Lucas 22:1-71
-
Sacerdotecunaca Jesusta imashina huañuchinatami parlarin (1-6)
-
Último Pascuata rurangapami tucuita alistan (7-13)
-
Jesuspa Cena (14-20)
-
“Ñucata traicionagrijuj runaca, ñucahuanmi caipi tiajun” (21-23)
-
Pi ashtahuan importante cashcatami rimarinajurca (24-27)
-
Jesusca shuj Gobiernopa tratotami paipa apostolcunahuan rurarca (28-30)
-
Na rijsinichu nishpa Pedro neganatami Jesusca nin (31-34)
-
Listomi cana can y ishcai espada (35-38)
-
Olivos shuti lomapimi Jesusca Taita Diosta mañarca (39-46)
-
Jesustaca prezo japircami (47-53)
-
Pedroca Jesustaca na rijsinichu nishpami negarca (54-62)
-
Jesusmandami burlarin (63-65)
-
Jatun Corte Ucupimi Jesustaca juzgan (66-71)
22 Levadura Illa Tandata Rurana Fiestami* chayamujurca. Chai fiestatami Pascua nin carca.
2 Importante sacerdotecunapash y Leyta yachachijcunapash gentecuna culiranata manllaimandami, Jesusta imashina huañuchinata pensarinajurca.
3 Chaipimi Diabloca* Judaspa shunguman yaicurca. Judas Iscarioteca Jesuspa 12 apostolcunapuramandami carca.
4 Judasca Jesusta imashina prezo japichinata parlaringapami importante sacerdotecunapaman y Taita Diospa templo huasipi guardiacunapa jefecunapaman rirca.
5 Judas imata nijta uyashpami paicunaca ninanda cushijushpa culquita pagashunllami nirca.
6 Chaimi Judasca ari nishpa, gentecuna na ricujta Jesusta traicionashpa ima hora japichinata ricushpa purijurca.
7 Levadura Illa Tandata Rurana Fiestami chayarca. Chai punllapimi Pascua animalta huañuchina costumbre tiarca.
8 Chaimi Jesusca Pedrota y Juandaca cashna nishpa cacharca: “Pascua micunata micungapaj alistangapaj ripaichi”.
9 Chaimi paicunaca ninajurca: “Pascua micunataca ¿maipita rurachun munapangui?”.
10 Chaimi Jesusca nirca: “Jerusalén llactaman rishpaca, yacu funduta apashpa rijuj shuj runaguhuanmi tuparinguichi. Paitami catishpa rina canguichi. Pai maijan huasiman yaicujpipash, chaimanmi yaicuna canguichi.
11 Huasi dueñotaca nipanguichi: ‘Yachachijca nipanmi, “maijan cuartogupita ñuca discipulocunahuanga Pascua micunata micuita ushapani”’.
12 Chaimi chai runaguca, shuj jatun cuartota ricuchinga. Chai cuartoca jahua altibajopimi ña listo canga. Pascua micunataca chaipi alistapanguichi” nircami.
13 Shina nijpimi Jesuspa discipulocunaca rirca. Jesús nishcashnami, shuj runaguhuan tuparirca. Chai runagumi shuj cuartota paicunaman ricuchirca. Chaipimi paicunaca Pascua micunata micungapaj tucuita alistarca.
14 Shinaca, ña tutayajpimi Jesusca apostolcunahuan micungapaj mezapi tiarirca.
15 Chaipimi paicunataca nirca: “Ñuca sufrina tiempo nara chayamujpillata, cangunahuan cai Pascuapi micungapaca ninandami shuyajushcani.
16 Cangunataca ninimi, Taita Diospa Gobierno mandajpi tucui pactaringacamanmi, Pascua micunataca cutinga na micusha” nirca.
17 Chai jipaca, shuj vino copata cujpi japishpami Jesusca, Taita Diosta pagui nishpa mañarca. Chai jipami paipa discipulocunataca nirca: “Cai copamanda ufiashpa cada unoman yalichipaichi.
