Anchatam agradecekuykiku Jehova Diospa testigonkunamanta hukkunaman willay munasqaykichikmanta. Kay qatiqninpi palabrakunaqa kachkan Jehova Diospa testigonkuna ukupi ima rimaykuna utilizasqankuta hinaspa imayna qillqakusqanta yachanaykichikpaqmi. Yachay munasqaykimanta kaypi mana kaptinqa nacionnikipi betel sutiyuq oficinata tapukuy.

Betel, betelita, familia Betel. Betelqa hebreo idiomapi palabram. Chayqa ‘Diospa wasin’ ninanmi. Betel nispam sutichanku chay nacionpi diriginankupaq utaq iñiqmasinkuta yanapanankupaq Jehova Diospa testigonkunapa oficinankuta. Chay wasipi yanapakuq testigokunatam ninku betelita nispa. Llapankutañataqmi ninku familia betel nispa. Chaynataqa ninku huk familia hinalla kuska yachasqankuraykum, kuska llamkasqankuraykum hinaspa Diosta kuska yupaychasqankuraykum. Betelita nisqanqa manam paykuna riqsisqa utaq hatunchasqa kanankupaqchu.

Betel wasi (sucursal). Chaypim kanku betel wasimanta cuentallikuqkuna. Chay wasimantam diriginku huk utaq achka nacionkunapi testigokunapa imapas ruwasqankuta.

Betel wasipi cuentallikuqkuna (Comité de Sucursal). Ima nacionpipas betel wasi kananpaq tantiaspankuqa chay wasipi cuentallikuqkunatam churanku. Chay cuentallikuq punta apaqkunaqa kanku kimsam utaq masmi. Paykunam tantianku encargakusqan nacionpi utaq nacionkunapi imakuna ruwakunanpaq.

Circuito. Chaynataqa ninku huk sitiopi kaq achka congregacionkunatam.

Congregacion. Chaynataqa sutichanku Diosta yupaychanankupaq sapa kuti huñunakuq huk grupo testigokunatam. Sapa congregacionpim kan ancianokuna utaq punta apaqkuna. Paykunam chay congregacionpi huñunakuqkunata bibliawan yachachinku hinaspa kallpanchanku. Yanapankutaqmi sapakamatapas. Congregacionkunapa huñunakusqankumanqa pipas yaykunmanmi.

 Diosmanta willakuy (predicar, predicación). Chay rimaytam testigokuna servichikunku Diospa gobiernonmanta kay pachapi llapallan nacionpi runakunaman yachachinapaq Jesuspa kamachisqanta kasukusqankuraykum (Mateo 24:14; 28:19). Chaytaqa ruwanku sapa testigom utaq iñiqmasinkuwan kuskam.

Diosmanta willakuq (publicador, publicadora). Chaynatam ninku Diosmanta willakuspanku Jehova Diospa testigonkunawan huñunakuqkunata. Diosmanta willakuq kanapaqqa bibliapa nisqankunatam imam kaqta yachanan hinaspa creenan, hinaspapas Diospa kamachikuyninkunaman hinam kawsakunan. Diosmanta willakuqkunaqa manam pagotaqa chaskinkuchu, manataqmi huñunakusqankupi iñiqmasinkupa nitaq Jehova Diospa testigonkunapa corporacion nisqanpa contratasqanchu kanku.

Diosmanta willakuq nisqanqa manam paykuna riqsisqa utaq hatunchasqa kanankupaqchu.

Diospa llaqtanpi punta apaqkuna (Cuerpo Gobernante). Paykunaqa kanku aslla punta apaqkunam, paykunam enteron allpa pachapi Jehova Diospa testigonkunata yanapanankupaq nombrasqa kanku. Paykunam bibliamanta yachachiq qillqakunata ruwanku iñiqkunata yanapanankupaq. Enteron pachapi testigokuna imata ruwanankupaq tantiaspankupas Jesuslla Jehova Diospa testigonkunapa kamachiqnin kasqantam riqsikunku. Oficinankuqa kachkan Nueva Yorkpi kaq Warwick llaqtapim.

Enteron pachapi iñiqkuna (hermandad). Chaynataqa ninku enteron allpa pachapi lliw Jehova Diospa testigonkunatam (1 Pedro 5:9).

Galaad escuela (Galaad, Escuela de Galaad). Castellanopi sutinmi Escuela Bíblica de Galaad de la Watchtower. Chay escuelaqa qallarirqa 1943 watapim misionerokunata yanapanankupaq. Chaypiqa bibliatam suma-sumaqta estudianku pichqa killantin. Chay escuelaman riqkunaqa testigokunallam kanku.

