Lucas 22:1-71
-
Sacerdotecunaca Jesusta ima shina huañuchinatami mashcarcacuna (1-6)
-
Tucuri Pascua micuita allichishcamanta (7-13)
-
Jesusca pai huañushcata yuyarina tandanacuitami callarichirca (14-20)
-
“Ñucata contracunaman entregagrijca ñucahuanmi mesapi can” nishcamanta (21-23)
-
Maijan ashtahuan jatun cashcata paicunapura sinchita rimanacushcamanta (24-27)
-
Shuj gobiernopi mandangapajmi Jesusca ari ninacurca (28-30)
-
Jesusca Pedro paita mana rijsinichu ninatami huillarca (31-34)
-
Allichirishca canamanta, ishqui espadacunamantapish (35-38)
-
Olivos yuracuna tiyan urcupi Jesús mañashcamanta (39-46)
-
Jesusta japishpa apashcamanta (47-53)
-
Pedroca Jesustaca mana rijsinichu nircami (54-62)
-
Jesusmantami burlarircacuna (63-65)
-
Mandaj juezcuna Jesusta juzgashcamanta (66-71)
22 Levadura illaj tandata micuna fiesta Pascua* nishca punllami chayamucurca.
2 Sacerdotecunata mandajcunapish, mandashcacunata quillcajcunapish gentecunata manchashcamantami, Jesusta ima shina huañuchinata mashcacurcacuna.
3 Ashtahuanpish Satanasca Judas Iscariotepaj shungupimi yaicurca. Judasca 12 apostolcunapuramantami carca.
4 Paica sacerdotecunata mandajcunapajman, Diospaj huasita cuidajcunata mandajcunapajman rishpami Jesusta ima shina paicunaman entreganata parlanacurca.
5 Chashna parlajpimi paicunaca achcata cushicurcacuna. Chaimi Judasmanca cullquita cungapaj saquirircacuna.
6 Judasca paicunahuan ari ninacushpami gentecuna mana ricucujpi, Jesusta ima shina entreganata mashcacurca.
7 Levadura illaj tandata micuna fiesta punllami chayarca. Chai punllami Pascuapi huañuchina animalta huañuchijcuna carca.
8 Chaipimi Jesusca Pedrotapish, Juantapish: “Pascua micuita micungapaj allichinaman richij” nishpa cacharca.
9 Chashna nijpimi paicunaca: “¿Maipitaj allichichun munangui?” nircacuna.
10 Shina nijpimi Jesusca: “Jerusalén llajtaman chayajpica, puñupi yacuta apashpa ricuj shuj runami cancunahuan tupanga. Paihuan tupashpaca paita catishpa ringuichijlla. Maijan huasiman yaicujpica cancunapish chaiman yaicunguichij.
11 Chai huasiman yaicushpaca dueñotaca: ‘Yachachijca: “Ñucata catijcunahuan Pascua micuita micungapajca, ¿maipitaj invitashcacunapaj cuartoca?” ninmi’ ninguichij.
12 Chashna nijpica chai runaca jahua pisopi shuj jatun cuarto ña allichishcatami ricuchinga. Chaipi Pascua micuita allichichij” nircami.
13 Paicuna rishpaca tucuitami Jesús nishca shinallataj japircacuna. Chaipimi Pascua micuita allichircacuna.
14 Ña micuna horas tucujpimi Jesusca apostolcunandij micungapaj mesapi tiyarirca.
15 Chaipimi Jesusca cashna nirca: “Ñucaca llaquita manaraj apashpami, cai Pascua micuita cancunahuan micunata achcata munarcani.
16 Cancunamanca cashnami nini, cai Pascua micuitaca Diospaj Gobierno mandanaman shamungacama cutinca mana micushachu” nircami.
17 Chai qꞌuipaca Jesusca paiman cushca copa vinota japishpami Diosta pagui nishpa cashna nirca: “Ubyaichij, caishuj chaishuj pasachinacuichij,
18 cancunamanca cashnami nini, cunanmantapachaca Diospaj Gobierno mandanaman shamungacama cai vinotaca cutinca mana ubyashachu” nircami.
19 Shinallataj tandata japishpami Jesusca Diosta pagui nirca. Chai huashaca tandata chaupishpami paita catijcunaman cushpaca: “Caica cancunamanta cuna cashca ñuca cuerpotami ricuchin. Caitaca ñucata yuyarishpa ruracunguichijlla” nirca.
20 Micushca qꞌuipaca chashnallatajmi copata paicunaman cushpa Jesusca cashna nirca: “Cai copaca mushuj ari ninacushcatami* ricuchin. Chai ari ninacushcaca ñuca yahuarmantami callaringa. Chai yahuarca cancunamantami jichashca canga.
21 Shinapish ricuichij, ñucata contracunaman entregagrijca ñucahuanmi mesapi can.
22 Runapaj Churica Quillcachishcapi paimanta huillashca shinami huañunga. Shinapish contracunaman paita entregagrij runaca ¡aij imachari tucunga!” nircami.
