Santo Domingo llaqtapin nacerqani chayqa República Doninicana nacionpin tarikun; tawan karqayku ñoqataq sullk’a kani. Tayta-mamaykunaqa allin educacionniyoqmi karqanku chaymi allinta uywayta munawarqanku. Manaraq naceshaqtiymi tawa wata ñawpaqta paykunaqa Mormón misionerokunata reqsirqanku allin comportamientoyoq, limpio, allin p’achasqa kasqankuwanmi admirakurqanku. Pisi tiempollamantan República Dominicana nacionpi familiay Iglesia de Jesucristo de los Santos de los Últimos Días nisqa religionmanta kapurqanku, paykunatan reqsikun Mormón nispa.

Iglesiapi kusirikuykunata ruwasqankupin astawanqa yanapakuq kani, familiata imayna uywaypi ch’uya kawsay yachachisqankun anchata gustawaq. Mormón kasqaytan ancha allinpaq qhawariq kani chaymi misionero kanaypaq yuyaykurqani.

18 wataypi kashaqtiymi familiaywan Estados Unidos nacionman astakurqayku allin universidadpi estudianaypaq. Huk wata hinaña tiyashaqtiykun tioykuna Florida llaqtaman visitamuwarqanku, paykunaqa Jehová Diospa testigonkunan karqanku, hinan hatun huñunakuyman rinaykupaq invitawarqanku. Chaypin repararqani llapallanku Biblianpi textokunata maskhasqankuta anotasqankutapas, chaymi ñoqapas lapicerota huk papeltawan mañakurqani kaqta ruwanaypaq.

Hatun huñunakuy tukuytataq tioykunaqa misionero kay munasqayta yachaspa, Bibliamanta astawan yachachiyta munawarqanku. Chay niwasqankuqa allinmi karqan, Mormón Librollamantan astawan yacharqani Bibliamantan ichaqa mana.

Tioykuna ripusqanku qhepamanpas telefonopin Bibliamanta rimashallarqayku. Paykunaqa kikillaymanta cheqaq kaqta tarinaytan munarqanku. Chaymi sapa kutillan kallpachawaqku imachus yachasqaymanta Bibliawan tupachinaypaq.

 Religioniypa yachachikuynintan cheqaqpaq hina yuyaykurqani, ichaqa manan yacharqanichu Bibliaq yachachisqanwan tupanchus icha manachus chayta. Tiaymi apachimuwarqan 1995 watamanta 8 noviembre killamanta ¡Despertad! revistata, (chaytaqa Jehová Diospa testigonkunan ruwan) chaypin iskay temakuna rimarqan Mormonkunaq imapi iñisqankumanta. Hinan repararqani Iglesiaypi imachus yachachisqankuta mana allin yachasqayta, chaymi Mormonkunaq churasqanku Internetpi maskhayta qallarirqani chay revistaq nisqanta, cheqaqchus karqan icha manachus chayta yachanaypaq. Chaymantapas astawanmi yacharqani mormonkunaq museonkuman rispa chayqa Utah llaqtapin tarikurqan.

Ñoqaqa yuyaykurqanin Bibliawan Mormón Librowan kaqlla kasqanta. Ichaqa Bibliata astawan t’aqwispaymi entienderqani mana kaqllachu kasqanta. Ezequiel 18:4, NM textopin willan alma wañuq kasqanta. Ichaqa Mormón Libropin Alma 42:9 willan almaqa mana hayk’aq wañuq kasqanta.

Chhayna pantasqa yachachisqankumanta, llaqtankumanta sayapakuq kayta yachachisqanku iman astawanqa iskayachiwaq. Hinaspapas paykunaqa Edén huerta condado de Jackson nisqapi kananpaqmi yuyaykunku (Misuri, Estados Unidos). Chaymantapas iglesiapi profetakunaq nisqanman hinas, “Diospa Gobiernon kamachikuyta qallariqtinqa mana piqpa huchachasqan Estados Unidos nacionpa banderan sumaqta sayanqa, runakunaq derechontapas defendenqa.”

Chaykuna kaqtin kayta tapukuq kani: “¿Iman pasanman tiyasqay nacionta, huk nacionkunatapas?” nispa. Huk tardermi mesionero kananpaq estudiaq reqsisqay runa telefonopi waqyamuwarqan, parlasqaykupin tapurqani: “Sichus llaqtayki guerrapi tarikunman huk llaqtawan chayri, ¿maqanakuwaqchu chay nacionmanta Mormón masiykikunawan?” nispa. Admirakurqanin “arí” nispa kutichiwasqanwan. Astawanraqmi religionniypa yachachisqanta t’aqwirirqani, tapukuqtaqmi kani Iglesiaypi reqsisqa umallikunata, paykunataqmi tapukusqaymanta niwaqku: “Sasa entiendenatan tapukunki chaytaqa tiempoq pasasqanman hinan sut’inchakunqa”, nispa.

Chhayna kutichiwasqankuqa llakikunapaqmi karqan. Hinan tapukuq kani: “¿Imaraykun misionero kayta munani?” nispa. Ñoqapaqqa wakcha runakunatapas yanapashayman hinallan karqan, chaymantapas allin reqsisqa kayta munarqani imaynan hukkuna chayta ruwaspa kanku hinata. Ichaqa pisitan Diosmanta yacharqani. Bibliapi wakin textokunataña leerqani chaypas, manan tukuy sonqowanchu leeq kani. Nitaq yacharqanichu imatas Dios munan kay Hallp’apaq runakunapaqpas chayta.

Bibliata Jehová Diospa testigonkunawan estudiaspaymi kaykunata yacharqani: ¿Iman Diospa sutin? ¿Iman suceden wañupusqanchis qhepaman? ¿Imatan Jesús ruwanqa Diospa munaynin hunt’akuqtin? nisqata. Chayraqmi reqsiyta qallarirqani chay libromanta, ¡maytan munarqani yachasqaymanta hukkunaman willayta! Ñoqaqa yacharqanipunin Dios kasqanta, kunanmi ichaqa reqsisqay amigoywanpas rimashayman hina paymanta mañakuni. 2004 watapin 12 julio killapi bautizakurqani, soqta killa qhepamantaq precursor kayta qallarirqani.

Brooklyn (Nueva York) llaqtapi kaq Betel wasipin 5 wata llank’arqani, ancha kusikuywanmi pachantinpi runakunaq allinninpaq Bibliata huk qelqakunatapas ruwaypi yanapakurqani. ¡Maytan kusikuni askha watakuna Diospa sutinmanta lliw runakunaman willasqaymanta!