18 Ciertopachami cangunataca nini, cunanmanda vichaica Taita Diospa Gobierno shamungacamanga cai vinomandaca cutinga na ufiashachu” nishpa.
19 Jipamanga shuj tandagutapash japishpami Jesusca Taita Diosta pagui nishpa mañarca. Chai jipaca, chai tandaguta partishpami, paipa discipulocunaman cushpa nirca: “Cai tandaguca ñuca cuerposhnami can. Cai cuerpotami cangunapallata ali cachun cangunamanda cusha. Ñucata yarijushcata* ricuchingapami cashna rurashpa catina capanguichi” nirca.
20 Micunata micushca jipaca, vino copatapash japishpami nirca: “Cai vino copaca, shuj mushuj tratotami* ricuchijun. Cangunapa alipallata ñuca yahuarta jichajpimi, cai mushuj tratoca callaringa.
21 ”Shinapash, ñucata traicionagrijuj runaca, ñucahuanmi caipi tiajun.
22 Runapa Churica* Taita Dios paimanda imata nishcataca tucuitami rurajun. Shinapash Runapa Churita traicionashpa japichij runaca, aij imachari tucunga”.
23 Chaita uyashpami Jesuspa discipulocunaca, pita Jesustaca traicionagrinyari nishpa paicunapura tapuri callarirca.
24 Chai jipami Jesuspa discipulocunaca, paicunapuramanda pi ashtahuan importante cashcata rimarinajurca.
25 Pero Jesusca paicunataca nircami: “Llactata mandajcunami gentecunataca paicuna munashcashna mandan. Autoridadta charij gentecunataca, shujcunata ayudaj, ali gentecuna nishpami rijsinata yachan.
26 Shinapash cangunaca na shina canachu canguichi. Cangunapurapi mayorlla cajcunaca, ashtahuan jovenshnami cana can. Shinallata, ñaupaman pushajcunapash shujcunata sirvijcunashnami cana can.
27 Porque ¿pita ashtahuan importante can? ¿Micungapaj tiarijchu ashtahuan importante can? ¿O micunata sirvijchu ashtahuan importante can? ¿Nachu micungapaj tiarij ashtahuan importante can? Shinapash ñucaca, cangunata sirvij runashnami cangunapurapi cani.
28 ”Ashtahuanbash, ñuca llaqui apajujpica cangunami ñuca ladopi cashcanguichi.
29 Chaimi imashina ñuca Taitaca ñucahuan shuj tratota rurarca, shinallatami ñucapash cangunahuanga shuj Gobiernopa, shuj tratota rurajuni.
30 Ñuca mezapi micushpa, ufiashpa ñuca Gobiernopi canguna cachunmi chashna rurajuni. Shinallata mandangapaj tiarina 12 pushtucunapi tiarishpa, Israel llactapa 12 jatun familiacunata mandachunmi chashna rurajuni.
31 ”Simón, Simón, imashinami shuj runaca trigomanda jupataca aventashpa separan, shinallatami Diabloca quiquingunatapash rurangapaj munani nishca.
32 Pero Taita Diospi tucui shunguhuan crinata can ama saquichunmi ñucaca canmanda Taita Diosta mañashcani. Pero arripintirishpa tigramushpaca, canba huauquipanicunataca shinlli tucuchun ayudapangui”.
33 Chaimi Pedroca nirca: “Señor Jesús, canhuan igual carcelman rina cajpipash rishallami. Canhuan igual huañuna cajpipash huañushallami” nishpa.
34 Shinapash Jesusca nircami: “Pedro, na llullashpami candaca nini, cunan nara gallopash candajpillatami, canga quimsa viajecaman na rijsinichu nishpa ñucataca negagrihuangui” nishpa.