Hatun huñunakuy (asamblea). Chaynataqa niniku Jehova Diospa testigonkuna ukupi achka congregacionkunapa huñunakusqaykutam. Qaway  huk punchawlla hatun huñunakuy,  huklaw nacionniyuqkunapaqwan hatun huñunakuy hinaspa  kimsa punchaw hatun huñunakuy nisqanta.

 Huk punchawlla hatun huñunakuy (asamblea de circuito). Jehova Diospa testigonkunam achka congregacionkunamanta huk punchawlla huñunakuniku. Watapim iskay kutita apakun sabadonpi utaq domingonpi. Lliw munaqkunam rinmanku, chaypi yachachisqankuqa yanapawanchikmi Jehova Dioswan amistad kanapaq. Bibliawan chaypi consejokuna qusqankupas llapallanpaqmi. Chay consejokunata kawsakuyninchikpi imaynata ruwayman churanapaqpas actuacionkunam kan. Chay huñunakuykunaqa apakun Jehova Diospa testigonkunapa hatun huñunakuy ruwananku localpim, qawachwantaqmi internetpipas.

 Huklaw nacionniyuqkunapaqwan hatun huñunakuy (asamblea internacional). Chayqa tawa utaq pichqa watamanta Jehova Diospa testigonkunapa ruwasqanku kimsa punchaw hatun huñunakuymi, apakunmi enteron pachapi akllasqanku llaqtakunapi. Chay huñunakuyqa yaqa llapanpim ruwakun viernesmanta domingokama. Chay huñunakuymanmi invitanku achka nacionmanta testigokunata. Chaywanpas yaykunmanmi pipas munaqqa. Chay asambleaqa ruwakun Diosta yupaychanapaqmi hinaspa bibliamanta yachachikuykunata uyarinapaqmi, chaynapi chay huñunakuypi kaqkuna allin iñiyniyuq kanankupaq hinaspa enteron pachapi testigokuna huk sunqulla kanankupaq. Chay asambleakunaqa yaqa llapanpim ruwakun alquilasqa localkunapi.

Iñiqkunapi punta apaq (anciano). Kay sutiwanqa riqsinku yachachinanpaq hinaspa iñiqkunamanta nanachikunanpaq bautizasqa qarikunatam. Iñiqkunapi punta apaqkunaqa kananku 1 Timoteo 3:1-7; Tito 1:5-9; Santiago 3:17, 18 hinaspa 1 Pedro 5:2 nisqanman hinam. Punta apaqkunaqa mana pagasqallam iñiqkunata yanapanku, paykunaqa manam huñunakusqankupi iñiqmasinkunapa nitaq Jehova Diospa testigonkunapa corporacion nisqankupa contratasqanchu kanku. Paykunaqa kikinkupaqwan familiankupaqmi imapas necesitasqankupaq llamkanku. Punta apaqkunaqa wakin iñiqkunawanmi igualla kanku. Anciano utaq iñiqkunapi punta apaq nisqanqa manam paykuna riqsisqa utaq hatunchasqa kanankupaqchu.

Jehova. Bibliapa nisqanman hinaqa tukuy imata unanchaq hinaspa tukuy atiyniyuq Diospa sutinmi Jehova (Salmos 83:18). Manam Jehova Diospa testigonkunataqa sutichanankuchu Jehovakuna utaq Jehovapi kaqkuna nispaqa.

Jehova Diospa gobiernonmanta Willakuq qillqa (La Atalaya. Anunciando el Reino de Jehová). Jehova Diospa testigonkunapa ancha riqsisqa qillqankupa sutinmi, riqsinkutaqmi Willakuq sutiwanpas. Paykunam chay revistataqa ruwanku hinaspa aypunku. Chay revistaqa Willakuq nispam sutichakun Diospa nisqankuna imayna cumplikusqanta willawasqanchikrayku hinaspa qawan-qawanlla utaq rikchan-rikchanlla kanapaq yanapawasqanchikrayku (Mateo 24:42). Mana testigokunapaq Willakuq qillqatam bibliamanta yachay munaq runakunaman gratislla qunku. Huñunakuypi estudianapaq revistatañataqmi enteron allpa pachapi sapa congregacionpi estudianku. Willakuq revistaqa 1879 watamantaraqmi hinalla ruwasqa kachkan hinaspapas chay revistam ima revistamantapas aswan aypusqa enteron pachapi.

Jehova Diospa testigonkuna (testigos de Jehová). Jesuspa qatiqnin religionmi kanku. Testigokunaqa Jehova Diostam yupaychanku, hinaspapas kallpanchakunkum bibliapa nisqanta runamasinkuman willanankupaq. Imamantapas astawanqa willakunku Jehova Diospa gobiernonmantam (Mateo 24:14). Paykunallam Jehova Diospa testigonkuna niq sutitaqa apanku. Chayqa Diospa sutinmi, hinaspapas paykunaqa Jehova Diosmantam willakunku gratislla. Pipas Jehova Diospa testigonqa kanman bibliapa nisqankunata allinta entiendespam, iñiqkunawan Diosmanta willakuspam hinaspa Diosllapaqña tantiakusqanta qawachinanpaq achka runapa qayllanpi bautizakuspam. Religionpa sutinta imapipas chayllaraq churaspaykichikqa Jehova Diospa testigonkuna nispam churanaykichik. Niwaqchiktaqmi testigokuna nispapas. Runamanta rimaspaqa niwaqchik testigo utaq Jehova Diospa testigon nispam (Isaias 43:10).

