosmanda yachajungapaj munajcunaca ninandami cushijun’ nishpa (Mateo 5:3). Jesús nishca shinaca, cushilla causangapaca Taita Diosmanda yachajunami minishtirin. Chaimandami Jesusca nirca: ‘Gentecunaca na tandahuanlla causangachu. Ashtahuangarin Taita Dios rimashca tucui shimicunahuanmi causanga’ nishpa (Mateo 4:4). Imashinami ricupashcanchi Diospa yuyaicunata, mandashcacunata Bibliapi yachajunami gentecuna cushilla causachun ayudan. Shinaca quimsa yuyaicunata ricupashun.

Cunanbica tauca estudiashcacunami shujcunahuan ali llevarichun, familiapi aliguta causachun, paicunapa causaipi imata ruranata yachajuchun gentecunataca consejan. Shinapash ¿ñucanchita Ruraj Jehová Diosta yalica, pipash ali consejocunata cui ushanllu?

Pensaripashun. Shuj camarata o shuj computadorata randishcanguiman. Imashina funcionajta, imashina utilizanata yachangapaca ¿nachu  shuj manual nishca librota minishtipanguiman? Bibliapash shuj manual libro cuendami can. Bibliataca ñucanchita Ruraj Taita Diosmi cushca. Bibliallami, gentecunata Taita Dios imapa rurashcata, gentecuna cushilla causachun imata ruragrijushcatapash nin.

Shuj manual libro cuendami Bibliaca, ima cosascuna ñucanchi causaipa nali cajta yachachin. Huaquinbica gentecunapa consejota catinaca jahuallami can. Shinapash llaquicunapi ama urmangapaj, cushilla causangapaca ¿nachu ñucanchita Ruraj Taita Diospa consejocunata catina ali canman?

Jehová Dios ñucanchita yachachishpapash, munai na munai paita cazuchunga na munanllu. Ashtahuangarin ñucanchita juyaimanda ayudangapaj munashpami nin: ‘Ñucami cangunata Mandaj Taita Dios cani. Ñucami cangunapa ali cachun yachachini. Canguna maijan ñanda rinatapash ñucami ricuchini. ¡Ñuca mandashcacunata cazujpica, jatun yacushnamari casilla aliguta causanaca na tucurinman carca! Imatapash cashcatapacha ruranapash, mama cucha yacu caiman chaiman cuyurinshnami canman carca’ nishpa (Isaías 48:​17, 18). Shinaca Taita Diospa yachachishcata catishpallami aliguta causashun. Imashinami ricushcanchi, ali causangapaca Taita Diostami minishtinchi.

Ashtacacunaca Diosta na minishtinichu, Diospi na crinichu ninmi. Paicunaca yanmi, ñucanchita Dios juyashpaca llaquicuna tiachunga na saquinmanllu nishpa. Chaimandami nin: “¿Imamandashi gentecunaca ninanda sufrin? ¿Imamandata na sano huahuagucuna nacirin? ¿Cashnapacha llaquicunahuanllu causana cani?” nishpa. Llaquicuna imamanda tiashcata ali intindishpaca cushillami sintirishun. Diostapash na culpashunllu. Shinaca Biblia imata yachachijta ricupashun.

Génesis capítulo 3​pica Adanda Evata Diablo imashina pandachishcatami parlan. Taita Diosca Adanda Evataca nircami: Alita, nalita yachaita cuj yuramandaca ama micunguichichu nishpa. Shinapash Diabloca shuj culebrata parlachishpami Evataca nirca: ‘Na huañunguichica. Ashtahuangarin chai yuramanda ima punlla micushpapash, cangunapa ñavi pascarijpimi Taita Dios yachanshnallata alita, nalitapash yachanguichi. Chaitaca Taita Diospash yachanmi’ nishpa (Génesis 2:​16, 17; 3:​4, 5).

Diablo shina nishpaca Dios llulla cashcata, Dios nali mandaj cashcatami nijurca. Shinallata Diosta cazunapa randica ñucata cazushpami gentecunaca ali causanga nijurcami. Shinaca Jehová Diosca ¿imamandata na chai ratollata Diablo llullajushcata ricuchirca? Jehová Diosca  Diablopa nishcacuna llulla cashcata gentecunallata cuenta japichunmi saquirca.

