Nicolas hermanonchismanta esposanmantawan yachasun. Paykunataqa Francia sucursalmantas nisqaku juj iñiq t’aqapi yanapakunankupaq. Paykunan willakunku imaynas chayta yachaspa kasharqanku chayta. Ninkun: “Qallariypiqa ancha kusisqan kasharqayku, chaymantan ichaqa ñaupaq iñiq t’aqapi amigoykuta extrañarqayku. Chaymantapas chayraqtaq chay mosoq iñiq t’aqaman chayasharqayku chayqa manan allintaraqchu hermanokunata reqsirqayku, chaymi llakisqa jina kasharqayku”, nispa. a ¿Qanpas chhaynapichu tarikushanki? Chhayna kaqtinqa, ¿iman yanapasunkiman chay mosoq iñiq t’aqaman ratulla yachakunaykipaq? ¿Imaynatan juj hermanokunapas yanapasunkiman? ¿Ima allinkunan kanqa chaykuna ruwasqaykimanta? ¿Imaynatan jujkunatapas yanapawaq?

TAWA RUWAYKUNAN YANAPASUNKI

1. Jehová Diospi confiay (Sal. 37:5). Japón nacionmanta Kazumi hermananchismanta yachasun, payqa iskay chunka watañas juj iñiq t’aqallapi kashasqa. Ichaqa qosanpa llank’ananraykus juj ladoman astakapusqaku. ¿Imatan chay hermananchis ruwanman karqan? Jehová Diospis confiasqa, paymi nin: “Jehová Diosmanmi llapa llakikuyniyta willakurqani. Chaypiqa sapallaymi kasharqani manchasqa iman kasharqani, chaytan llapanta willakurqani. Payqa sumaqtan chay tiempopi yanapawarqan, kallpata iman qowarqan”, nispa.

¿Imatan qanpas ruwawaq Jehová Diospi astawan confianaykipaq? Chaypaq piensasun juj plantapi. Juj planta allinta wiñananpaqqa qarpana wanuchana iman. Chhaynan iñiywanpas, imaymanatan ruwananchis fuerte kananpaq. Ñaupaqpi rimamusqanchis hermanonchis Nicolastaqa Abrahanpa, Jesuspa, apóstol Pabloq ejemplon imas yanapasqa. Paykunapi piensaspas reparasqa  imaynas Jehová Diospa munayninta ruwanankupaq imaymanata ruwarqanku chayta. Chaymantapas sichus allin horariota ruwakunki Bibliata estudianaykipaq chayqa faciltan ima cambiomanpas yachakunki. Chay yachasqaykiqa yanapasunkin iñiq t’aqapi hermanokunata yanapanaykipaqpas.

2. Ama tupanachiychu ñaupaq iñiq t’aqaykiwan (Ecl. 7:10). Jules sutiyoq hermanomanta yachasun. Payqa Benín ladomantan Estados Unidos nacionman ripusqa, chaypiqa jujniraysi imapas kasqa. Paymi nin: “Chaypiqa rimaysapan kasqaku, imaymanata tapuwaqtinkun llapa vidaytapas willakunayta munashankuman jinataraq piensarqani”, nispa. Payqa manataq chayman yachasqachu kasharqan chayqa hermanokunamantas t’aqakuyta qallarisqa. Ichaqa hermanokunata reqsisqanman jinas chhayna piensasqanta cambiasqa. Paymi nillantaq: “Reparasqayman jinaqa runakunaqa maymantaña kanchis chaypas igual-llan kanchis, imaynatachus piensanchis rimanchis chayllan jujnirayqa. Chayraykun llapankuta imaynachus kasqankuman jina sumaqta chaskinanchis”, nispa. Chhaynaqa manan allinchu kanman mosoq iñiq t’aqanchista saqesqanchis iñiq t’aqawan tupanachiyqa. Anne-Lise sutiyoq precursora hermanan nin: “Noqaqa kaymanqa jamurqani manan saqemusqay congregacionta kikinta tarinaypaqchu, aswanpas maytan munayman imallapas jujniray kananta”, nispa.