Jehova Diospa testigonkunapa hatun huñunakuy ruwananku local (Salón de Asambleas de los Testigos de Jehová). Chaynatam sutichanku Jehova Diospa testigonkunapa hatun huñunakuyta ruwananku localninkuta. Chay localninkupim huñunakunku chay lawpi kaq congregacionkuna. Sutichankutaqmi asamblea ruwananku localwanpas.

Jehova Diospa testigonkunapa huñunakunanku wasi (Salón del Reino de los Testigos de Jehová). Chaynatam ninku huk utaq achka congregacionkunapa huñunakusqanku wasita. Ninkutaqmi huñunakunanku wasi utaq salon nispallapas. Ama hina kaspa ama niychu iglesia nispaqa.

Jesucristo. Diospa piwi churin. Jehova Diospa testigonkunapaqqa Jesucristoqa kamachiqninkum, chaymi kallpanchakunku Jesuspa ima ruwasqankunatapas qatipakunankupaq hinaspa yachachisqanman hina kawsakunankupaq. Ninkum lliw runakunamanta aswan riqsisqa kasqanta, pay punta kaq testigo kasqanta hinaspa payta Jehova Dios runakunata salvananpaq akllasqanmanta (Isaias 9:6, 7; Apocalipsis 1:5).

Jesuspa wañukusqanta yuyarinapaq huñunakuy (Conmemoración de la muerte de Cristo). Chay huñunakuytaqa ninkutaqmi señorpa santa cenan nispapas. Chay huñunakuyqa watapim huk kutillata apakun Jesuspa wañukusqanta yuyarinapaq. Jehova Diospa testigonkunapaqqa chay huñunakuymi watapi ima huñunakuy ruwasqankumantapas aswan chaninniyuq. Jesusqa chay huñunakuyllata yuyarinankupaqmi qatiqninkunata kamachirqa (Lucas 22:19, 20).

 Kimsa punchaw hatun huñunakuy (asamblea regional). Chaynataqa ninku watapi huk kutita achka congregacionkunapa huñunakusqankutam. Chay huñunakuyqa kimsa punchawmi apakun, hinaspapas chaypi kaqkunatam kallpanchan Dioswan allin amistad kanankupaq. Chay huñunakuyqa gratismi, yaykunmanmi pi runapas. Chaypiqa bibliamanta sumaq consejokunatam llapallan riqkuna uyarinku. Kanmi imakunapas pasawasqanchikmanta demostracionkuna hinaspa bibliapi willakuykuna, chaykunam yanapawanchik imaynata bibliapa nisqanta kasukunapaq. Chay huñunakuykunaqa apakun alquilasqa hatun localkunapim utaq estadiokunapim. Aslla kaptinkuqa apakunmantaqmi Jehova Diospa testigonkunapa hatun huñunakuy ruwananku localkunapipas. Yaqa llapanpim chay huñunakuyqa apakun viernesmanta domingokama. Qayna watakunamantam chay huñunakuypi yachachikuykuna grabasqankuqa kachkanña internetpipas.

¡Rikchariy! (¡Despertad!). Kay revistaqa Jehova Diospa testigonkunapa ruwasqankum hinaspa aypusqankum. Inglespim ruwayta qallaykurqaku 1919 watapi The Golden Age sutiyuqta. 1937 watapim chay sutita cambiarurqaku Consolation sutiwan. 1946 watapi agosto killapa 22 punchawninpiñataqmi Awake! sutiwanña cambiarurqaku. Chaytam castellanopi riqsinchik ¡Despertad! sutiwan, quechuapiñataqmi ¡Rikchariy! sutiwan. Chay sutitaqa akllarqaku “rikchan-rikchanlla” kanamanta runakunaman qawachinapaqmi utaq bibliapa nisqanman hina ima tiempopi kawsasqanchikta runakuna cuentata qukunankupaqmi. Kay qillqam utaq kay revistam aswan achkanpi ruwakun hinaspa aypukun wakin revistakunamantaqa.

