KINSA CHUNKA watayoq Rubian qayna watakunalla Sandrata watukuq rirqan Brasil nacionpa uray lado llaqtaman, chaypin Sandraqa huk huch’uy iñiq t’aqapi precursora kasharqan. Chaypi imachus pasasqanmi sonqonman chayaspa kawsayninta cambiarqan. ¿Iman chay karqan? Paymi chayta willawasun.

“Sandran pusawarqan estudio qosqanman. Estudiashaqtiykun chay señora Sandrata nirqan: ‘Llank’asqaypin kinsa sipaskuna Bibliamanta yachayta munashanku, ichaqa askha runakunamantaq yachachishanki chayqa nirqanin suyakunankupaq’, nispa.  ‘¡Mana creenapaq hinan karqan!’ Askha runakunan Diosmanta yachayta munarqanku chaymi Sandraqa listapiraq suyachikuq. ¡Tiyasqaypiqa ñak’aymi huk estudiota tariq kani! Hinan chay señoraq wasinpi kashaspay anchatapuni munarqani chaypi runakuna yanapayta. Chay qhepallamanmi tiyasqay hatun llaqtamanta Sandraq kasqanman ripurqani.”

¿Imaynan chaypi tarikurqan Rúbia? Paymi nin: “Iskay killallapin 15 estudiotaña qosharqani. Admirakunapaqña chaypas, ñoqapas listapiraqmi suyachikuq kani”, nispa.

Iskay chunka más watayoq Diego iñiqmi Brasil nacionpi Prudentópolis llaqtata rirqan, huk precursorkunata watukuq. Chayman risqanqa anchatan sonqonman chayarqan hinan qhawarikurqan Dios serviyninpi imayna kashasqanta. Paymi nin: “Iñiq t’aqaypi kaspaqa manan nishutachu kallpachakuq kani, pisillatan predicaq kani. Ichaqa chay precursorkunawan kaspa, predicasqankumantapas willawasqankuta uyarispaymi repararqani ñoqamantaqa paykuna aswan kusisqa kasqankuta. Ancha kusisqata kallpayoqta rikuspaymi ñoqapas paykuna hina kayta munarqani”, nispa. Wasinman kutipuspanmi Diegoqa precursor kapurqan.

Qanri, ¿imaynan kashanki? Wayna kashanki chayqa, ¿predicaqpas huñunakuykunamanpas rinkichu, ichaqa mayninpichu qellakunapaq hina chayta qhawarinki? Chhayna kaqtinqa, yaqapaschá predicaqkunaq necesitakusqanman riwaq, kusisqa kanaykipaq. Manapaschá allin kawsanayki kaqkunata saqeyta munankichu. Ichaqa, chaytan wakin wiñaymasiykikuna ruwarqanku, imachus ruway munasqankutan saqerqanku astawan Diosta servinankupaq. Brunomanta yachasun.

Bruno iñiqqa 28 watayoqmi kashan, payqa allin reqsisqa escuelapin estudiarqan tocayta yachananpaq, orquestapi director kaytataqmi munarqan, chaymi ancha allinta yachaqtin askha kutipi invitarqanku  huk orquestapi umallinanpaq. Allin qhawarisqa kaytan atinman karqan, ichaqa ninmi: “Ch’usaq sonqon tarikurqani. Kawsayniytaqa Diosmanmi qorqani, ichaqa manan tukuy atisqaytachu ruwasharqani, chaymi llakichiwaq. Diosmanmi imayna sientekusqayta willarqani, rimarqanitaqmi allin iñiyniyoq cristianokunawan. Allinta yuyaymanaspaymi decidikurqani ñawpaqta Diosta servinaypaq, saqepurqanin música estudiasqayta, predicaqkunaq necesitakusqanmantaq rirqani Diosta servinaypaq”, nispa. ¿Allintachu chayta ruwasharqan?

Brunoqa Guapiara llaqtamanmi rirqan, chaypiqa tiyanku 7.000 runakunan, 260 kilómetro karupitaqmi kashan São Paulo llaqtamanta. Paymi nin: “Wasi tiyasqayqa huch’uyllan karqan, manan karqanchu refrigeradora, televisión nitaq Internetpas. Ichaqa, karqanmi fruta mallkikunayoq huertoy, chayqa hukniraymi ñoqapaqqa karqan”, nispa. Brunoq kasqan iñiq t’aqapiqa pisillan karqanku. Sapa semananmi qelqakunata qoqawatapas aparikuspa motonpi predicaq riq mana hayk’aq predicakusqan llaqtachakunaman. 18 estudiokunatan qoq, paymi nin: “Kusikunapaqmi kawsayninkupi cambiasqankuta rikuyqa. Chhaynapin tarirqani Diospa Gobiernonta ñawpaqman churaspaqa ancha kusikuy kasqanta. Manan askha qolqeyoq kaypas chhaynataqa kusichiwanmanchu karqan”, nispa. ¿Imapin llank’aq Guapiara llaqtapi? Paymi kusisqa nin: “¡Guitarra tocayta yachachispa!” nispa. Chhaynaqa Brunoqa tocaqllan kashan.

Iskay chunka más watayoq Marianapas Bruno hinan ruwallarqantaq. Abogada kaspa askha qolqeyoqña karqan chaypas, manan kusisqachu kaq. Paypaqqa “wayra hap’iykuy” hinallan karqan kawsayninqa (Ecl. 1:17). Askha iñiqkunan kallpacharqanku precursora kananpaq. Allinta yuyaymanasqan qhepamanmi Bianca, Caroline, Juliana amigankunawan kuska Barra do Bugres iñiq t’aqaman rirqanku, chayqa kashan Bolivia nación tupariypin, wasinkumantaqa nishu karupin kashan. ¿Iman chaypi pasarqan?

 Marianan nin: “Kinsa killallapaqmi rirqani. Ichaqa, 15 estudiokunatan qosharqani, paykunaq iñiyninku wiñananpaqqa necesitarqankun yanapanata. Ripunay p’unchaymi asuykamusharqanña, ichaqa manan paykunaman imayna niyta atirqanichu, qhepakunaymi karqan”, nispa. Chaytan ruwarqanku tawantinkupas. Kunanqa Marianaqa kusisqan kashan, ninmi: “Jehová Diosmi runakunaq kawsayninta cambiananpaq yanapachiwashan, kunanqa tiempoytapas kallpaytapas manan yanqachu usuchini”, nispa. Tawantinku imayna sientekusqankumantan Caroline nin: “Sapa tutanmi thakpi puñuni tukuy atisqayta Diospaq llank’asqayrayku. Tukuy yuyaywanmi yanapani estudianteykunata, kusikunapaqmi iñiyninkupi ñawparisqankuta rikuyqa. Biblian nin: “Reqsiykuychis, hinaspa rikuychis may sumaqchus Señor Diosqa kashasqanta”, nispa, kunanqa yachanin chay nisqan cheqaq kasqanta”, nispa (Sal. 34:8).

Sapa kutinmi wayna-sipaskunaqa tukuy sonqonkuwan karu llaqtakunata rinku Diospa Gobiernonmanta willamunankupaq, chaywanqa anchatachá Jehová Diosqa kusikun (Sal. 110:3; Pro. 27:11). Tukuyta saqespa Diosta serviq wayna-sipaskunataq Diospa bendecisqan kanku (Pro. 10:22).