Umalliqkunapas manan ñaupa congregaciontaqa juj kaq congregacionwanqa tupanachinankuchu. Yaqapaschá juj congregacionpiqa jujniraymanta imatapas ruwankuman, ichaqa manan chayraykuchu chay ruwasqankutaqa mana allinpaq jina qhawarinanchis. Chaymantapas ima consejotapas qoyta munaspaqa allintaraqmi yachana imaynatas chay llaqtapi imatapas ruwakun chayta (Ecl. 3:​1, 7b). Chaymantapas manan piensasqanchisman jina imapas ruwakunantachu suyanaykichis, aswanpas ejemplowanmi yachachinanchis (2 Cor. 1:24).

3. Yanapakuy (Filip. 1:27). Yachamusqanchis jina juj iñiq t’aqaman astakuyqa sasan tiempopaqtaqmi kanpas. Ichaqa juj iñiq t’aqaman astakushanki chayqa kallpachakuy qallariymantapacha juñunakuykunaman rinaykipaq. Manachus juñunakuykunaman rinki chayqa manan hermanokunaqa imayna yanapayta atisunkichu. Hermananchis Lucindamanta iskaynin ususinkunamantawan yachasun. Paykunaqa Sudáfrica ladopi juj jatun llaqtamanmi astakusqaku, chayman chayaspaqa imaymana ruwaypis yanapakuyta qallarisqaku. Paymi nin: “Chayman chayaspa jinan iñiq t’aqapi imaymana ruwaypi yanapakuyta qallarirqani. Juj-juj hermanokunawanmi predicaq rirqani, juñunakuykunapipas comentaqmi kayku. Umalliqkunatapas nirqaykun atikuqtinqa predicanapaq wasiykupi juñukunaykupaq”, nispa.

Tukuy atisqaykita kallpachakunki mosoq iñiq t’aqapi yanapakunaykipaq chayqa ratullan chay iñiq t’aqaman yachakapunki, juj nisqallataqmi hermanokunawanpas Diosta servinki. Ñaupaqpi rimamusqanchis Anne-Lise hermananchistaqa umalliqkunas kallpachasqaku iñiq t’aqapi llapa hermanokunawan predicananpaq. Paymi nin: “Chay niwasqankupin cuentata qokurqani chay iñiq t’aqaman  yachakunaypaqqa llapa hermanokunata allinta reqsinay kasqanta”, nispa. Qanpas kallpachakuy imaymana ruwaypi yanapakunaykipaq, yanapakuy juñunakuna wasi limpiaypi allichaypi ima. Chaytachus ruwanki chayqa hermanokunapas reparanqakun chay iñiq t’aqaman yachakapusqaykita. Chhaynapin kusisqa kanki, gustowanmi Diostapas hermanokunawan kuska servinki.

4. Amigokunata maskhay (2 Cor. 6:​11-13). Chay iñiq t’aqapi amigokunata tarinaykipaqqa paykunapin interesakunayki. Chaypaqqa juñunakuy qallariyta tukuyta iman paykunawan parlarinayki, chhaynapin sapankankuta allinta reqsinki. Chaymantapas sapanka hermanoq sutinta yachay. Sichus sumaq sonqo kanki hermanokunaq sutintapas manataq qonqankichu chayqa maytachá qanwan kaspaqa kusikunqaku, amigoyki kayta imachá munanqakupas.

Ama allinta qhawarichikuyta munaspachu imatapas ruway, aswanpas imaynapunichus kanki chhaynalla paykunawanpas kay. Ñaupaqpi rimamusqanchis hermananchis Lucindaq ejemplonta qatikuy. Paymi nin: “Askha hermanokunatan wasiyman invitarqayku. Paykunawanqa sumaqtan pasarirqayku, chaymi yanapawarqanku allin amigokunata tarinaykupaq”, nispa.

“SUMAQTA CHASKINAKUYCHIS”

Wakin iñiqmasinchiskunaqa manchakunkun mana reqsisqanku iñiq t’aqapi juñunakuyman jaykuyta. Chhaynataq chayqa, ¿imaynatan yanapasunman chayllaraq chayamuq hermanokunata? Apóstol Pabloq nisqantan kasukunanchis. Paymi nirqan: “Imaynan Jesucristoqa sumaqta chaskiwarqanchis chhaynata qankunapas jujkuna-jujkunawan sumaqta chaskinakuychis”, nispa (Rom. 15:7). Umalliqkunapas Jesús jinan chay hermanokunata sumaqta chaskinanku. (Qhaway “ ¿Imaynatan allinta cambiakuwaq juj iñiq t’aqaman?” nisqa willakuyta). Llapanchismi, kuraqkunapas sullk’akunapas mosoq hermanokunataqa sumaqta chaskinanchis. Chhaynapin paykunaqa llaqtankupi jina wasinkupi jina kusisqa kanqaku.

