Hebreos 5:1-14
5 Sacerdote principal* cangapaj agllashcacunaca maijan cashpapashmi, gentecuna Taita Diosta aliguta sirvichun ayudangapaj agllai tucun. Shinallata ofrendacunata carangapaj y pecadocunamanda sacrificiocunata* rurangapapashmi agllai tucun.
2 Ima ali cajta na yachaimanda pandata rurajcunataca, paimi llaquishpa trataita ushan. Porque paipashmi pandarinlla.
3 Chaimandami paica, imashinami llactapa pecadocunamanda shuj ofrendata apana can, shinallatami paipa propio pecadocunamandapash shuj ofrendata cuna can.
4 Nipipash na paipa munaimanda sacerdote principal caita ushanllu. Sino Aaronda agllashca shina, Taita Dios agllajpillami maijan cashpapash sacerdote principal caita ushan.
5 Shinallata, Cristopash na paipa munaichu sacerdote principal tucushpa, alipi churai tucunata mascarca. Sino Taita Diosmi paitaca alipi churashpa, “canmi ñuca churigu cangui. Cunanmi ñucaca canba taita tucushcani” nirca.
6 Taita Dios escribichishca shimipica, cashnatapashmi nijun: “Canga Melquisedec cuendami para siempre sacerdote cangui” nijunmi.
7 Cristo cai alpapi causajushpaca, huañuimanda salvai ushaj Taita Diostami, huacashpa uyarijta mañarca y rogarcapash. Cristoca Taita Diosta manllashpami causarca. Chaimandami Taita Diosca pai mañajpica uyarca.
8 Paica Taita Diospa churi cashpapash sufrishpami, imashina cazunataca yachajurca.
9 Cristoca tucuipimi* cazurca. Chaimi paita cazujcunaca paimanda para siempre salvarita ushan.
10 Taita Diosmi paitaca Melquisedectashna sacerdote principal cachun agllashca.
11 Cristomandaca ashtacatami nita ushapanchi. Pero intindichinaca dificilmi can. Porque quiquingunaca intindingapapash* na esforzaringuichichu.
12 Quiquingunaca ñami cunangamanga shujcunaman yachachijuna canguichi. Pero Taita Diospa shimita cutin primeromandapacha pipash yachachichunmi minishtinajunguichi. Shinlli micunata micunapa* randica, cutin lecheta* ufianata minishtinajunshnami canguichi.
13 Lechetalla ufiashpa catijcunaca, huahuacunashna caimandami alita rurachun* yachachij Taita Diospa shimitaca na rijsin.
14 Shinlli micunaca, shinlli feta charijcunapami can. Porque paicunaca ima ali cajta, ima nali cajta cuenta japi ushangapami, aliguta pensarinata yachajushca.
Notacuna
^ Glosariopi “sacerdote principal” shimita ricupangui.
^ Glosariopi “sacrificio” shimita ricupangui.
^ Griego shimipica “tucuipi perfecto tucushca jipami” nijunmi.
^ O “uyangapapash”.
^ Caipica “Jesuspa discipulocunapa shinlli yachachishcacunatami” shina nijun.
^ Caipica “Jesuspa discipulocunapa primero yachachishcacunatami” shina nijun.