35 Caitapashmi nirca: “Micunahuan cara bolsopash illa, culquipash illa, churajungapaj shuj sandaliapash illa cangunata cachajpica ¿imapash faltarcachu?”. Shina nijpimi paicunaca “na imapash faltarcachu” nirca.
36 Chaimi Jesusca paicunataca nirca: “Shinapash cunanga, culquita charishpaca apashpa ringuichilla. Micunahuan cara bolsogutapash apanguichilla. Shinallata shuj espadata na charishpaca, cangunapa jahualla churajunata jatushpa shuj espadata randinguichilla.
37 Taita Dios escribichishca shimipica nijunmi: ‘Paitaca pecador runatashnami tratarca’ nishpa. Cangunataca ninimi, chashna nishpaca ñucamandami parlajun. Ashtahuangarin profetacuna ñucamanda parlashca shimicunami pactarijun” nirca.
38 Chaimi paicunaca nirca: “Señor Jesús ricupai, caipica ishcai espadatami charipanchi”. Shina nijpimi Jesusca nirca: “Chaicunallata suficientemi can” nishpa.
39 Chaimanda llujshishpaca, Olivos shuti lomaman rina costumbreta charimandami Jesusca chaiman rirca. Paipa discipulocunapashmi chaiman catishpa rirca.
40 Olivos shuti lomaman chayashpaca paicunataca nircami: “Pecadopi ama urmangapaca Taita Diostami mañashpa catina canguichi” nishpa.
41 Shina nishca jipaca paicunamanda ashata caruyashpami* Jesusca cungurishpa Taita Diostaca cashna nishpa mañai callarirca:
42 “Ñuca Taitalla, quiquin munashpaca cai copata ñucamanda anchuchipayari. Pero ñuca munashcataca ama rurapanguichu. Sino canba munashcata rurapangui”.
43 Chaipimi shuj angelca jahua cielomanda shamushpa, paipa ñaupapi ricurishpa paitaca shinllichirca.
44 Shinapash paica ninandapacha pinarishpami, Taita Diostaca tucui shunguhuan mañashpa catirca. Paipa sudorpash yahuarshna tucushpami alpaman shutujurca.
45 Mañashca jipaca, paipa discipulocunapaman rishpami paicunataca puñunajujta ricurca. Paicunaca llaquilla caimandami shaijushca puñunajushcarca.
46 Chaimi paicunataca nirca: “¿Imashpata puñunajunguichi? Jatarichi, pecadopi ama urmangapaca Taita Diostami mañashpa catina canguichi” nirca.
47 Jesús shina parlajujpillatami, ashtaca gentecuna shamurca. 12 apostolpuracunamanda Judasmi chai gentecunataca ñaupashpa shamujurca. Paica Jesuspaman quimirishpami ñavipi mucharca.
48 Chaimi Jesusca nirca: “Judas ¿Runapa Churitaca* ñavipi muchashpachu traicionajungui?” nishpa.
49 Jesuspa ladopi shayanajujcunaca, ima pasagrijujta cuenta japishpami Jesustaca tapurca: “Señor Jesús ¿espadahuan macanajushunllachu?” nishpa.
50 Jesuspa discipulocunapuramanda shujca paipa espadata llujchishpami, sacerdote principalpa* shuj esclavotaca ali lado rinrita fitirca.
51 Chaimi Jesusca “ama chashna ruraichu” nirca. Chai jipaca chugrishcata tacarishpami chai esclavotaca jambirca.
52 Chaita rurashca jipami, paita mascangapaj rishca importante sacerdotecunatapash, Taita Diospa templo huasipi guardiacunapa jefecunatapash y llactapi autoridadta charijcunatapash Jesusca nirca: “¿Shua cajpishnachu cangunaca, espadacunahuan, garrote caspicunahuan caiman shamushcanguichi?
53 Cada punllami Taita Diospa templo huasipi cangunahuan carcani. Chaipi yachachijujpipash cangunaca na prezo japihuarcanguichichu. Shinapash cunanga, cangunapa horasca caipimi can. Shinallata yana yana tuta mandana horaspash caipimi can” nirca.
