KAY tiempopi animalkunamantaqa, cocodrilo nisqan animalmi astawan kachukuq. Australia nacionpi puchqu yakupi kaq cocodrilom, leonmantawan tigremantapas astawan kachukuq. Chayna kaptinpas kakichunqa utaq siminqa makinchikwan llachpaspa musyasqanchikmantapas aswan chaylla musyaqmi. ¿Imaynataq chayqa kanman, qaran llumpa-llumpay qachqa kaptinpas?

Cocodrilopa siminpim nervio nisqanku waranqantin tarikun, chayqa rikchakun llañuchalla venachakunamanmi. Chay nerviom imatapas chaylla musyachin. Chay animalkuna imayna kasqanta yachananpaq estudiaq yachaysapa runam willakurqa cocodrilopa siminpi nervio nisqankuqa kakichunpa tullunpa uchkuchanta ñutqunkama chayasqanmanta (Duncan Leitch). Chayna unanchasqa kasqanmi yanapan imatapas kachuptin chaylla musyachiq nervionkuna mana imanakunanpaq. Siminpi chay nervionkuna chaylla musyachiq kasqanraykum yachaysapa runakuna manaraq llapanpiqa yachankuchu imanasqa chayna kasqanmanta. Paykunam piensanku chayna simiyuq kasqanqa yaku ukupi imatapas kachusqanta musyananpaq yanapasqanta. Siminku chayna kasqanraykum china cocodrilotaqa yanapan wawanta mana kachuruspallan siminpi apananpaq. Kayna kasqanmi qawachiwanchik cocodrilopa siminqa llumpay kachukuq kasqanta hinaspa llampu kasqantapas.

¿Ima ninkitaq? ¿Cocodrilopa siminqa kikillanmantachu chayna rikurirqa icha unanchasqa kasqanraykuchu?