“Na manllanachu cangui, ñucami canhuan cani. Na llaquirinachu cangui, ñucami canbaj Taita Dios cani. Ñucami canman ushaita cuj Taita Dios cani. Ñuca ali lado maquihuanmi canba tucui causaipi ayudajushalla” (Isaías 41:10, Traducción del Nuevo Mundo, TNM).

 “Na manllanachu cangui, ñucami canhuan cani. Na llaquirinachu cangui, ñucami canbaj Taita Dios cani. Ushaita cushpami ayudasha, ñuca ali lado maquihuanmi ayudajushalla” (Isaías 41:10, Nueva Versión Internacional).

 Jehová a Diosca paita sirvijcunataca ima llaquicunata charijpipash, ayudashami ninmi.

 “Canhuanmi cani”. Jehová Diosca paita sirvijcunataca ‘na manllanachu canguichi’ ninmi. Na sololla capanguichichu, Taita Diosca ima llaquicunata charishcatapash alimi yachan. Quiquingunapa mañaicunatapash uyanmi. Taita Dios quiquingunahuan chaipi cashcashnami can (Salmo 34:15; 1 Pedro 3:12).

 “Ñucami cangunapa Taita Dios cani”. Taita Diosca paipa sirvijcunataca, paicunapa Taita Dios cashpa catijta, shinallata paipa aprobacionda charishcatapashmi yuyachin. Taita Dios paipa sirvijcunata cuidashpa catichun, imapash na jarcai ushashcataca seguromi caita ushapanguichi (Salmo 118:6; Romanos 8:32; Hebreos 13:6).

 “Ñucami canman ushaita cuj Taita Dios cani. Ñuca ali lado maquihuanmi canba tucui causaipi ayudajushalla”. Jehová Diosca paipa sirvijcuna paipa ayudata chasqui ushashcata intindichunmi, Jehová Diosca cai yuyaitaca shuj shuj yuyaicunapi intindichin. Paipa sirvijcuna minishtijujpi Taita Dios imata rurajta intindichunmi Jehová Diosca paipa ‘maquimanda’ parlan. Pipash llaqui apashpa urmajpica, Taita Diosca paipa ali lado maquita chutashpami jatarichin (Isaías 41:13).

 Jehová Diosca paipa sirvijcunata ayudangapaj, shinallata yachingapaca Bibliatami utilizan (Josué 1:8; Hebreos 4:12). Bibliapa consejocunami culqui illaj cajpi, nanashca cajpi, pipash huañushca cajpica, chai llaquicunata aguantachunga ayudan (Proverbios 2:6, 7). Shinallata Taita Diosca paipa espíritu santota utilizashpami ama llaquicunapi yapata preocuparichun ayudan (Isaías 40:29; Lucas 11:13).

 Babilonia llactaman judiocunata esclavo shina apajpimi, Jehová Diosca cai shimicunata nishpa animarca. Jehová Diosca pundamandallatami Babilonia llacta llaquichi tucuna cashcataca villashca carca. Shinallata Babilonia ladolla llactacunatapash tucuchina cashcatami villarca (Isaías 41:2-4; 44:1-4). Babilonia llactapi causaj gentecuna, shinallata Babilonia ladolla llactapi causaj gentecunaca ninanda manllanajujpipash, Jehová Diosta sirvij judiocunaca Jehová Dios ayudanapi shuyashpami paicunaca imatapash na manllana carca. Judiocuna ama manllachunga, Jehová Diosca quimsa viajecamanmi ‘na manllanachu canguichi’ nirca (Isaías 41:5, 6, 10, 13, 14).

 Judiocuna Babilonia llactapi esclavoshna cashcamandami, Jehová Diosca Isaías 41:10​pi shimicunataca nirca. Shinapash Jehová Diosca paipa tucui sirvijcunata cai shimicunata nishpa animangapami, paipa shimi Bibliapica saquishca. Jehová Diosca punda tiempopi paita sirvijcunata ayudashcashnallatami cunan tiempopipash, paita sirvijcunata ayudashpa catijun (Isaías 40:8; Romanos 15:4).