YACHACHINA 7
Tata Yáyap Reinun, ¿imát can?
1. Tata Yáyap Reinun, ¿imát can?
¿Imajchus niyta aticun ima Jishu suj alli gobérnaj can? (MARCOS 1:40-42 cama).
Suj gobiernu celestial can, ima ʼruancka Tata Yáyap voluntarnin ʼruacuchun cielupi y Ashpapi. Chá gobiernu can ima persunas precisancu. Mana unas túcuy gobiernus humanusta reemplásaj ʼrin y túcuy persunasta cuscayachencka caypi Ashpapi causanancúpaj. ¿Manachu cá noticias ancha súmaj cancu? Daniel 2:44; Mateo 6:9, 10 y 24:14 léey.
Túcuy gobiernus suj gobernajta apin, Tata Yaya Jehová churara Jishút, gobérnaj ina Reinunmanta. Apocalipsis 11:15 léey.
Ckáay vidiu ¿Imát can Tatayáyap Reinun?
2. ¿Imajchus Jishu alli gobérnaj can?
Tata Yáyap huaan astaan alli gobérnaj can, cuyácoj can y túcuy justiciaan ʼruan (Juan 1:14). Nátaj, átiy apin túcuy persunastas yanapáypaj y chayta ʼrúaj ʼrin gobernaptin Ashpát cielumantapacha. Áicap causachiscka cara, Jishu cieluman llockara, maypi Tata Yáyap checkanpi tias suyara autoridarta chasquíypaj gobernáypaj (Hebreos 10:12, 13). Puchucáypaj, Tata Yaya chá autoridar payta ckora. Daniel 7:13, 14 léey.
3. ¿Gobérnaj ʼrincu Jishuan sujcuna persunas?
Biblia nin ima suj grupu Tata Yáyap siervusninmanta, Jishuan gobérnaj ʼrincu. Danielpi 7:27 nin ima santus huajyacuncu. Huamajcuna ajllasckas Tata Yayaraycu santus cáypaj Jíshup apostulesnin carancu. Jehová punchausniycucama ajllas tían ckaris y huarmis femanta, parte canancúpaj chá grupumanta. Quiquin Jishu, cá persunas huañuptincuna cieluman ʼrincu y chasquincu suj cuerpu ima mana can tullumanta ni aichamanta. Juan 14:1-3 cama y 1 Corintios 15:42-44 cama léey.
¿Aicas cieluman ʼrej ʼrincu? Biblia nin ima mana ashcas cancu, Jishu «utula rebañu» huajyara (Lucas 12:32). Picuna Jishuan Ashpata gobérnaj ʼrincu, 144.000 cancu. Apocalipsis 14:1 léey.
4. ¿Ima sucedera áicap Jishu gobernayta ckallarera?
Jishu 1914 huatapi gobernayta ckallarera, y huámaj ʼruasckanta cara Supayta y demoniusninta cielumanta Ashpaman chockacuyta. * Súpay ancha piñacus túcuy Ashpapi persunasta usuchicuyta ckallarera (Apocalipsis 12:7-10 cama, 12). Chaymantapacha, Ashpapi afliciunes persunasmanta astaan sajra ʼruacorancu. Guerras, Áshpap chucucuynin, onckoycuna, yárckay cumplincu suj profecía ima ckaachin Tata Yáyap Reinun mana unas Ashpát gobérnaj ʼrin. Lucas 21:7, 10, 11, 31 léey.
5. Cunan, ¿imát ʼruashcan Tata Yáyap Reinun? Y ámoj pachapi, ¿ima ʼrúaj ʼrin?
Predicaciunuan túcuy Ashpapi, Tata Yáyap Reinun tantanachishcan, ashca ashca persunasta túcuy naciunesmanta. «Ancha ashca persunas» alli sonckomanta discípulus casúcoj Jishumanta ʼruacushcancu. Túcuy caycunát Tata Yáyap Reinun ckeshpichícoj ʼrin chamcka ʼruaptin cá mana alli mundút. Chayraycu, si munaycu cá Reinu ʼruasckanmanta beneficiacuyta, yachanaycu tían Jishút casucuyta. Apocalipsis 7:9, 14, 16, 17 léey.
Chá 1.000 huataspi, cá gobiernu propositunta persunáspaj ʼrúaj ʼrin. Túcuy Ashpa suj jardín ina ʼcaj ʼrin. Chaymantá, Jishu gobiernút Tatanta cutis ckópoj ʼrin. (1 Corintios 15:24-26 cama). ¿Tían pillapas pít cá gobiernumanta ʼrimapuyta munanqui? Salmo 37:10, 11, 29 léey.
^ párr. 6 Astaan yacháypaj Biblíap profecianmanta ima 1914 huatapi ckallarera, ckáay nota 22 páginas 217-220 cama librumanta Biblia, ¿imát yachachiáysh?
