Ñucaca Inglaterra llajta Paddington barriopimi huacharircani. Chaipica achca gentecunami causan. Ñuca mamahuan, ñuca quimsa jatun ñañacunahuanmi causaj carcani. Ñuca yayaca machai solo purishcamantami ñucanchijta mana cuidaj carca. Huaquinllapimi ñucanchijhuan pasaj carca.

Ñuca huahuaraj cajpimi ñuca mamaca Yaya Diosta mañanata yachachirca. Ñucaca shuj uchilla Bibliatami charij carcani. Chai Bibliapica Salmocunallami tiyarca. Chai Salmocunata cantangapajca ñuca yuyaillamantami musicacunata llujchij carcani. Shuj vezpica shuj libropimi, “Shuj punllaca tucuimi tucuringa” nishca yuyaita liyircani. Chaita liyishpami mancharircani. Shamuj punllacunapi ima tucunata yuyashcamantami tutacunapish mana dormi tucurcani. Ñucaca, “¿chaipajllachu causanchij? ¿Imamantataj caipi canchij?” nishpami tapurij carcani. Ñucaca mana huañusha nircanichu.

Ayacunamanta, fantasmacunamanta yachanatami munaj carcani. Chaimantami huañushcacunahuan parlanata munarcani. Escuelamanta compañerocunahuanpish cementeriocunamanmi rij carcani. Shinallataj paicunahuanca manchanana peliculacunata ricungapajmi tandanacuj carcanchij. Chai tucuita rurana mancharina cajpipish chaita ruranatami munaj carcani.

10 huatacunallata charishpami ñucaca mana allicunata rurai callarircani. Tabacota fumai callarishpami chai viciopi urmarcani. Qꞌuipacarin marihuanatami fumai callarircani. 11 huatacunata charishpaca tragotami ubyai callarircani. Trago jayaj cajpipish machashpa alli sintirishcamantami ubyaj carcani. Musicata uyanata, bailanatapishmi munaj carcani. Chaimantami casi siempre fiestacunaman, discotecacunaman rij carcani. Tutacunapi huasimanta llujshishpami pacaricui horas tigraj carcani. Chaitaca mana pi ricujchu carca. Cayandij punllaca shaicushca sintirishcamantami escuelamanca mana rij carcani. Y escuelaman rishpapish tragota ubyashpami pasaj carcani.

Escuelapi estudianata ña tucuchicujpica mana alli calificacionta charishcatami huillarcacuna. Ñuca mana allicunata rurashpalla pasashcamanta chashna calificacionta charishcata yachaj chayashpami ñuca mamaca achcata pꞌiñarirca. Paihuanca sinchitami litunacurcanchij. Chaimantami huasimanta llujshinata decidircani. Tony shuti ñuca noviohuanmi asha tiempota causarcani. Paica shuhuashpa, drogacunata cꞌatushpa, shujtajcunahuan macanacushpami pasaj carca. 16 huatacunallata charishpami ñuca punta churita charircani.

Gobierno ayudashcamantami madre solteracunapaj, paicunapaj huahuacunapaj shuj albergue nishcapi causanaman rircani. Chaipimi testigo de Jehovacunata rijsircani. Ishqui Testigo huarmicunami caishuj madre solteracunata visitanaman shamujcuna carca. Shuj punllaca paicuna yachachicujta ricushpami paicunapajman cꞌuchuyarcani. Paicuna pandata yachachicushcatami ricuchisha nircani. Shinapish paicunaca respetohuan, intindirinalla shimicunahuanmi ñuca tapuicunata Bibliahuan contestarcacuna. Paicuna ñucata cꞌuyaihuan tratashcamantami Bibliata estudiai callarircani.

