Efesios 5:1-33
-
Allita parlanamanta, chuya causaimantapish (1-5)
-
Luzpaj huahuacuna shina causanamanta (6-14)
-
Diospaj espirituhuan junda canamanta (15-20)
-
Tiempota alli aprovechanamanta (16)
-
-
Cusacunapajpish, huarmicunapajpish consejocuna (21-33)
5 Chaimanta cancunapish Dios rurashca shinallataj ruraichij. Cancunaca Dios cꞌuyashca huahuacunami canguichij.
2 Cristo cꞌuyashca shinallataj cancunapish cꞌuyaita ricuchishpa catichij. Paica ñucanchijta cꞌuyashpami paipaj causaitaca shuj ofrendata shina, shuj sacrificiota shina ñucanchijmanta curca. Chai ofrendami Diospajca mishquijllata ashnacuj shina carca.
3 Cancunapurapica huainayanamanta,* ima mapata ruranamanta, shujtajcunapajta munanamanta parlocunaca amataj uyarichun. Chaicunaca jucha illajcunapurapica mana allichu.
4 Pinganayai ruraicunata ama ruraichijchu. Manapish rimana shimicunata, asichingaraicu mapa parlocunatapish ama rimaichijchu. Caicunata ruranaca mana allichu. Chaipaj randica Diosta pagui nichij.
5 Cancunaca allimi yachanguichij, allimi intindinguichij. Huainayajcuna,* tucuipi mapa cajcuna, shujtajcunapajta munajcunapish Diospaj Gobiernopica ima herenciata mana japingacunachu. Chai Gobiernopica Cristomi mandacun. Shujtajcunapajta munanaca yanga dioscunata adorana shinallatajmi can.
6 Yanga shimicunahuan cancunataca pipish ama pandachichun. Diosca chaicunamantami mana cazujcunapaj huahuacunataca llaquichinga.
7 Chaimanta paicuna rurashca shinallataj cancunapish ama ruraichijchu.*
8 Ñaupaca cancunaca amsapimi carcanguichij. Shinapish cunanca Amito Jesushuan shuj shinalla cashcamantami luzpi canguichij. Shinaca luzpaj huahuacuna shina causashpa catichij.
9 Chai luzmantami tucuipi alli shungu canchij, cashcata rurajcuna canchij, mana llullapi nishca shina purinchij.
10 Chaimanta Amitopaj ñaupajpi cancunapaj rurashcacuna alli cashcatapish, mana alli cashcatapish ricuraichij.
11 Amsapaj yanga ruraicunapi chagrurinata saquichij. Ashtahuanpish chai ruraicuna mana alli cashcata ricuchichij.
12 Paicuna pacalla rurashcata parlanatapish pinganayanmi.
13 Cunanca tucui ruraicuna jahuapimi luzca achijyachin. Chaimantami chai tucui ruraicunaca ricunalla can.
14 Dios quillcachishcapica: “Dormicuj runa rijchari. Huañushcacunapaj chaupimanta jatari. Cristomi cantaca achijyachinga” ninmi.
15 Chaimanta yuyai illajcuna shina ama puringapaj* alli cuidarichij. Ashtahuanpish alli yuyaiyujcuna shina purichij.*
16 Mana alli punllacunapi causacushcamanta ashtahuan allicunata rurangapaj cancunapaj tiempota alli aprovechaichij.*
17 Chaimanta yuyai illajcuna shina canata saquishpa Jehová* Diospaj munai maijan cashcata intindichij.
18 Shinallataj vinohuan ama machaichijchu. Machashpaca mana allicunatami ruranguichij. Chaipaj randica Diospaj espirituhuan junda caichij.
19 Salmocunata cantashpa, Diosta alabashpa, paita adorangapaj cantocunata cantashpa caishuj chaishuj sinchiyarinacuichij. Shinallataj cancunapaj shungupi musicata tocacuj shina Jehová* Diosta cantaichij.
20 Ñucanchij Yaya Diostaca ñucanchij Amito Jesucristopaj shutipi tucuimanta siempre pagui nichij.
21 Cristota respetashcamanta caishuj chaishuj cazunacuichij.
22 Huarmicuna ima shinami Amito Jesusta cazunguichij. Chashnallataj cancunapaj cusacunatapish cazuichij.
23 Cristoca congregacionpaj umami can. Chai shinallatajmi cusapish huarmipaj uma can. Cristoca paipaj causaita cushpami congregaciontaca quishpichirca.
24 Ima shinami congregacionca Cristota cazun, chashnallatajmi huarmicunapish paicunapaj cusacunata tucuipi cazuna can.
25 Ima shinami Cristoca congregacionta cꞌuyarca, chashnallataj cusacunapish cancunapaj huarmicunata cꞌuyashpa catichij. Cristoca congregacionta cꞌuyashpami paipaj causaita curca.
26 Chashnami paica yacuhuan maillaj shina Diospaj shimihuan chuyayachirca.
27 Congregaciontaca paipaj ñaupajpi sumaj ricurichun, ima mapa illaj cachun, llambujlla cachun, jucha illaj cachun, ima falla illajlla cachunmi chuyayachirca.
28 Chashnallataj cusacuna cancunapaj quiquin cuerpota cꞌuyarij shinallataj cancunapaj huarmicunatapish cꞌuyaichij. Paipaj huarmita cꞌuyaj cusaca paillatajmi cꞌuyarin.
29 Maijanpish paipaj quiquin cuerpotaca* mana nunca pꞌiñanchu. Ashtahuanpish cꞌuyaihuanmi caran, cꞌuyaihuanmi cuidan. Chashnallatajmi Cristopish congregacionhuanca ruran.
30 Ñucanchijca paipaj cuerpopaj partecunami canchij.
31 “Chaimantami cꞌarica paipaj yayata, mamata saquishpa paipaj huarmihuan tandanacushpa, ishquindijmantaca shuj aichalla tucungacuna”.
32 Cunanca Cristomantapish, congregacionmantapishmi parlacuni. Caica Diosmanta pi mana yachai tucushca jatunmari.
33 Shinapish cada unomi huarmitaca quiquin cꞌuyarij shinallataj cꞌuyana can. Cutin huarmica paipaj cusatami shungumanta respetana can.
Notacuna
^ Griego rimaipica: “pornéia” ninmi. “Huainayana” shimita huasha diccionariopi ricui.
^ “Huainayana” shimita huasha diccionariopi ricui.
^ O “paicunapaj ruraicunapica ama tandanacunguichijchu”.
^ O “comportaringapaj”.
^ O “comportarichij”.
^ Griego rimaipica: “tiempota randichij” ninmi.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “aichataca” ninmi.