23 Chashna nijta uyashpami apostolcunaca caishuj chaishuj, ¿pitaj chashna ruranataca yuyacunyari? nishpa tapurinacurcacuna.
24 Shinallataj paicunamanta maijan ashtahuan jatun cashcatami paicunapura sinchita rimanacui callarircacuna.
25 Chaita ricushpami Jesusca: “Llajtata mandajcunaca paicuna munashca shinami gentecunataca mandancuna. Autoridadta charijcunapish shujtajcunapaj allita rurajcuna shinami rijsishcacuna can.
26 Ashtahuanpish cancunaca mana chashnachu cana canguichij. Chaipaj randica maijanpish cancunapurapi jatun cajca qꞌuipa huiñai shina cachun. Pushajpish caishujcunata sirvij shina cachun.
27 ¿Pitaj ashtahuan jatun can? ¿Micuj* o sirvij? Micujmi ashtahuan jatun can ¿nachu? Shinapish ñucaca sirvij shinamari cancunapurapica cani.
28 Ashtahuanpish ñuca llaquicunahuan cajpica cancunami ñucahuan cashcanguichij.
29 Ñuca Yaya ñucahuan ari ninacushca shinami shuj gobiernopi mandangapaj ñucapish cancunahuan ari ninacuni.
30 Cancunaca ñuca Gobiernopimi ñuca mesapi ñucahuan micunguichij, ubyanguichij. Shinallataj jatun tiyarinacunapi tiyarishpami Israel llajtapaj 12 familiacunata juzganguichij.
31 Simón, Simón ¡ricui! Satanasca tucui cancunatami trigota shushuj shina shushunata munacun.
32 Ashtahuanpish cambaj crishca ama chiriyachunmi ñucaca Diosta rogarishpa mañashcani. Ña arrepintirishpa cutinllataj ñucapajman tigrashpaca cambaj huauquicunata sinchiyachingui” nirca.
33 Chashna nijpimi Pedroca: “Amito, canhuan prezuman rina cashpapish rishallami. Canhuan huañuna cashpapish huañushallami” nirca.
34 Chaimi Jesusca: “Pedro, cantaca cashnami nini. Cunanllatajmi canca gallo manaraj cantajpi ñucataca quimsa cutin mana rijsinichu ningui” nirca.
35 Jesusca caitapishmi nirca: “Cancunataca cullqui* illajllata, micunata apana bolsa* illajllata, pargatecuna illajllatami huillanaman cacharcani. Chashna cachajpipish cancunapajca ima mana illarcachu ¿nachu?” nirca. Chashna nijpimi paicunaca: “Mana” nircacuna.
36 Chaipimi Jesusca paicunamanca cashna nirca: “Cunanca, cullquita* charijpish chaita apachunlla. Micunata apana bolsatapish apachunlla. Espadata mana charijca paipaj jahua churanata cꞌatushpa shuj espadata randichun.
37 Ñucaca cashnami nini, ‘juchayujcunata shinami ricurcacuna’ nishpa quillcashcami ñucapica pajtarinataj can. Chaimi ñucapica pajtaricun” nircami.
38 Chashna nijpimi paicunaca: “Amito, ¡ricui! Caipica ishqui espadacunatamari charinchij” nircacuna. Chashna nijpimi Jesusca: “Chaillami alli canga” nirca.
39 Chaimanta llujshishpaca Jesusca Olivos yuracuna tiyan urcumanmi pai rij cashca shinallataj rirca. Paita catijcunapishmi paihuan rirca.
40 Chaiman chayashpami Jesusca: “Juchapi ama urmangapajca Diosta mañashpa catichij” nirca.
41 Jesusca paicunamanta ashata* caruyashpami, cungurishpa Diosta mañai callarishpaca
42 cashna nirca: “Yayitu, can munashpaca cai copata ñucamanta anchuchihuai. Shinapish ñuca munashcataca ama rurapaichu, ashtahuanpish can munashcata rurapai” nirca.
43 Chaipimi jahua pachamanta shuj ángel ricurishpa paita sinchiyachirca.
44 Shinapish Jesusca yallitaj llaquilla cashpami tucui shunguhuan Diosta ashtahuan mañashpa catirca. Paipaj jumbipish yahuar shina tucushpami pambaman shuturca.
45 Diosta mañashca huashami Jesusca jatarishpa paita catijcunapajman tigrashpaca paicuna dormicujta japirca. Paicunaca yallitaj llaquilla cashcamantami shaicushca carcacuna. Chaimantami dormicurcacuna.
46 Chaimi Jesusca: “¿Imamantataj dormicunguichij? Jatarichij, juchapi ama urmangapajca Diosta mañashpa catichij” nirca.
47 Jesús chashna nicujpirajmi achca gentecuna paipajman cꞌuchuyarcacuna. Chai gentecunata ñaupashpaca 12 apostolcunamanta caj Judas runami shamurca. Judasca Jesuspajman cꞌuchuyashpami paita mucharca.
