¿Pikunallataq hanaq pachamanqa rinku?
¿Imatam bibliaqa yachachin?
Jehova Diosqa payman sunqu wakin runakunallatam hanaq pachapi kawsanankupaqqa akllaykun, paykunaqa wañukuspankum hanaq pachapi kanankupaqña kawsarinku (1 Pedro 1:3, 4). Akllasqa kaspankupas hinallam Diospi hapipakunanku, hinaspapas Diospa munasqanman hina kawsakunankupaqmi hinalla kallpanchakunanku, mana chayqa manam hanaq pachamanqa rinmankuchu (Efesios 5:5; Filipenses 3:12-14).
¿Imatataq hanaq pachapi ruwanqaku?
Hanaq pachapaq akllasqankunaqa Jesuswan kuskam hanaq pachamanta waranqa wata kamachimunqaku hinaspapas sacerdotekunam kanqaku (Apocalipsis 5:9, 10; 20:6). Hanaq pachapaq akllasqakunatawan Jesustam bibliaqa tupachin musuq cielowan. Kay allpa pachapi kawsakunankupaq kaqkunatañataqmi tupachin musuq allpa pachawan. Jesuswan yanapaqninkunaqa tukuytam ruwanqaku Jehova Diospa munasqanman hina runakuna hawkalla kusisqa kawsakunankupaq (Isaias 65:17 a; 2 Pedro 3:13).
¿Haykam hanaq pachaman rinqaku?
Bibliam niwanchik 144.000 runakuna hanaq pachapi kanankupaq kawsarinankumanta (Apocalipsis 7:4). Apostol Juanqa musquyninpi hinam qawarqa Sion urqupi malta carnero sayachkaqta, payqa Jesusmi. Paywanmi kachkasqa 144.000 runakuna (Apocalipsis 14:1-3; Juan 1:29; 1 Pedro 1:19). Sion muquqa tupanmi cielowan, chaymantam Jesusqa hanaq pachapaq akllasqakunawan kamachimunqa (Salmos 2:6; Hebreos 12:22).
Bibliaqa hanaq pachapaq akllasqakunataqa tupachintaqmi “aslla kaq ovejakuna” nispapas (Apocalipsis 17:14; Lucas 12:32). Kayqa sutillatam musyachiwanchik hanaq pachaman riqkunaqa Diosman sunqu runakunamanta wakillan kasqankuta (Juan 10:16).
Hanaq pachaman riqkunamanta runakunapa ima nisqanku
Runakunam ninku: “Llapallam allin ruwaq runakunaqa hanaq pachamanmi rinku”, nispanku.
¿Chaynachu? Bibliapa nisqanman hinaqa yaqa lliw allin ruwaq runakunam kay allpa pachallapi wiñaypaq kawsakunqaku (Salmos 37:11, 29, 34).
Jesusmi nirqa: “Manam pi runapas hanaq pachamanqa qispirqachu”, nispa (Juan 3:13). Chayna nisqanwanmi yachanchik Moises, Job, David hinaspa tiemponkupi allin ruwaq runakunaqa mana hanaq pachaman risqankuta, paykunaqa kay allpa pachaman Jesús manaraq hamuchkaptinmi wañukurqaku (Hechos 2:29, 34). Diosman sunqu chay runakunaqa manam iskayrayarqakuchu kay allpa pachapi kawsarimuspanku wiñaypaq kawsakunankumantaqa (Job 14:13-15).
Hanaq pachapi kawsariqkunataqqa bibliapim nin ‘punta kawsariqkuna’, nispa (Apocalipsis 20:6). Chaywanmi yachanchik huk kawsarimuypas kananta, chayqa hina kay allpa pachallapim kanqa.
Bibliaqa yachachiwanchiktaqmi Jehova Diospa gobiernonpi Jesus kamachiptinqa wañuypas manaña kananmanta (Apocalipsis 21:3, 4). Hanaq pachapiqa manam haykapipas wañuyqa karqachu, chaymi kaypi bibliapa nisqanqa kay allpa pachapi cumplikunanmanta rimachkan.
Runakunam ninku: “Sapakamam akllakunchik hanaq pachapi kawsakunankupaq utaq kay allpa pachapi kawsakunapaq”, nispanku.
