¿Diosca canmanta preocuparinchu?
¿DIOSCA ÑUCANCHIJTACA IMA LAYATAJ RURARCA?
Mamacunaca huahuacunata huachai horasmantami paicunamanca achca cꞌuyaita ricuchincuna. ¿Imamantataj chashna rurana can? Huacharishca horasmanta cꞌuyaita ricuchijpica huahuacunaca alli, sanomi huiñangacuna. *
Doctora Jeannette Crenshawca: “Huahuata ungushca qꞌuipaca mamapaj cuerpopica hormona oxitocina nishcami mirai callarin. Chai tiyashcamantami mamacunaca huahuacunata marcanata, cꞌuyanata munancuna” ninmi. Chai ratollatajmi mamapaj cuerpopica shujtaj hormonapish ricurin. Chai hormona tiyashcamantami mamapish, huahuamantaca mana separarinata munan. Shinallataj huahuapish mamamantaca manataj separarisha nin (The Journal of Perinatal Education).
Mamapish, huahuapish cꞌuyaita ricuchinacuchunca Jehová Diosmi chashna rurarca. * Rey Davidca huachari horasmanta paipaj mama cuidashcata ricushpami Yaya Diostaca pagui nirca. Chaimantami Diosta mañashpaca: ‘Ñuca mamapaj huijsapi cai horasmantami ñuca Dios cangui’ nirca (Salmos 22:9, 10).
CAIPI YUYAI: Yaya Diosmi mamacunataca huahuacunamanta preocuparichun, cꞌuyaita ricuchichun rurarca. Chai mama layallatajmi Yaya Diosca cada unomanta preocuparin (Hechos 17:29, QC, 1989).
¿BIBLIAPICA IMATATAJ YACHACHIN?
Jesusllami Jehová Diostaca alli rijsin. Paica: “¿Manachu ishqui pajarocunata shuj cullquipi cꞌatuncuna? Chashna cꞌatujpipish cancunapaj Yaya huañuchun mana munajpica shujllapish mana huañunchu. Cancunapaj uma ajchapish tucui yupashcami canguichij. Chaimanta amataj manchaichijchu. Cancunacarin, achca pajarocunatapish yalli valijmi canguichij” nircami (Mateo 10:29-31).
Pajaritocunamantaca asha gentecunallami preocuparin. Pero Yaya Diosca tucui pajaritocunamantami preocuparin. Gentecunacarin Diospajca pajaritocunatapish yalli valishcami canchij. Chaimanta Diosca ‘mana ñucamanta preocuparinchu’ nishpaca mana yuyanachu canchij. Ashtahuanpish paica ñucanchijmanta achcatami sustarin.
Diosca ñucanchijta cꞌuyashcamantami alli causachun munan.
Bibliapica cashnami nin:
-
“Mandaj Diosca allicunatapish, millaicunatapish maipi imata ruracujta ricuracunmi” (PROVERBIOS 15:3).
-
“Mandaj Diospaj ñahuica cashcata rurajcunataca chaparacunmi. Paicuna caparishcata uyangapajpish uyaracunmi” (SALMO 34:15).
-
“Ñuca llaquihuan cajtami ricushcangui. Ñuca alma llaquihuan huañucujtami rijsingui. Mandaj Dioslla quiquinpaj cꞌuyaihuan cushichijpimi cushicuni” (SALMO 31:7).
“DIOSCA ÑUCATACA MANA CꞌUYANCHU NIJMI CARCANI”
Ñucanchijmanta Yaya Dios preocuparijta ricushpami cushilla sintirinchij. Cunanca Inglaterrapi causaj Hannah * huarmimanta parlashun. Paica cashnami nin:
“Achca cutinmi, ‘Jehová Diosca ñucataca mana cꞌuyanchu, paita mañajpipish mana uyanchu. Paipi mana tucui shunguhuan crishcamantami ñuca mañashcacunataca mana uyan, imapaj mana valinichu’ nishpami yuyaj carcani” ninmi.
¿Hannah huarmi chashna ama yuyangapajca imatataj rurarca? Paica cashnami nin: “Jesús ñucanchijmanta huañushcata yachachijpimi Jehová Dios ñucata cꞌuyashcata cuentata curcani. Shinallataj Yaya Dios ñuca mañashcacunata cutichijpimi cushilla sintirishpa huaquinpica huacaj carcani. Ashtahuancarin Bibliamanta yachashpa, tandanacuicunaman rishpami Jehová Diostaca alli rijsircani. Chashnami Dios ñucamantapish preocuparijta cuenta curcani. Cunanca Yayitu Dios cꞌuyashcata, tucuipi ayudashcatami crini” ninmi.
Yayitu Diosca can ima shina sintirishcataca allimi intindin. Chaitaca catij temapimi ashtahuan yachashun.
^ Huaquin mamacunaca depresión ungüitami charincuna. Chaimantami huahuacunata ungushca qꞌuipa cꞌuyaita ricuchinaca sinchi can. Chashna ungüita charishpaca mamacunaca mana tanto llaquirinachu can. Instituto Nacional de la Salud Mental de Estados Unidos nishca shinaca, shuj mamaca huahuata ungushpaca paipaj cuerpo cambiarijpimi, huaquinpica llaquilla, culira sintirin. ‘Paica deganami chashna sintirin’ nishpaca mana yuyanachu canchij. Caimanta ashtahuan yachangapajca, “¿Qué es la depresión posparto?” nishca temata ricui. Chaica ¡Despertad! del 8 de junio de 2003 huatapimi llujshirca.
^ Bibliapica Diospaj shutica Jehovami can ninmi (Salmo 83:18, Reina-Valera, 1960).
^ Huaquin shuticunatami cambiashcanchij.
Puede que también le interese
HUILLAJ
¿Diosca cambaj shungupi ima tiyashcataca yachanchu?
Diosca ñucanchijta rijsishcamantami ima shina sintirishcataca alli intindin. Ñucanchij ADN nishcatapish allimi rijsin.
HUILLAJ
¿Dios cushca regaloca imamantataj valishca can?
¿Imamantataj shuj regaloca valishca can? Caipi yuyashpaca Jesús huañushcamantami ashtahuan agradicishun.
