Salmo 65:2​pica ninmi: “Mañanajujtaca, canmi uyajungui. Cambajmanmi, tucui gentecuna shamunga”.

Huaquin gentecunaca ali sintiringapaj munaimandallami Taita Diostaca mañan. Shinapash paicunapa mañashcacunataca nipipash na uyanllu yashpami pensarin. Shinapash Taita Diosta mañanaca ali sintiringapalla, problemacunahuan cashpa ñaupaman catingapallaca na canllu. Bibliapica “Mandaj [Jehová *, NM] Diosca, tucui yuyaihuan paita mañajcunata ayudangapaca ladopimi [...]; Shinallata paicuna caparishpa mañashcatapash” uyanmi ninmi (Salmo 145:18, 19).

Shinaca Taita Dios paipa sirvijcunapa mañaicunata uyajtaca seguromi caita ushapanchi. Shinallata Taita Diosca “ñucata mañanguichi. Ñucapajman shamushpa mañajtaca, ñucapash uyajushami” ninmi (Jeremías 29:12).

Romanos 12:12​pica ninmi: “Diostaca, na cungashpami mañajunalla canguichi”.

Taita Diosta siempre mañachunmi Bibliapica yachachin. Shinaca Jehová Diosca paita mañachunmi munan (Mateo 26:41; Efesios 6:18).

Taita Diosca ¿imamandata paita mañachun munan? Chaipaca caipi pensaripashun: Tucui taitacunallatami paicunapa huahuacuna paicunata ayudata mañachun munan. Taitacunaca paicunapa huahuacuna ayudata minishtijujta, imashina sintirijushcata yachashpapash paicunapacha ayudahuai nijpimi taitacunaca huahuacuna paicunapi confiashcata, paicunata juyashcata sintin. Shinallatami ñucanchipash Jehová Diosta mañashpaca paipi confiashcata, paipaman quimiringapaj munashcata ricuchinchi (Proverbios 15:8; Santiago 4:8).

1 Pedro 5:7​pica ninmi: “Diosmi cangunataca cuidajun. Shina cajpimi ima llaqui japijpipash, paiman mingashpa saquina canguichi”.

Taita Diosca ñucanchita juyaimanda, ñucanchimanda preocuparimandami paita mañachun munan. Ñucanchi ima llaquicunahuan cajtapash alimi yachan. Chaimi paica ayudangapaj munan.

Rey Davidca siempremi pai imashina sintirishcata, imata pensashcata villashpa Jehová Diosta mañan carca (Salmo 23:1-6). Cutin Taita Diosca Davidta ninanda juyaimandami paipa mañaicunataca uyan carca (Hechos 13:22). Shinallatami Taita Diosca ñucanchita juyaimanda ñucanchi mañaicunataca uyan.

Cai shimicunataca Bibliapi Salmos libropimi nijun. Cai shimicunata escribij runaca paipa mañaicunata Jehová Dios uyajtaca seguromi carca. Chaimi paitaca Taita Diosman ashtahuan quimirichun, llaquicunahuan cashpapash ñaupaman catichun ayudarca (Salmo 116:1-9).

Taita Dios ñucanchi mañaicunata uyajta seguro cashpaca siempremi paitaca mañashun. España llactapi causaj Pedro jariguta ima pasashcata ricupashunchi. Paipa churiguca 19 huatacunatalla charishpami carro accidentepi huañurca. Chai llaquicunapi cashpami Pedroca cai llaquita aguantachun ayudahuai nishpa Taita Diostaca cutin cutin mañarca. ¿Taita Diosca paipa mañaicunataca uyarcachu? Pedroca ninmi: “Jehová Diosca ñuca mañaicunataca uyarcami. Taita Diosca huauquipanicunahuanmi ñucata, ñuca huarmigutapash ali sintirichun ayudarca”.

Pedropa churi na causarijpipash Taita Diosta mañanami Pedrota, paipa familiatapash aguantashpa catichun ayudarca. Pedropa huarmigu María del Carmenga ninmi: “Taita Diosta mañanami llaquita aguantachun ayudahuarca. Taita Diosta mañashpaca tranquilami sintirin carcani. Chaimi Jehová Dios imashina ñuca sintirijta intindishcataca segura carcani”.

Bibliata ricushpa, gentecuna Taita Diosta mañajpi imashina ayudashcata ricushpami Taita Dios mañaicunata uyajta yachapanchi. Shinapash Taita Diosca na tucui mañaicunataca uyanllu. Pero ¿imamandata na tucui mañaicunataca uyan?