Romanos 14:1-23
-
Caishuj chaishuj mana juzganamanta (1-12)
-
Shujtajcunata mana ñitcachinamanta (13-18)
-
Shujtajcunahuan sumajta causanamanta, tandalla canamantapish (19-23)
14 Manaraj sinchi feta charij runataca alli chasquichij. Cancuna shina mana yuyajcunatapish ama juzgaichijchu.
2 Sinchi feta charij runaca tucui laya micunatachari micunga. Shinapish manaraj sinchi feta charij runaca verduracunallatachari micunga.
3 Micuj runapish mana micuj runataca ama pꞌiñachun. Cutin mana micuj runapish micuj runataca ama juzgachun. Diosmi paitaca alli chasquishca.
4 ¿Shujtajta sirvij runata juzgangapajca canca pitaj canguiyari? Paipaj amomi chai runataca allitami ruracungui o mana allitami ruracungui ninga. Ashtahuancarin chai sirvij runaca Jehová* Dios ayudajpimi paipaj ñaupajpica alli ricuringa.
5 Maijancunaca shuj punllami shujtaj punllacunamanta ashtahuan yalli alli can nincunami. Cutin shujtajcunaca tucui punllacunami chashnallataj can nincunami. Chashna cajpipish cada unomi quiquin ima yuyacushcataca alli cashcata crina can.
6 Shuj punllami shujtaj punllacunamanta ashtahuan yalli alli nijca Jehová* Diostami jatunyachin. Chashnallatajmi tucui laya micunacunata micujca Jehová* Diosta jatunyachin. Chai micunamantapish Diostami pagui nin. Cutin mana micujpish Jehová* Diostami jatunyachin. Paipishmi Diosta pagui nin.
7 Ñucanchijca mana ñucanchijpajlla causanchijchu. Huañushpapish mana ñucanchijpajlla huañunchijchu.
8 Causashpapish Jehová* Diospajmi causanchij. Huañushpapish Jehová* Diospajmi huañunchij. Shinaca causashpapish, huañushpapish Jehová* Diospajmi canchij.
9 Cristoca huañushcacunapajpish, causajcunapajpish Amito cangapajmi huañushpa cutin causarirca.
10 Shinaca ¿imamantataj cambaj huauquitaca juzganguiyari? ¿O imamantataj cambaj huauquitaca pꞌiñanguiyari? Tucuicunami Diospaj ñaupajpi cashun.* Paimi tucui ñucanchijta juzganga.
11 Dios quillcachishcapica: “Jehová* Diosca cashnami nin: ‘Tucuicunami ñuca ñaupajpi cunguringacuna. Shinallataj tucuicunami ñucataca canca Diosmi cangui nishpa alabangacuna. Chaitaca ñuca causacushca shinatajmi nini’” ninmi.
12 Chashnami ñucanchijca cada uno imata rurashcataca Diosman ricuchishun.
13 Chaimanta shujtajcunata juzganata saquichij. Ashtahuanpish huauquicunapaj ñaupajpi ñitcachij rumita shina ama churaichijchu. Paicuna pandarichunpish ama imata ruraichijchu.
14 Ñucaca Amito Jesusta catij cashcamantami ima micunapish mana mapa cashcata allitaj yachani. Shinapish shuj runapaj ima micuna mapa cajpica chai micunata micunaca paipajca mana allichu.
15 Chaimanta can imata micushpa cambaj huauquita llaquichishpaca paita cꞌuyashcataca mana ricuchicunguichu. Can imata micushcamanta cambaj huauqui ñitcarishpa urmachunca* ama saquichu. Cristoca paimantami huañurca.
16 Shinaca cancunapajlla ima alli cashcataca ama ruraichijchu. Chashna rurajpica shujtajcunaca mana allita nishpami cancunamantaca rimangacuna.
17 Shuj runaca mana pai imata micushcamanta, ubyashcamantachu Diospaj Gobiernopica yaicunga. Ashtahuanpish espíritu santo ayudajpi cashcata ruraj cashcamanta, sumaj causaita charishcamanta, cushilla causashcamantami chaimanca yaicunga.
18 Maijanpish Cristota chashna sirvijca Diostami cushichin. Gentecunapaj ñaupajpipish allimi ricurin.
19 Chaimanta shujtajcunahuan sumajta causangapaj, caishuj chaishuj sinchiyarinacungapaj ima rurai tucushcata rurashunchij.
20 Dios rurashcataca ama micunallamanta chingachichijchu. Tucui micunacunami micungapaj alli can.* Shinapish shujtajcunata pandachina cajpica chaita micunaca mana allichu.
21 Aichata micushcamanta, vinota ubyashcamanta, ima shujtaj ruraita rurashcamantapish cambaj huauqui pandarina cajpica chaicunata mana ruranami ashtahuan alli can.
22 Chaicunamanta can imata crishpaca quiquinllahuan Diosllahuan saquirichun. Can yuyashca shina allita rurashcamanta mana culpayuj sintirishpaca cushicunguimi.
23 Ashtahuanpish shuj runaca allichu canga manachu alli canga nishpa mana shuj yuyailla micushpaca culpayujmi tucun. Paica mana crishpa chashna rurashcamantami culpayuj tucun. Imatapish mana crishpa ruranaca juchami can.
Notacuna
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “Tucuicunami Dios juzgashpa tiyarina ñaupajpi shayacushun” ninmi.
^ “Jehová” shutita huasha diccionariopi ricui.
^ Griego rimaipica: “chingarichunca” ninmi.
^ Griego rimaipica: “chuya can” ninmi.