54 Chai jipami Jesustaca prezo japishpa sacerdote principalpa huasi ucuman apashpa rirca. Shinapash Pedroca caru carullami catishpa rijurca.
55 Sacerdote principalpa huasi patio chaupipimi paicunaca ninata japichishpa y tandanajushpa tiarirca. Pedropashmi paicunahuan tiajurca.
56 Nina ladopi cunushpa tiajujpimi, shuj sirvienta huarmiguca Pedrota ricunman quidashpa* nirca: “Cai runapashmi Jesushuan igual purin carca” nishpa.
57 Shinapash Pedroca negashpami nirca: “Paitaca na rijsinichu”.
58 Chai jipallami, shuj runagupash paita ricushpaca nirca: “Canbashmi paipa discipulopura cangui”. Shinapash Pedroca “ñucaca na canichu” nircami.
59 Cazi shuj horas jipami, shuj runapash nijurca: “Cai runapash paicunahuan igualmari purin carca. Galilea llactamanda cashcataca ricunallamari can”.
60 Shinapash Pedroca nircami: “No sé, imatachari nijunguipash”. Shina nijujpillatami shuj gallo candarca.
61 Chai ratopimi Jesusca tigrarishpa Pedrota ricurca. Chaimi Pedroca Jesuspa cai shimicunata yarirca: “Gallopash cunan nara candajpillatami canga quimsa viajecaman na rijsinichu nishpa ñucataca negagrihuangui” nishcata.
62 Chaimi Pedroca canllaman llujshishpa, ninanda llaquirishpa huacarca.
63 Chai jipaca Jesusta vigilanajuj guardiacunaca, burlari callarishpami Jesustaca huactanajurca.
64 Jesustaca ñavita tapashpami cutin cutin ninajurca: “Can profeta cashpaca pi huactajujta villayari” nishpa.
65 Jesusmanda nalicunata nishpami Taita Diosta na respetashcata ricuchinajurca.
66 Ña punllayajpica llactapi autoridadta charijcunapash, importante sacerdotecunapash y Leyta yachachijcunapashmi tandanajurca. Paicunaca judiocunapa Jatun Corte Ucuman* apashpami Jesusta ninajurca:
67 “Villayari, ¿canllu Cristo cangui?”. Shina nijpimi paicunataca nirca: “Ari ñucami cani nijpipash, cangunaca nunca na cringuichimanllu.
68 Shinallata, imatapash ñuca tapujpica, cangunaca ñuca tapushcataca na tigrachinguichimanllu.
69 Shinapash cunanmanda vichaica, Runapa Churica* ninan poderta charij Taita Diospa ali ladopimi tiajunga”.
70 Chaimi tucuicuna tapunajurca: “Shinaca ¿canga Taita Diospa Churichu cangui?”. Shina nijpimi Jesusca nirca: “Ari, ñucami cani”.*
71 Chaimi paicunaca nirca: “Pai imata nijujtaca ñucanchipachami uyashcanchi. Shinaca ¿pitapash ashtahuan tapujunaca minishtirinrachu?” ninajurcami.
Notacuna
^ Glosariopi “Levadura Illa Tandata Rurana Fiesta” shimita ricupangui.
^ Griego shimipica “Satanasca” nijunmi. Satanás nishpaca “napacha cazungapaj munan o contra” nijunmi.
^ O “yuyarishcata”.
^ Glosariopi “Runapa Churi” shimita ricupangui.
^ O “shuj rumita pigashca tantota caruyashpami”.
^ Glosariopi “Runapa Churi” shimita ricupangui.
^ Glosariopi “sacerdote principal” shimita ricupangui.
^ O “saquirishpa”.
^ Glosariopi “Runapa Churi” shimita ricupangui.
^ Griego shimipica “canllatami nishcangui” nijunmi. Ari ningapami shina nin carca.