48 Shinapish Jesusca: “Judas, ¿Runapaj Churitaca shuj muchahuanchu contracunaman entregangui?” nircami.
49 Ashtahuanpish Jesushuan cajcunaca ima tucugrishcata ricushpami: “Amito, ¿espadahuan macanacushunchu?” nircacuna.
50 Chashna nishpaca paicunamanta shujmi sacerdotecunata jatun mandajpaj sirvijta espadahuan alli lado rinrinta pꞌitirca.
51 Chashna rurajpimi Jesusca: “Ama chaita ruraichu” nirca. Shinami Jesusca chai sirvij runapaj rinrinta tuparishpa alliyachirca.
52 Chai qꞌuipami sacerdotecunata mandajcunatapish, Diospaj huasipi cuidajcunata mandajcunatapish, paita japinaman shamuj autoridadcunatapish* Jesusca cashna nirca: “¿Shuhuata shinachu ñucataca espadacunahuan, caspicunahuan japinaman shamushcanguichij?
53 Ñucaca Diospaj huasipica punllantami cancunahuan carcani. ¿Imamantataj chaipica mana japircanguichij? Ashtahuanpish cunanmari cancunapaj tiempopish, amsapi cajcuna mandana tiempopish chayashca” nircami.
54 Chai qꞌuipami paicunaca Jesusta japishpa sacerdotecunata jatun mandajpaj huasiman pusharcacuna. Shinapish Pedroca caru carullami catishpa rirca.
55 Paicunaca patio chaupipi ninata japichishpami tandalla tiyarircacuna. Pedropishmi paicunapaj chaupipi tiyarirca.
56 Chaipimi shuj sirvij huarmica ninapi cunushpa Pedro tiyacujta ricurca. Paita ricurashpami chai huarmica: “¡Cai runapishmi paihuan purij carca!” nirca.
57 Shina nijpimi Pedroca: “Paitaca mana rijsinichu” nirca.
58 Chai qꞌuipami shujtaj runa Pedrota ricushpaca: “Canpish paicunapuramantami cangui” nirca. Shinapish Pedroca: “Mana paicunapurachu cani” nirca.
59 Chaimanta shuj hora shinapimi shujtaj runapish cutin cutin: “¡Cai runaca paihuanmi purij carca! Paica Galilea llajtamantami” nirca.
60 Shina nijpimi Pedroca: “Imatapishchari nicungui, mana yachanichu” nirca. Pai chashna nicujpirajmi ñapish shuj gallo cantarca.
61 Chaipimi Jesusca* tigrarishpa Pedrota ricurca. Chashna ricujpimi Pedroca Jesús imata nishcata yuyarirca. Jesusca: “Canca cunan shuj gallo manaraj cantajpimi ñucataca quimsa cutin mana rijsinichu ningui” nishca carca.
62 Chaimantami canllaman llujshishpa cꞌuyaillata huacarca.
63 Jesusta cuidacuj runacunaca paimanta burlari callarishpami macarcacuna.
64 Paipaj ñahuita tapashca qꞌuipami: “Profeta cashcata ricuchiyari, ¿pitaj cantaca macarca? ¡Huillai!” nishpa cutin cutin tapurcacuna.
65 Shinallataj Jesusmanta achca mana allicunata nishpami Diosta cꞌamircacuna.
66 Ña pacarijpica chai llajtamanta autoridadcunami tandanacurcacuna. Chaipica sacerdotecunata mandajcunapish, mandashcacunata quillcajcunapishmi carcacuna. Jesustaca mandaj juezcunapaj* tandanacuna ucuman pushashpami cashna nircacuna:
67 “Cristochu cangui, huillai” nircacuna. Chashna nijpimi Jesusca cashna nishpa cutichirca: “Ari nijpipish cancunaca manataj cringuichijmanchu.
68 Shinallataj cancunata imata tapujpipish mana cutichinguichijmanchu.
69 Cunanmantapachaca Runapaj Churica poderta charij Diospaj alli ladopimi tiyacunga” nircami.
70 Chashna nijpimi tucuicuna Jesustaca: “Shinaca ¿canchu Diospaj Churi cangui?” nishpa tapurcacuna. Chashna tapujpimi Jesusca: “Ari, cancunallatajmari chaitaca nicunguichij” nishpa cutichirca.
71 Shina cutichijpimi paicunaca: “¿Imapajtaj shujtaj testigocunataca minishtinchijyari? Ñucanchijllatajmari pai ima nishcataca uyashcanchij” nircacuna.
Notacuna
^ “Pascua” shimita huasha diccionariopi ricui.
^ “Ari ninacushca” shimita huasha diccionariopi ricui.
^ O “Mesapi tiyarij”.
^ Griego rimaipica: “cullqui huaquichina bolsa” ninmi.
^ Ñaupa punllacunapica viajangapajca carahuan rurashca bolsacunapimi micunata, churanata, shujtaj minishtirishca cosascunatapish apajcuna carca.
^ Griego rimaipica: “cullqui huaquichina bolsata” ninmi.
^ Griego rimaipica: “rumita shitashca shinallaman” ninmi.
^ Griego rimaipica: “ancianocunatapish” ninmi.
^ Griego rimaipica: “Amitoca” ninmi.
^ O “Sanedrinpaj”.
