MOZOLLARAQ utaq sipasllaraq kaspaykiqa, ichapas piensarqanki casarakuypi, profesional kaspa kapuqniyuq kaypi. Ichaqa manam munasqanchikman hinachu wakinpiqa vidanchik kanman. Sasachakuykunawanmi imapas ruway munasqanchikkunata mana haypanchikchu. Chaynam pasarurqa Anja, Delina hinaspa Gregory sutiyuq runakunata.

• Alemania nacionpi yachaq, Anja sutiyuq warmim 21 watanmanta cancer unquywan kachkan. Kunanqa wasinmantapas manañam lluqsinñachu.

• Estados Unidospi yachaq Delinam distonía muscular nisqanwan unqun. Chay unquymi chakinta, makinta utaq lliw cuerpontam kikillanmanta wistuyachin utaq qiwin. Chaymantapas unquq kimsa turinkunatam cuidanan.

• Canadá nacionpi yachaq Gregory sutiyuq runam, umanwan unqun chaymi mana allinkunata piensaspan chaylla hukmanyan.

Kawsakuyninku sasa kaptinpas, ¿imaynatam Anja, Delina hinaspa Gregory sasachakuyninkuta atiparqaku?

Bibliam nin: ‘Sasachakusqayki punchawpi hukmanyaruspaqa pisi kallpayuqñam rikurirunki’, nispa (Proverbios 24:10). Kayqa yachachiwanchikmi sasachakuykunapi tarikuspaqa mana llumpayta hukmanyanapaq. Sasachakuykunapi kaspa mana allin pensamientokunawan atiparachikuspaqqa mana valeqpaq hinañam hapikusun. Ichaqa allin kaqkunapi piensaspaqa atipasunmi.

Qatiqninpim qawasun allin kaqkunallapi piensayqa, Anjata, Delinata hinaspa Gregoryta imayna yanapasqanmanta.