Gálatas 6:1-18
-
“Llashaj cargata apaj shina caishuj chaishuj ayudanacuichij” nishcamanta (1-10)
-
Imata tarpushpaca chaillatataj japinamanta (7, 8)
-
-
Circuncisionta rurachinaca mana minishtirinchu (11-16)
-
Dios cancunata mushujyachishcamanta (15)
-
-
Tucuri shimicuna (17, 18)
6 Ñuca huauquicunalla, shuj runa mana alli ñanpi cajpica, pai manaraj cuentata cujpi cancunaca Diospaj espíritu ayudajpi cꞌuyaihuan paitaca alli ñanman tigrachun ayudaichij. Cancunapish mana alli ruraicunapi ama urmangapaj cuidarichij.
2 Llaquicunapi cashpaca llashaj cargata apaj shina caishuj chaishuj ayudanacuichij. Chashnami Cristopaj leyta pajtachinguichij.
3 Maijanpish ima mana cashca jahua valishca cashcata yuyajca paillatajmi umaricun.
4 Ashtahuanpish cada uno imata ruracushcataca alli ricurachun. Chashnami shujtajcunahuan mana chꞌimbapurarishpa pai imata rurashcamantaca cushicunga.
5 Cada unomi imata rurana cashcataca pajtachinataj can.*
6 Maijanpish Diospaj shimimanta yachacujca paita yachachijmanca tucui allicunata cushpa ayudachun.
7 Ama umarichijchu: Diosmantaca ni pi mana burlari tucunchu. Maijan runapish imata tarpushpaca chaillatatajmi japinga.
8 Aicha munaillapi yuyashpa tarpujca aicha munaimantaca mana allicunatami japinga. Cutin Diospaj espiritupi yuyashpa tarpujca Diospaj espiritumantaca huiñai causaitami japinga.
9 Shinaca allita ruranataca amataj saquishunchijchu. Mana shaicushpaca tandana punlla chayajpica japishunmi.
10 Chaimanta ima horapish allita rurai tucushpaca tucuicunapaj allita rurashunchij. Ashtahuantajca Jesusta catij ñucanchij huauqui panicunapaj allita rurashunchij.
11 Ricuichij, ñuca maquihuantajmi jatun letracunahuan cancunamanca quillcashcani.
12 Circuncisionta rurachichun obligajcunaca gentecunapaj ñaupajpi alli ricurinallatami munancuna. Paicunaca Cristomanta* catirashpa ama llaquichichunmi chashna rurancuna.
13 Circuncisionta rurachijcunapish Leypi mandashcataca mana pajtachincunachu. Chashna cashpapish, cancunata circuncisionta rurachishpaca cancunapaj cuerpopi chashna rurachishcamanta jatun tucungapajllami chashna ruranata munancuna.
14 Ñucaca imamanta mana jatun tucusha ninichu. Ashtahuanpish llaquichina caspipi* huañuchishca ñucanchij Amito Jesucristollamantami jatun tucusha nini. Pai huañushcamantami cai pachaca ñucapajpish huañurca. Chashnallatajmi ñucapish cai pachapajca huañushcani.
15 Circuncisionta rurachinapish, circuncisionta mana rurachinapish mana imachu can. Ashtahuanpish Dios cancunata mushujyachishcami tucuimanta yalli valishca can.
16 Cai nishcapi shina allita rurashpa causajcunaca tucuicuna sumaj causaita charichun. Diospish llaquishcata paicunamanca ricuchichun. Paicunaca Diospaj Israel llajtami.
17 Ñuca cuerpopi chugricuna alliyashcaca Jesusta sirvij cashcatami ricuchin. Chaimanta cunanmantapachaca pipish ñucataca ama ima problemata rurachun.
18 Huauquicuna, cancuna alli yuyaita ricuchishcamanta ñucanchij Amito Jesucristoca yallitaj llaquij cashcata cancunaman ricuchichun. Chashna cachun.*
Notacuna
^ Griego rimaipica: “Cada unomi quiquin cargata apana can” ninmi.
^ Griego rimaipica: “Cristopaj llaquichina caspimanta” ninmi. “Llaquichina caspi” shimita huasha diccionariopi ricui.
^ “Llaquichina caspi” shimita huasha diccionariopi ricui.
^ O “Amén”.