Pensaripashunchi. Diospa ayudata na charishpaca ¿gentecunaca paicunapa juizu aliguta causai ushashcachu? Cunanbica nali gentecuna, shujcunata llaquichijcuna, ungüicuna, huañuicuna, shuhuacuna, guerracuna o ashtahuan jatun llaquicunami tian. Tucui cai llaquicunata ricushpami intindinchi, alliguta causangapaca gentecunaca Diospa ayudata minishtishcata. Shinaca llaquicunamanda Diosta juchachinapa randica, imamanda llaquicuna tiashcata intindichunmi Bibliapica nin: ‘Runaca paipa llaquipallatami caishuj runataca llaquichishca’ nishpa (Eclesiastés 8:9).

Shinaca, llaquicuna imamanda tiashcata yachangapaj, chai llaquicuna tucurinata o na tucurinata yachangapaca Diospa ayudatami minishtinchi.

Ñaupa punllamandallatami gentecunaca na ungushpa, na rucuyashpa, na huañushpa aliguta causangapaj munan. Paicunapa culquita, tiempota, fuerzata utilizashpapash aliguta causaitaca na ushashcachu. Huaquingunaca ama ungungapaj, ama rucuyangapaj, ama huañungapaj nishpami imapash jihua yacucunata ufian, ejerciciocunata ruran, brujocunapaman rin. Shinapash cushilla causaitaca na tarishcachu.

Gentecunata Taita Dios rurashpaca cushilla causachunmi rurarca (Génesis 1:​27, 28; Isaías 45:18). Jehová Diosca tucui paipa nishcacunatami pactachinga (Isaías 55:​10, 11). Bibliapica yachachinmi, Adanba Evapa punllacunapishna Taita Dios cai Alpata shuj juyailla paraisota ruranata. Chaimandami Apocalipsis 21:4​pica nin: “Taita Diosmi paicunapaj ñavimandaca, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu. Punda ima tiashcapash illangami” nishpa. Cai Alpa shuj paraíso cachunga ¿imatata Taita Diosca ruranga? ¿Imashinata beneficiarishun?

Jesusca paipa catijcunataca Diospa munai pactarichun mañana canguichi nishpami yachachirca. Chai oraciondaca ashtaca gentecunaca padrenuestro nishpami rijsin. Chai oracionbica cashnami nin: ‘Jahua pachapi tiajuj ñucanchi Taitalla, canba jucha illaj shutiguca alicachi tucushca cachun. Can mandana [“Reino”, NM] ucha chayamuchunmi munanchi. Imashinami jahua pachapica can munashcashna ruranajun, chashnallata cai pachapipash can munashcashna ruranajushpami ali canman’ nishpa (Mateo 6:​9, 10). Cai Reinomi gobiernocunapa nali ruraicunata tucuchishpa, cai Alpataca shuj juyailla paraisota ruranga (Daniel 2:44; 2 Pedro 3:13). * Ñucanchicunaca ¿imatata rurana capanchi?

 Jesusca nircami, na huañushpa causangapaca Taita Diosmandapash paimandapash yachajuna minishtirishcata (Juan 17:3). Imashinami yachajupashcanchi, Jehová Dios ayudajpillami paraíso Alpapi na huañushpa causashun.

Dos mil huatacuna huashamanmi Atenas llactapa Areopagopica apóstol Pabloca alipacha yachajushca griegocunataca nirca, Diosmi ‘causaita, samaita, imata munashcatapash tucuicunaman caramujun. Paimandami causanchi, purinchi, imatapash ruranchi. Cangunapuracunamanda ali yachajushca runacunapash ninmi: “Ñucanchica Diospa huahuacunami canchi”’ nishpa (Hechos 17:​25, 28).

Atenas llactapi gentecunaman apóstol Pablopa nishca shinaca, samaita, micunata, yacuta Taita Dios carajpimi ñucanchica causanchi. Shinapash ¿imamandata ashtaca gentecuna Diospi na crijpipash Diosca ayudashpa catin? Apóstol Pabloca ninmi: ‘Ñucanchi causashpallata Taita Diosta mascashpa paita tuparichunmi munan. Ashtahuangarin paica ñucanchimandaca na carupi canllu’ nishpa (Hechos 17:27).

¿Taita Diosmandapash, pai imata ruragrijujtapash yachajungapaj munapanguimanllu? Cunanmandallata ¿imashina cushilla aliguta causanata yachajungapaj munapanguimanllu? Shinaca cai revistata saquishpa purijcunahuan o cai revistata escribijcunahuan parlachunmi animapanchi. Paicunaca cushijushpami ayudapanga.