Llaqtan-llaqtan watukuq (superintendente de circuito). Betel wasi cuentallikuqpa dirigisqan unayña kaq iñiqkunapi punta apaqmi. Paymi achka congregacionkunata watukun watapi iskay kutita. Casarasqa kaspanqa esposanpiwanmi watukunku. Sapa watukusqan congregacionpim chaypi huñunakuqkunata kallpanchan, kallpanchantaqmi chaypi kaq punta apaqkunatapas chaynataq paykunapa yanapaqninkutapas. Watukusqan iñiqkunata imakunapi kallpanchananpaqqa puntatam yachanan chaypi kaq iñiqkuna imakuna necesitasqankuta.

Llaqtan-llaqtan watukuq nisqanqa manam paykuna riqsisqa utaq hatunchasqa kanankupaqchu.

Ministerio del campo. Qaway  Diosmanta willakuy nisqanta.

Musuq allpa pachapi kawsaqkunapaq biblia (La Biblia. Traducción del Nuevo Mundo). Chaynam sutin hebreo rimaypi hinaspa griego rimaypi Jehova Diospa testigonkunapa ruwasqanku bibliapa (chaytaqa ninkutaqmi ñawpaq testamento hinaspa musuq testamento nispapas).

Precursor, precursora. Chaynatam ninku sapa killa achka horata Diosmanta willakuqkunata. Kanmi precursor regular hinaspa precursor auxiliar nisqanku. Precursor regularkunam sapa wata 600 horata Diosmanta willakunku (sapa killam willakunku 50 horata). Precursor auxiliarkunañataqmi 15 utaq 30 horata huk killa utaq achka killa Diosmanta willakunku. Precursorkunaqa manam pagotaqa chaskinkuchu sapallanku utaq iñiqmasinkuwan kuska Diosmanta willakusqankumantaqa. Paykunaqa manataqmi huñunakusqankupi iñiqmasinkupa nitaq Jehova Diospa testigonkunapa corporacion nisqanpa contratasqanchu kanku. Paykunaqa imapas necesitasqankupaqmi llamkanku. Precursor utaq precursora sutiqa manam paykuna riqsisqa utaq hatunchasqa kanankupaqchu.

Punta apaqpa yanapaqnin (siervo ministerial). Paykunaqa kanku qari testigokunam, paykunam nombrasqa kanku congregacionpaq punta apaqkunata ima ruwaypipas yanapanankupaq. Punta apaqpa yanapaqninkunaqa kananku 1 Timoteo 3:8-10, 12, 13 hinaspa Tito 2:2, 6-8 nisqanman hinam. Paykunam encargakunku congregacionpi imapas allin kananpaq, yanapakunkutaqmi ima ruwaypipas. Manam ima pagotapas chaskinkuchu. Manataqmi huñunakusqankupi iñiqmasinkupa nitaq Jehova Diospa testigonkunapa corporacion nisqanpa contratasqanchu kanku. Paykunaqa kikinkupaqwan familiankupaqmi imapas necesitasqankupaq llamkanku. Tiempopa pasasqanman hinam iñiqkunapi punta apaq kanankupaq kallpanchakunmanku.

Punta apaqpa yanapaqnin nisqankuqa manam riqsisqa utaq hatunchasqa kanankupaqchu.

Semana tukuyta huñunakuy (reunión de fin de semana). Kay huñunakuyqa sapa semanam huk kutita apakun semana tukuyta, iskaymanmi rakisqa. Punta kaqpim 30 minuto apakun lliw runakunapaq yachachikuy. Tukuynintañataqmi 1 hora estudianku Willakuq revistata lliw huñunakuqkunawan, chay revistapiqa bibliamanta yachachikuykunam kachkan. Jehova Diospa testigonkunapa wakin huñunakuyninkuman hinam pipas gratislla yaykunman, manataqmi qullqitaqa mañakunkuchu. Huñunakuyninkutaqa rispaykim uyariwaq, uyariwaqtaqmi internetnintakamapas.

Semanapi punta kaq huñunakuy (reunión de entre semana). Kay huñunakuyqa sapa semanam huk kutita apakun tarden utaq tutaykuqta. Kay huñunakuypa sutinmi Diospa munayninta ruwananchikpaq huñunakuy, kimsamanmi rakisqa. Kay huñunakuypim testigokunaqa yachachisqa kanku allin yachachiq kanankupaq chaynataq bibliapa nisqanman hina kawsakunankupaq. Jehova Diospa testigonkunapa wakin huñunakuyninkuman hinam pipas gratislla yaykunman, manataqmi qullqitaqa mañakunkuchu. Huñunakuyninkutaqa rispaykim uyariwaq, uyariwaqtaqmi internetnintakamapas.

Wawqi-pani, turi-ñaña (hermano, hermana). Chaynataqa ninku bautizasqa kaqkunatam. Chaynataqa ninakunku manam hatunchanakuspankuchu.

NOTA: Ama hina kaspa, Jehova Diospa testigonkunamanta periodicopi utaq noticiapi chayllaraq rimaspaykiqa completo sutintam puntataqa rimanayki.