Colosenses 4:1-18
-
Amocunapaj consejocuna (1)
-
“Diosta mañanataca amataj saquichijchu” (2-4)
-
Diosta mana sirvijcunapurapica imatapish alli yuyaihuan ruraichij (5, 6)
-
Tucuri shimicuna (7-18)
4 Amocuna, cancunata sirvijcunataca cashcata rurashpa tucuicunata igual trataichij. Cancunapish jahua pachapi shuj Amota charishcataca yachanguichijmi.
2 Diosta mañanataca amataj saquichijchu. Paita mañacushpaca pagui nichij. Rijcharishca caichij.
3 Paipaj shimimanta huillangapaj punguta Dios pascachun ñucanchijmantapish Diosta mañaichij. Chashnami Cristomanta pi mana yachai tucushcataca huillai tucushun. Chaita huillacushcamantami ñucaca cadenacunahuan huatashca prezu cani.
4 Huillana cashca shinallataj clarota huillangapaj ñucamantapish Diosta mañaichij.
5 Diosta mana sirvijcunapurapica imata rurashpapish alli yuyaihuan ruraichij. Cancunapaj tiempotapish alli aprovechaichij.*
6 Imata nishpapish sumaj shimicunahuan parlaichij. Cancunapaj rimashcacunaca cachihuan mishquiyachishca shina cachun. Chashnami cada unoman imata cutichinata yachanguichij.
7 Ñuca cꞌuyashca huauqui Tiquicomi ñuca ima shina cashcata cancunaman huillanga. Paica ñucanchijhuan igualmi sirvij runa shina Amito Jesusta tucui shunguhuan sirvicun.
8 Paitami ñucanchij ima shina cashcata huillachun, cancunapaj shunguta cushichichunpish cachani.
9 Paihuanca tucui shunguhuan sirvij cꞌuyashca huauqui Onesimopishmi ringa. Onesimoca cancunapurallamantatajmi can. Paicunami caipi ima tucucushcataca tucuita cancunaman parlangacuna.
10 Ñucahuan igual carcelpi caj Aristarcopish, Bernabepaj primo Marcospishmi cancunamanca saludocunata cachancuna (cancunata ricunaman rijpica Marcostaca ña mandashca shinallatajmi alli chasquina canguichij).
11 Justo nishca Jesuspishmi cancunamanca saludocunata cachan. Paicunaca circuncisionta rurachishcacunapurami. Paicunallami Diospaj Gobiernota apoyangapaj ñucahuan trabajashcacuna. Paicunami ñucata ayudashpa achcata cushichishcacuna.*
12 Cancunapuramanta Cristo Jesusta sirvij Epafraspishmi cancunamanca saludocunata cachan. Paica cancunamantami siempre tucui shunguhuan Diosta mañan. Chashna mañajpimi cancunaca tucuripica tucuipi sinchi runacuna canguichij. Dios tucui imallata rurasha nishcapipish tucui shunguhuan cringuichij.
13 Paica cancunamantapish, Laodicea llajtapi caj huauqui panicunamantapish, Hierápolis llajtapi caj huauqui panicunamantapishmi sinchita trabajacun. Chaitaca ñucallataj ricushpami huillani.
14 Cꞌuyashca doctor Lucaspish, Demaspishmi cancunamanca saludocunata cachan.
15 Laodicea llajtapi caj huauquicunata ñuca partemanta saludapaichij. Shinallataj pani Ninfata paipaj huasipi tandanacuj huauqui panicunatapish* saludapaichij.
16 Cai cartata liyishca qꞌuipaca Laodiceapi caj congregacionman cachanguichij paicunapish cai cartata liyichun. Cutin cancunaca Laodiceaman cachashca cartata mañashpa liyinguichij.
17 Shinallataj Arquipotaca: “Amito Jesús mingashca obrata pajtachingapajca sinchita trabajashpa cati” ninguichij.
18 Ñucaca Pablomi cani. Ñuca propio maquihuanmi cai saludotaca quillcani. Carcelpi ñuca cashcatapish yuyaripaichij. Diosca yallitaj llaquij cashcata cancunamanca ricuchichun.
Notacuna
^ Griego rimaipica: “tiempota randichij” ninmi.
^ O “sinchiyachishcacuna”.
^ Griego rimaipica: “congregaciontapish” ninmi.