¿Chaynachu? Manam. Bibliapim niwanchik Jehova Dioslla ‘hanaq pachaman’ riqkunataqa akllasqanmanta (Filipenses 3:14). Arí, Jehova Diosmi tantian hanaq pachapi kawsanapaq utaq hina kay allpa pachallapi kawsanapaqpas (Mateo 20:20-23).
Runakunam ninku: “Allin runakunallam hanaq pachamanqa rinqaku, mana chaypaq hina kaqkunañataqmi hina kay allpa pachallapi kawsakunqaku”, nispanku.
¿Chaynachu? Kay allpa pachapi kawsakunankupaq kaqkunataqa Jehova Diosmi nin: “‘Llaqtaykuna’, ‘akllasqaykuna’ hinaspa ‘bendecisqay miraykuna’”, nispa (Isaias 65:21-23). Paykunaqa qallariypi hinam Jehova Diospa munasqanman hina wiñaypaq kusisqa kay allpa pachapi kawsakunqaku (Genesis 1:28; Salmos 115:16; Isaias 45:18).
Runakunam ninku: “Apocalipsis libropi 144.000 runakunamanta rimaspanqa tupanachiyllam-tupanachichkan”, nispaku.
¿Chaynachu? Manam. Bibliapi wakin numerokunata tupanachiylla-tupanachiptinpas, wakinpiqa manam tupanachiyllachu-tupananchin. Kaypi yuyaymanasun, bibliam nin: “Rumikunapim qillqasqa kasqa malta carneropa chunka iskayniyuq apostolninkunapa sutin”, nispa. Chaynata nispanqa manam tupanachiyllachu-tupananchichkan (Apocalipsis 21:14). 144.000 runakunamanta rimaspanpas manam tupanachiyllachu-tupanachichkan. Chaymanta yachaykusunchik.
Apocalipsis 7:4 willawanchik “pachak tawa chunkan tawayuq waranqa runakuna sellowan marcasqa kasqankuta”. Kaywanqa niwachkanchikmi paykunaqa hanaq pachapi kawsanankupaq akllasqa kasqankumanta. Chaymantapas bibliaqa niwanchiktaqmi mana pipa yupay atinan achkallay-achka runakunamantapas, paykunaqa hina kay allpa pachapim kawsakunqaku, ichaqa manam niwanchikchu hayka kasqankumantaqa (Apocalipsis 7:9, 10). Llapallan allin ruwaq runakuna hanaq pachaman riptinkuqa, manam bibliapiqa ninmanchu 144.000 runakunalla akllasqa kasqankumantaqa aswanmi ninman achkallay-achka akllasqa kasqankuta. b
Kay 144.000 runakunamanta bibliapi rimaspanmi nin: ‘Punta rikurimuq ruru hina runakunamantam rantisqa kanku’, nispa (Apocalipsis 14:4). Arí, hanaq pachaman riqkunaqa akllasqam kanku Jesuswan kuska kamachimunankupaq. Paykunaqa kay allpa pachapi kawsakuqkunatam kamachimunqaku (Apocalipsis 5:10).
a Kay qillqapi ñawpaq testamentoqa Chuya Qellqa sutiyuq bibliamantam kachkan.
b Yachachiq Robert Thomaspas 144.000 numeromanta rimaspanmi nin: “Bibliapiqa ninmi Jesuswan kuska sayaqkunaqa 144.000 kasqankuta. Apocalipsis 7:9 nisqanpiñataqmi riman mana yupay atina runakunamanta. Chayraykum mana ninanchikchu: ‘Tupanachiyllam-tupananchichkan’, nispaqa” (Comentario exegético de Revelacion 1-7, pagina 474).
Kaykunatapas leeykuy
BIBLIAPA ANCHA ALLIN YACHACHIKUYNINKUNA
¿Imataq Diospa munaychakuyninqa?
Kay pachapi Jesus kaspanqa astawanmi willakurqa Diospa munaychakuyninmanta. Qatiqninkunapas unay tiempoñam mañakuchkanku Diospa munaychakuynin kay pachaman hamunanpaq.
BIBLIAMANTA YACHACHIKUYKUNA
Yachachisunaykipaq mañakuy
Mana qullqillapaq biblia estudianaykipaq mañauy.