¿Imatawanmi paykunapaq ruwasunman? Wasinchismanmi invitarisunman chaypi paykunawan sumaqta pasarinanchispaq. Chaymantapas imatapaschá necesitashanku chaypin yanaparillasunmantaq. Chaytan juj hermananchispas ruwasqa. Payqa tiempochanta t’aqaspas juj hermanaman llapa llaqtata reqsichisqa, ima carromansi wichanan  jayk’atas paganan chaytapas llapantas willasqa. Chaysi hermananchistaqa yanapasqa chay iñiq t’aqaman yachakunanpaq.

IÑIYNIYKIPIN WIÑARINKI

Qanpas juj iñiq t’aqaman astakushanki chayqa, qallariypiqa yaqapaschá manchakunki llakikunki imapaschá. Ichaqa kaypi piensariy, wakin kuruchakunaqa volaqmi kanku ichaqa volanankupaqqa ch’utikunankun. Chhaynatan qanpas Diosta serviypi volanaykipaqqa imaymana llakikuyniykita saqepunayki. Ñaupaqpi rimamusqanchis hermanonchis Nicolasmi esposanpiwan ninku: “Juj ladoman astakuyqa imaymanapin yanapasunki. Noqaykuqa hermanokunaman costumbrenkuman iman yachakunayku karqan. Chaymi yanapawarqanku imaynachus kasqaykupi mejoranaykupaq”, nispa. Jean-Charles hermanonchispas allintas chaytaqa reparasqa. Paymi nillantaq: “Juj iñiq t’aqaman astakusqaykun wawaykunata yanaparqan astawan iñiyninkupi wiñarinankupaq. Pisi killakuna qhepallamanmi ususiyku juñunakuypi participananpaq escuelaman matriculakurqan, qhari wawaykutaq predicaqña lloqsirqan”, nispa.

Qanpas yaqapaschá Diosmanta willaqkunaq necesitakusqan ladoman astakuyta munashanki, ichaqa manapaschá atishankiraqchu. Chhaynapiña tarikushanki chaypas kaypi yuyaychaykunaqa yanapasunkin iñiq t’aqaykipi aswan kusisqa Jehová Diosta servinaykipaq. Chhaynaqa Jehová Diospi confiay, iñiq t’aqaykipipas imaymana ruwaypi yanapakuy, kallpachakuytaq llapa hermanokunawan predicanaykipaq. Juj amigokunatawan maskhay, amigoykikunawanpas astawan tiempota pasariy. Kallpachakuy mosoq hermanokunata sumaqta chaskinaykipaq, necesitasqankupi ima yanapariy. Chaytachus ruwanki chayqa astawanmi iñiyniykipi wiñarinki, chaymantapas munakuq kasqanchispin lliupas yachanqaku Jesuspa qatikuqninkuna kasqanchista (Juan 13:35). “Chhayna sacrificiokunan Diostaqa anchata kusichin” (Heb. 13:16).

Sasaña chaypas askha hermanonchiskunan juj mosoq iñiq t’aqapi kusisqa Jehová Diosta servishanku. Qanpas atillankin mosoq iñiq t’aqaman yachakuytaqa. Anne-Lise hermananchismi nillantaq: “Juj iñiq t’aqaman ripuymi yanapawarqan llapa hermanokunata munakunaypaq”, nispa. Kazumi hermananchispas ninmi: “Juj iñiq t’aqaman astakunki chayqa astawanraqmi reparanki Jehová Diospa yanapayninta”, nispa. Jules iñiqmasinchispas ninmi: “Kaypiqa askhañan amigoykuna kashan, manan sapallaychu sientekuni. Kay iñiq t’aqamanqa ñan yachakapuniña, noqapaqqa manan facilchu kanqa kaymanta ripuyqa”, nispa.