Cai temapica caitami yachajupashun:

•  Taitaca ¿imatata rurana can?

•  Taitallami caitaca rurana can

•  Taitacuna ushicuna

•  Taitacunapa huaquin consejocuna

•   Huahuagu nara nacirijpillata. Cunanllata ali cusa cashpaca jipamanga ali taita cashcata ricuchi ushapangui. Libro Do Fathers Matter? (Taitaca ¿imatata rurana can?) ninmi:

   “Huarmi vijsayu cajpillata huarmiguman cusa imata minishtishcata randishpa, doctorpaman apashpa aparatocunahuan vijsa ucupi fetota ricushpa, uyashpa huahuagu nacirijpica taitaca paipa huarmipa paipa huahuapaca ashtahuan amigocunami tucunga”.

   “Ñuca huarmigu vijsayu cajpica pailla imatapash rurachunga na saquircanichu tucui usharishcagupimi ayudarcani. Huahuapa cuartogutapash ishcandi rurarcanchi. Huahuagu nacirijpica preparado cangapami munarcani. Shina ruranaca alipachami carca” (James).

   Bibliapica ninmi: “Na quiquingunapa beneficiotallachu mascana capanguichi. Sino shujcunapa beneficiotapashmi mascana capanguichi” (Filipenses 2:4).

•   Huahuahuan pugllapai huahuata ugllapai. Shina rurashpaca quiquinba huahuaman ashtahuan juyaitami ricuchijungui. Shinallata huahuata cuidanapi ayudapai. Quiquin taita shina rurashpaca quiquinba huahuagu ali viñachunmi ayudajungui. Quiquinba huahuaman juyaita ricuchishpa, imagutapash rurashpaca quiquinba huahua ninan valishca cashcatami ricuchijungui.

   “Quiquinba huahuahuan pugllapai, imatapash rurapai. Ama manllaichu, ama pingaichu. Caitami yarina capangui taitaca, quiquinba huahuaca uchillagu cashpallatami quiquin imashna juyajta ricuna, yachajuna can” (Richard).

   Bibliapica ninmi: “Huahuacunataca Mandaj Dios carashcami. Vijsamanda llujshishca huahuacunaca, tucuimanda yali valishcami” (Salmo 127:3).

•   Huahua viñashpa catijpi. Huahuata estudiajcunaca huahuacuna taitahuan ali llevarishpaca escuelapipash ali estudiantecunami can ninmi. Shinallata paicunapa yuyaipipashmi ali cai ushan. Shina cashpaca drogacunapi imapash nali ruraicunapica na urmangachu. Chaimanda taitacuna quiquinba huahuacunahuan tucui tiempota yalipai, shina rurashpa paicunahuanga alimi llevaringui.

   “Ñuca churiguca cashnami nin carian: ‘Viajajushpa, meriendata micujushpaca parlashcacunatami ninanda extrañasha’ nircami. Huaquinbica parlashca temacunaca importantemi carca, caicunamandaca jaicata, na yashcapi parlanllami carcanchi. Ishcandi ashtahuan tiempota igual yalishcamandami shina parlan carcanchi” (Dennis).

   Bibliapica ninmi: “Juizu illashna portarinamandaca ninandami cuidarina capanguichi. Ashtahuangarin, ali yachajushcacunashnami portarina capanguichi. Tiempotaca aligutami aprovechana capanguichi” (Efesios 5:15, 16).

 Taitami minishtirishca cosascunata charichun, cuidachun familiaca shuyan. Shinallata mamacunaca huahuacunataca ashtahuan juyaitami ricuchin. Chaimandami mamacuna paicunapa huahuacunataca ashtahuan juyaihuan cuidai ushan (Deuteronomio 1:31; Isaías 49:15). Pero huaquin familiacunapica na siempre shina canllu. Huaquinbica paipa huarmi ruranacunataca cusami ruran, cutin cusa ruranacunataca huarmimi ruran. Familiamanda estudiajcunaca ninmi: “Cusapash huarmipash ishcandillata familiata cuidangapaj ayudarishpaca alipachami can” ninmi. a

 Judith Wallersteintaca cashnami pasarca, paica familiamanda estudiajmi can. Paipa ushi 12 huatata charijpica shuj carro llapishcamandami parlan. Ushiguta ambulanciapi apajujpica, paica paipa taita cumbachunmi munarca. Ushiguca yacharcami chai situacionbi cajpica paipa taita ayudai ushana cashcata. Jipamanga ushigu hospitalpi cashpaca, paipa mama tucui punlla paihuan cachunmi munarca. b

 “Taitaca familia seguro cachun, ima minishtirishcaguta charichunmi ayudai ushan. Shinapash mamallaca tucui caicunataca na cui ushanllu. Ashtahuanbash mamaca huahuacunata uyashpa, juyashpa, pacienciata ricuchishpami cuidan.Shinaca taitapash mamapash shuj equipo shinami huahuacunata cuidan” (Daniel).

 Bibliapica ninmi: “Ñuca huahualla, ali causachun cambaj taita yachachishcataca, aliguta uyangui. Ali causachun cambaj mama yachachishcatapash, ama yangapi churanguichu” (Proverbios 1:8).

 Ushicunaca taita imashna shujcunata tratajta ricushpami, jaricuna huarmicunata imashna tratana cashcata yachajunga. Cunanga quiquinba ushi quiquinmanda imata yachajujta ricupashun:

•   Quiquinba huarmita imashina tratajta ricushpa. Quiquinba ushi quiquinba huarmita juyajta, respetajta ricushpami cuenta urmanga imata mascanata shuj punlla cusata agllagrijushpaca (1 Pedro 3:7).

•   Quiquinba ushita imashina tratajta ricushpa. Taita quiquinba ushita respetajpica, paipash paillata respetarina cashcatami yachajunga. Shinallata shuj jaricunapash taitashnallata respetana cashcatami yachajunga.

   Na cashpaca quiquinba ushita siempre nalicachishpa tratajpica nimapapash na valinichu yashpami sintiringa. Shina pasajpimi quiquinba ushica shuj jaricuna paita alicachichun, juyachun mascai ushan, pero paicunaca nali munaihuanmi imatapash rurai ushan.

   “Shuj ushigu paipa taita cuidajpi, juyajpica cusata mascashpapash shinallata ali cualidadcunata charichunmi mascanga” (Wayne).