Uchillamantapachami huañunata manchaj carcani. Pero, Jesús huañushcacuna causarinata huillashcatami yachaj chayarcani. Chaita yachashpami ñuca causaica cambiarca (Juan 5:28, 29). Shinallataj Yaya Dios ñucamanta sustarishcatami yachaj chayarcani (1 Pedro 5:7). Jeremías 29:11 versomi ñuca shunguman chayarca. Chaipica Yaya Diosca: “Ñuca cancunapaj imallata ruranataca ñucamari yachani. Cancunapajca llaquitaca mana cachashachu, ashtahuanpish sumaj causaitami cugrini. Cancuna shuyacushcatatajmi cusha” ninmi. Chai versota liyishpami paraíso Allpapi huiñai huiñaita causai tucushcata cri callarircani (Salmo 37:29).

Testigo de Jehovacunaca ñucataca cꞌuyaihuanmi tratarcacuna. Tandanacuiman punta cutin rishpaca allimi sintirircani. Chaipi canaca alajami carca. Tucuicunami cꞌuyaita ricuchircacuna (Juan 13:34, 35). Ñuca iglesiapica chashna mana nunca tratashcacunachu carca. Testigo de Jehovacunaca ñucataca mana juzgarcacunachu. Ashtahuanpish paicunaca tiempota cushpa, cꞌuyaita ricuchishpa, huaquin cosascunata rurashpami ñucata ayudarcacuna. Chashnami shuj jatun familiapi cashcata shina sintircani.

Bibliata estudiashpami Diospaj amiga cangapajca ñuca causaipi huaquin cambiocunata rurana cashcata intindircani. Ñucapajca tabacota fumana viciota saquinaca mana jahuallachu carca. Shinallataj huaquin musicacunata uyashcamantami marihuanata fumana munaita charishcata cuentata curcani. Chaimantami shujtaj musicacunata uyai callarircani. Ñucaca tragota ubyana viciopi ña mana urmasha nircanichu. Chaimantami fiestacunaman, discotecacunaman rinata saquircani. Shinallataj mushuj amigocunatami mashcarcani. Paicunami Diosta cushichingapaj alli causachun ayudarcacuna (Proverbios 13:20).

Chai tiempollapitajmi Tonypish testigo de Jehovacunahuan Bibliata estudiacushca carca. Paipaj tapuicunata Bibliahuan cutichijpimi verdadta yachacushcata convencido carca. Paica achca cambiocunatami rurarca. Paipaj millai amigocunamantami caruyarca. Shinallataj shuhuanata, marihuanata fumanatapishmi saquirca. Ñucanchijca Jehová Diosta cushichishun nishpa, ñucanchij huahuaman alli causaita cushun nishpami cazaranata decidircanchij. Chaimantami 1982 huatapi cazararcanchij.

Huillaj, Rijchari * revistacunapimi ñuca rurasha nishca cambiocunata shujtajcunapish ima shina rurashcata yachanata munarcani. Paicunapaj causaimanta yachashpami achcata animarircani. Shinallataj ñaupajman catingapajmi fuerzasta japircani. Jehová Diostaca ñucata ayudashpa catichunmi siempre mañaj carcani. Tonypish, ñucapish testigo de Jehovacuna shinami julio de 1982 huatapi bautizarircanchij.

Jehová Diospaj amiga tucushcamantami ñuca causaita quishpichishcani. Tonypish, ñucapish jatun llaquicunapi cajpi Jehová Dios ima shina ayudashcatami ricushcanchij. Llaquicunahuan cashpa Yaya Diospi confianatami yachashcanchij. Paimi siempre ñuca familiata cuidashca (Salmo 55:22).

Ñuca churitapish, ñuca ushushitapish Jehová Diospaj amigocuna tucuchun ayudashcamantami cushilla sintirini. Shinallataj ñuca nietocunapish Jehová Diosmanta yachacushcata ricushpami contenta sintirini.

Cunanca shamuj punlla ima tucunamanta, huañunamantapish ña mana sustarinichu. Tranquilami dormini. Tonypish, ñucapish cada semana chꞌican chꞌican congregacioncunapi turi ñañacunata visitacushcamanta, animachicushcamantami ocupados pasanchij. Paicunahuanmi gentecunaman predicanchij. Gentecunamanca huiñai causaita charingapaj Jesuspi crina cashcatami yachachinchij.